مأساة روح {هالكه} في اوراق تائهه ~

السلام عليكم ..~

المكياج والعنايه بالبشره اللي استخدمتهم خلال هالشهر ..~


؛



من اليمين للشمال :

_ حُمرا من شركه hank & henry , لون مطفي اسمه petal pusher , اشتريته من سفورا 17 $
عجبني اللون وعجبني بيضّل وكت طويل وتكيل , بس اد حطيته ع مرطب شفاه راح يعبّي وينتقل وين مكان .. ولحد الان بستخدمه ..~

_ حُمرا من شركه smashbox ,اجتني عينّه من ابسي لاحدى الاشهر الكديمه , ويعتبر من اللالوان المفضله عندي عالاخر , بستخدمه لما بدي الفت الانتباه وسناني بيض عالاخر , بس لازم احط خطاط بالاول بنفعش لحاله الا اد ع مرطب , لانه لما ينشف بصير لونين وبكره اللونين , ومع هيك عنجد كديش بحبه عليا , ولسا كمان بستحدمه بس مش كتثير ضايل فيه ..~

_ ماسكرا حكيت عنها بمشاركه كديمه ومليش نفس ارجع ادوّر ع المشاركه , بس خلّصت وكانت منيجه ..~

_ الايلانير , القلم كمان حكيت عنه من قبل ومن النوع اللي عنجد اكرهتها وما مصدّق يخلّص
اما السائل حبيت اجرّب نوع اللي راسه متل قطّاعه البيتزا , ونوعه اللي لما بنشف وبتكدّر تكبّعه , اسهل للشيل , من شركه butter londen واسمه stroke of wow , اشتريته من ulta 20$ , هو مش عارف يعني منيح ومش منيح , يعني بنفعش استخدمه لحاله لانو بكون مش المستقيم اللي بدي اياه , لهيك بستخدم اتنين مع بعض ..~

_ قلابه الرموش حكيت عنها كمان ورهيه عالاخر ..~

_ وهدا عينه اجتني من ابسي , برايمر من make up forever , عجبني وملان عندي منه عينات , ودايما بستخدمه ..~

هدا بالنسبه لمكياجي الي حوالي شهر بستخدمه , وبتكون هاي الشنته الصغيره بشنتيتي تبعت الشغل , لهيك كل ما اخلّص شفتي المسائي , الصبح بستخدم هدول قبل ما اجي عالبيت ..~

||

اما بخصوص العنايه اللي عندي اهم شي ورقم واحد هي العنايه , وفي عندي شنته موجوده بالشغل بستخدمها وبشوف انها وزن عليا انو احملها معي ..~

اما هاي الشنته الصغيره دايما موجوده بشنتي الكبيره ودايما باخدها معي وين مكان



_ اهم سيروم عندي , دايما ما بقطع حالي منه من اول ما اكتشفته , كتير بساعد على انه يخفف من حب الحراره اللي بيطلع ع وجهي , بشتريه من الامازون في 25$ , truskin naturals , اسمه tea tree

_ مرطب مش كتير صارلي بستخدمه , لاني بالعاده بالوكت الحالي بستخدم تلات انوع وهدا منهم , وبحب استخدمه بالصبح لانه خفيف وشوي بشدّ البشره , بس مش رهيب بخصوص انه يغطّي على التنفّخ والتعب من شفتات الليل , بس عنجد بخلّي ملمس وجهي رهيب
من الامازون 30$ ,paula`s choice

_ توع من انواع المرطبات اللي صارله زمان عندي وقرّب يخلّص وما شوفت اي اشي منيح بخصوصه , بس بحب مرات اخلّطه مع البرايم مشان البرايم ما ينشّف بشرتي , مع اني من عشاق شركه simple

_ كريم للعيون يالله عالفاضي, اول اسبوع من استخدامه كان عنجد رهيب بأنه بشّد تحت العين , وعطول بقضي على النفخ , بس بعدها ولا صار اي مفعول , بعرفش لييش , ومع هيك بتسخدمه
dr.brandt 35$ lk من سفورا

_ غسول وجه عينه من ابسي , ويالله شو هالغسول بعطي نظاره وتبيض للوجه , وعجبني , الا انو مع الاستخدام خلّي وجهي يطلع حب عليه , مع انه كنت امفكره اشتري متله الحجم العادي , بس باخر كم استعمال شوفت انو هيّج وجهي لهيك بطّلت ..~

_ علبه عطر تعبانه وفيها بورا بورا , والعلبه التانيه عينه ..~

_ زيت للاظافر وهو الان رقم واحد عندي , بخلّي الاظافر بيض عالاخر ..~

_ كريم للشعر من ابسي عيّنه , بكره ريحته , وبكره الدبّك اللي بيتركه ع اديا , وبكره انه بعمل تلبيط وتزيت وكرف للشعر ..~

||

بخصوص ابسي لشهر 11

من زمان ما حطيت ما كان يجي عبالي وكنت انسى لما يجي عبالي





؛

اللي استخدمته ..~



من بعد يومين ما عجبتني من مره , تلبيط وتكويم الروموش وبتثبتش , بتسحل وحاله , يمكن مع الاستخدام اكتر يتغير رأي ؟ بعرفش ..~



منيح بس ابصر مش نوعي نحكي , لازم اضل احط واكرهت لونه لحاله بحسسني لما احطّه انو وجهي مريض , لهيك صرت امزجه وكان كتير احسن ..~



اللون جدا رهيب , بس لسا ما استخدمته اشوف بثبت , بنشف , بخرب ! لسا ..~



كديش عشقتها , وكد ما دوّرت عليها اشتريها العينه الكامله مش لاكي , اما هي ريحتها ورد مع بخور , كانت رهيبه , وريحه كويه وخفيفه , طول الوكت وانا بس بدهن ركبتي واديا , بحب اضل شامم حالي ريحتها , عنجد عشق ..~

السلام عليكم ..~


الشغلات اللي كنت مدمنه عليها خلال الشهرين ..~

القرأه :~

نوع مانغا بحتفظ فيه ويعتبر اكتر اشي مدمن عليه هالشهر من كلشي .

مانغا TOMIE الكاتب junji ito اللي تعتبر مانغا الرعب رقم واحد عندي , وبضّل اقرأ واعيد فيها , بشوف مرات انه شخص عنجد متعاقد مع الشيطان لانو عنجد تصويره للشغلات بتخطرش عبال حد( انتهى) .

كتاب الاخوه كارامازوف للكاتب الروسي المفضل عندي ورقم واحد دوستويفسكي , الجزء الاول(انتهى) على امل اعيّده قبل ما ابلّش بالجزء التاني

||

بالنسبه للمشاهده :~

إنيمي :~

شهر مارس يحل كالاسد , اللي ضايل كم حلقه بنتهي منه , وبكل صراحه انيمي دراما رهيبه عندي وكديش مبسوطه بكل حلقه بشوفها , لاني بحاول احمّل كلشي فريق الرفع بيرفعه وبشوفه مع الزمن ..~


ياباني :~
كلهم درامات خلصّتهم

Engine رهيب عالاخر
Tokyo Friends كمان عندي رهيب لانو ايتا فيه
War of Lie منيح وحلو
Shitamachi Rocket منيح وحلو
Nodame Cantabile منيح وحلو والانمي عالطريك اشوفه

عربي :~
بشوف في مسلسل بيت السلايف

افلام خلصتهم
فتاه المصنع , عادي وكان نفسي النهايه تكون حزينه
قضيه 23 , رهيب جدا
واجب , رهيب رهيب دمار , صرت شايفته تلات مرات



||

بخصوص الاغاني مش عارف لانو ممنوع , بس كتير مبسوطه انو دايدو رجعت

||





جوري صغير ..~

؛



؛



زيت السياره لما فرط الجير ..~

..~

السلام عليكم ..~

اليوم هو الاربعا والساعه عندي 11 بالليل || 11\21\18

الحمد لله الليله انا نايمه بالبيت , ومكانش عندي النفسيه والمزاج والطاكه لاجي اكتب عن مجريات ايامي , وكمان الحمد لله صابتني فلونزه كمان وسخونه مع اني ماخد ابره التطيعم من الفلونزه ومع هيك فلوزت , بس الحمد لله مش هالقوه , كأنه ابره التطعيم مساعده شوي ,مع اني هالاسبوعين بحرب بكصه اني اترك المدونه واهجرها وكصه لأ لازم اكمّل , اد هجرتها بعرف حالي باني باخد عالوضع , وبديش اضل اهجر الكصص بحياتي , مضلش اشي ومضلش حد , وكصه السياره مأٌثره عليا غير شكل , نص بيحكي اشتري جديد ونص بيحكي اشتري مستعمل وانا بحكي الجهتين صعب عليا , بس بدي سياره هيك ببلاش وجديده , كيف تصير بعرفش , بكون دايما احكي لحالي يا ريتني دلعه وهامله ومعنديش مبادئ , كان بصاحب عشان الاصحاب يصرفوا عليا , كان بخليهم يشترولي سياره , بس اد بالاصل بديش اخوتي يساعدوني بدفع المصاري للسياره , شو بعرفني عن مبادئ اللي عنجد بهالزمن شايفها غلط , عنجد الواحد يبيعهم للمبادئ عشان يعيش , احسن مهو مش عايش من اصله عشان هالمبادئ ..~

وهالفتره من شغل لشغل , لفش نوم , ومليش نفس اكل , بس ليمون ودوا وتمدد ع الكنبه بالصاله بالدفى تبع التدفئه واشوف فلم ورى فلم , او اقرا بالمانغا المفضله , او اسمع اغاني , هيك كان كل هدا الاسبوع , وبين وبينكم الحلو كمان انو مكانش حد يجي عندي , فعنجد كنت احس معي وكت للتمدد وللفلام مع هالهلوسه تبعت الفلونزه , والدار مرتبه ونظيفه, وحكتلكم بخصوص الحرايق اللي صايره لهيك عنجد كأنه عايشين في فلم من افلام الكوارث اللي بنشوفها , كل الجو دخان , بس اليوم بلشت تمطر , هلكيت خف الدخان , وغير انو احنا في اسبوع الاعياد من عيد التركي تبعهم تبع الحبش والجمعه السوداء اللي راح اشتغل فيهم , حكيت لخواتي اد حد بيطلع ع الجمعه السودا يشترولي اشي , بحب الهدايا ..~

ما حكتلكم عن مشكله ساده بانه كان بده يقتل جاج الجيران والله ستر وبعدها بطلّت اطلعه برى البيت من مره عشان مش ناكصني مشاكل ووجع راس , وكمان مشاكل بالشغل انو بدهم نشتغل ايام قليله, عشان بنحسب شغل زياده عن المقرر وبدفعلوا ضعف , بعرف رئيسي بخيل ,وصاروا يجيبوا ناس جداد وبكره اشتغل مع ناس جداد لانهم بيكزبوا عليا , يبي كديش نعسانه , صارلي يومين مش نايم فيه الا ساعتين , وارسي بده ينفجر من الفلونزه , الليمون ودوا الكحه والدوا العادي ومع التطعيم ويالله يالله ..~

؛

خلصت شغلي الصبح وكنت بدي اتكاتل مع البنت الجديده اللي بتشتغل الشفت الصباحي , جايه ابدر بساعه وطول هالساعه وهي تبرم وتحكي حكي فاضي , بانو الشغل سهل وكلشي حلو فيه , فكعت معي , سحبت حالي وتركتها لاني لو ضليت كمان شوي عنجد اتكاتلت معاها , مش مستوعبه انو شغل الليل اصعب بلميون مره من شغل النهار , حتى كارمليتا انتبهت عليا لهيك اجت ركاض تحكي مع البنت , واللي بكهر انو كل ما ابعد عنها والتهي باشي بالشغل تلحكني وتكمل حكي , حتى اخر شي بطلت اتبسّم بوجهها , او اطلّع عليها , او حتى اجاوب ع اسألتها وهي لاحظت هدا الاشي , ومع هيك وقحه ضلت تكمل حكي واساله , لهيك هيك انا اتنهدت ولفيت حالي وتركتها وعطول اجت كارمليتا لانها كانت بعيد عني بس عيونها علينا ..~

كانت الدنيا مطر قوي لما اطلعت من الشغل وكنت حاسب حساب انو في مطر , لهيك اخدت المظله معي , اطلعت من الشغل الصبح وحبيت اني اجي عالبيت بالباص حتى لو اني تعبانه , لاني بحب المطر , مرات الواحد ببكي تحته لانو محدش بيعرف اد بتبكي بالشارع , واجى عبالي امشي تحت المطر , اوصلت الدار , رميت حالي عالارض وسلام مع ساده , وكنت جعانه , عملت فطور , وصارلي كمان فتره انو بغبّّص بالاكل , عشان هيك طلع ع وجهي حب , وضويت التدفئ , والتلفزيون , وبلشت اشوف بفلم , حكيت مع امي , وضليت متمدده , صارت حوالي الساعه 11 ونص .~

اخوي واحد بيتصل ويني واد خواتي بدهم يجيوا , اتفكنا كلنا ع الساعه , وبلشوا يجيوا واحد ورى التاني , اجتمعنا اليوم , وحوالي العصر اتسهلوا , وانا رتبت الدار بعدهم , وارجعت اتمدد ع الكنبه , الا امي بتتصل , وحكيت معاها ..~

وبعدين ارجعت ع الافلام , الا اخوي تلات مروّح من الشغل , عمل عشا اخوي , لانو اتصل اد اطبخ , حكتله هو هاليوم اللي معطله فيه ومش نايمه وملفزوه , بديش اطبخ , بدك انت تيجي تطبخ انت حر , لهيك هو لما اجى طبخ, واتعشينا , واسهرنا , وهيني ..~


||





؛


مليش نفس احكي معك لما اسكت لاني مش طايكك , مش السكوت رضا , رضا هاد انكعه واشرب المي تبعته !

||

( لتكون فكّرت لما انبسطت معك لدرجه نزلوا دموعي , اني مش راح اتركك ؟ اضّلكش تحلم ! قلبت معدتي , كله كان تمثيل وكذب ,, تمثيييل ) ..~

السلام عليكم ..~

اليوم هو الاحد والساعه 10 بالليل || 11\25\18

؛

اخر مره حكيت فيها عن مجريات ايامي كانت يوم الاربعا بالليل , وكانت عطلتي باني نايمه بالدار , ضليت سهرانه لنص الليل لانو في كصه اختي اماني طلبت اني اعملها الها , ومع انه كان مكسور عليا نوم , ومش كادر اتحمل السهر لنص الليل , بس ضليت وعملت الكصه , ومن يومين شوفت خربطه بالكصه بعرفش كيف صارت , ولما اجيت اصلّحها عملت كمان خربطه زياده , وانا هلكيت مش عارف كم خربطه صارت , كله بينعرف بنهايه هدا الاسبوع والله يستر لانو الشغله مش الي , لو الي بهمنيش بعرف كيف الدنيا معي ومتعوده .. وبعدها عطول حطيت راسي ونمت ..~

؛

يوم الخميس مش متزكره اي ساعه صحيت , بس كان بالنسبه الي النهار منه من الايام الهاديه , لانو محدش اجى عندي عشان كان عيد التركي(الحبش) تبع الامركان , وخواتي بالعاده بطبخوا الحبش فيه , فكنت فيه بالصاله ع الكنبه وبشوف بافلام , بس بنفس الوكت كنت متنكده انو عليّا شغل , وكانت لسا الفلونزه فيّا , وكان كمان من الايام اللي نفسي مسّكره عالاكل .

المسا منه بالشغل كان من الايام النكده كتير عليا بحياتي , من ناحيه الشغل , وكمان من الليالي اللي صعبه نفسيه عليا , ليله عنجد ملكيتش حد , الشغل كان كتير صعب , والشغل هو الاشي بالوكت هاد اللي بخرّب مزاجي , واد نفسيتي عمى فهو السبب , محدش بنكدّ عليا الا الشغل , ولاني بشوف انو الشغل كل ليله اصعب من القبلها , وبشوف اني ما عملتش اشي من المصاري منه , وانو عالفاضي , بتنكّد اكتر , وبحكي لشو انا بشتغل ! لهيك عطول من العصبيه والسرعه بحكي بدي اترك الشغل هلكيت , بديش اشتغل وبدي اترك الشركه .

كعدت اسب واغلط وبصوت عالي من كتر ما كنت متنكده , لدرجه (فرجينا) لما شافت كيف نفسيتي , اعطتني بريك , وحكتلي خدي ساعه ارتاحي فيها , مع انه بعرف داخليا كديش صعب عليها تشتغل لحالها بهيك ليله , اخدت البريك , بالعاده بحب اطلع عند الباب الخلفي , في شباك بحب دايما افتحه واضل واكف اشم هوا , مش عارف اد انا اللي اتصلت ع امي او هي اللي اتصلت بالاول , بس صوتي معاها كان مخنوك , واول كلمتين معاها حكتلها بدي اترك الشغل , امي مرات بتعمل حالها ما سمعت , خاصه الحكي اللي بدهاش تسمعه , وكصه اني اترك الشغل اكيد بدهاش تسمعه , عاودت ارجعت عدت الحكي كمان مره , وهي بلّشت بالحكي اللي انا بعرفه واللي انا بحكيه لحالي لما بدّي اقنع حالي بالشغل وعشان ما اتركه , بعد ما حكت اول كلمتين من كلامها , عطول ارجعت عليها باني راح اترك الشغل وما تزعلي , حكتلي انتي حره وهلكيت اتصلي ع جينفر , حكتله طيب يلا سلام , وسكّرت الخط معاها .

واجيت اتصل ع حبي مسنجر , لما عبرت شوفت لسا دخوله من ايام , حكيت امبين لحد الان ما انحلت الكصه , او بحكي يمكن مسجون بس بدوش يحكي , لانو بالعاده بغيبش ايام زي هيك الا اد بالسجن , او بزيد من اللي باخده لهيك بضل نايم اغلب ايامه ولياليه , لهيك بعتله مسج ع الدّولي , ومسحت الجزء الاخير منها , وخليت الجزء الاول وهو كلمه واحده بس " وينك ؟" وكان الجزء الاخير هو " انا بكدر اغيب بس انت لأ " حكيت بديش اروح ابعتله الجزء الاخير احسّن ما انكَد عليه , بعد بحوالي ربع ساعه , لكيت منه مسج ع المسنجر , بس فيس , لهيك عطول افهمت انو لسا هو بمصيبه اكبر مليون مره من اللي انا فيه , لشو احكيله .

بعدين حكيت خليني اسال فد عن الكصه , بعتت الها مسج " صاحيه ؟" ما ردت عليا .

حكيت بعقلي عنجد يا مريم انو فش حد من اللي يفهموكي موجودين , ضليت بالشباك , وملان كصص تروح وتيجي , وطيف اهلي كدامي وهم الاشي الاول اللي يتأذى لو تركت الشغل , وكصه اني اكون تكيله ع حد لما اترك الشغل من مصروفي وكصصي ,بس بعاود طيفهم بيجي , وبعاود احكي اوعك تتركي الشغل , وكصه السياره وكصه اني بخاف , ضليت هيك حوالي ساعه وانا واكفه , ومكهوره وعيوني يرغرغوا , روحت غسلت وجهي وارجعت اساعد فرجينا بالشفت .

وانا اشتغل , اجى حد من اصحابي الكدام يحكي معي , كعدنا حوالي ساعتين واحنا نحكي , عنجد اني التهيت كتير وانا احكي معه واسمع كصصه , بطلت افكر بمشاكلي , ووكفت صفن وسرحان , بس بضحكوني اللي بيحكولي انو مش راح يتركوني , بفكروا انهم مهمين عندي , بعرفش ليش محدش مهم عندي , بعرفش ليش بأثرش عليّا اد ضلوا او اد راحوا .

؛

اجى صبح يوم الجمعه ... بحكي عنه بالايام الجايه ..~

؛

السلام عليكم ..~

اليوم هو الاربعا والساعه 7 ونص المسا || 11\28\18

كد ما بحاول اني اداوم عالمدونه بس معيش وكت , ومرات بتنكّد انو معيش وكت للمدونه لانو عنجد صارت روتين بحياتي , وروتين حلو , بتساعدني ع اطلّع كلشي جواي واريّح راسي من كلشي .

؛

وصلت ليوم الجمعه , وصرنا هينا الاربعا , والله اعلم شو انسى كصص , لانو كان اسبوع صعب , هو امتى بكونش اسبوع صعب ؟ او اسبوع مشغوله فيه ؟ او اسبوع الشغل عمى ؟ او اسبوع اتكاتل مع ايمان ؟ او اسبوع لا انام ولا اكل زي العالم والناس ؟ وكله والله عالفاضي !!

؛

الجمعه الصبح اطلعت من الشغل وبراسي كصه اتركه , وكان وجهي يكطع الرزق , يعني بوزي واصل مالطا , يعني زعلانه ومش شايف الفضى , يعني شايف الديك ارنب , ولما اكون متنكده بصرف مصاري من التفشش , ولانو البلاك فرايدي , في محلات كريبه ع شغلي راح تفتح بدري ع 7 الصبح , وانا اطلعت من شغلي ع 8 الصبح , روحت ع المحلات واشتريت كم غرض , بس اللي كهرني انو الاغراض اللي بدّي اياها ما لكيتها , واللي كهرني اكتر لكيت اللي بدي اياه بس ما لكيت مقاسات الي , واجيت عنجد بدي افكع اكتر , وكنت صحيح على تلفونات مع امي , عشان تشوف اد انا اتصلت ع جينفر عشان اترك الشغل , وانا لسا ما اتصلت ع جينفر لاني بعرفش شو بستنى عشان اتصل , وانتهت الكصه اني بديش اترك الشغل عشان بدي اشتري سياره , بعد ما خلصّت من المحلات وروحت ع موقف الباص , اجاني تلفون من اختي ايمان , وسألت اد انا بالدار عشان بدها تيجي عندي , حكتلها" لسا بنص البلد" وادخليا بحكي( ليش تتصل وشو بده يجيبها , بديش اشوف حد ) حكت وهي كمان بنص البلد , واتفكنا ع انه نتلاكى بمكان , اطلعت بالباص , وانزلت مكان مهي بتستنى , واجينا ع الدار , وكنت عنجد تعبانه ونعسانه وحاله , ضلّت عندي لوكت ما اجت عندي اختي اماني الظهر , لانو التنتين اجو الجمعه مشان يجيبوا من الطبيخ اللي عملوه الخميس , وبعدين اتسهلّت ايمان وضلت اماني , وكمان اجى اخوي تلات , ضلوا للعصر , وانا خلص بنشرّت ومعنديش اي طاكه افتح عيوني , وراسي بوجع غير شكل , فا حكتلهم " سامحوني بدي انسحب من الكعده واروح انام لانو عليا سهر " اماني حكت خلص بدها تروّح واخوي تلات بدها يرجع عالشغل , اتسهّلوا وانا حطيت راسي عالتخت ونمت , اصحيت بعد ساعه ونص , اكلت واشربت كهوه واتسلهت عالشغل , وكان لسا صوتي مش عبعضه ومهدوده , وكان شفت مع كارمليتا , وشفت صعب , ومش متزكر ايش صار كصص بالشفت ..~

اجى يوم السبت وكان عطلتي واخيرا , وكارمليتا عشان مكانش عليها شفت صباحي , هي اللي جابتني عالبيت بسيارتها وكتير وفرّت عليّا وكت , عبرت البيت وكانت نفسيتي شوي احسن عشان معطلّه , وكانت الدار بدها ترتيب , لهيك كان يوم التنظيف والغسيل وحاله , حوالي العصر اجاني تلفون من اخوي واحد , وسألني اد معي وكت نروح على معارض السيارات عشان اشوف سياره استريها , وكمان اسأل خواتي اد بيجوا معانا , وافكّت وبالاصل ما صدّكت لاني عنجد مش عارف اكعد بدون سياره , واتصلت ع خواتي , ايمان بتكدرش تيجي , واماني حكتلي بنتلاكى بالمعرض تبع السيارات , روحنا ع 4 معارض سيارات , وكديش سيارات عجبوني , ولو يصحلّي كنت بدي واحده ومكنتش متوقع سعرها هيك , لهيك بلشّت انزّل من طموحي بالسيارات , لهيك حكيت خليني اشوف سيارات تصنيف cuv , ومع هيك الاسعار نااار , اتحطمت بالمعارض , كد ما يحاولوا يعملوا سعر يناسب ولسا مش شايفه مناسب , ضلينا لبعد 9 بالليل , وبالاخر حكيت لاماني واخوي واحد انو اعطوني مجال افكّر , هم مش مع اني اشتري جديد عشان غاليات وارتباط كل شهر بمبلغ كبير , ومع هيك نفسي اشتري جديد من الشركه , ومع هيك هينا صرنا الاربعا وقررت اني ما اشتري جديد لانو السعر اللي بكدر عليه ع سيارات مش حلوه , وانا بدي سياره حلوه واكون مقتنع فيها, وغير انو الكل حكالي " عكلك عجنّب واحسن ما يطلّع وتروحي تتركي الشغل بلحظه وساعتها فش دفيعات للسياره وبتنسحب منك " وبعدين كانوا منزّلين سيارت 2019 ومش ضايل من سيارات 2018 محرزات , لهيك بدي استنى واشوف شو الزمن بيعمل براسي , بس طبعا زي ما حكيت اتحطمت لانو فش اشي زابط معي , وبحبش اتحطم وخاصه كصه خربان سياره اخوي اللي كنت استخدمها , خلتني اوصل الارض من الكهر , لهيك ضليت متنكده يوم السبت , ورميت حالي عالتخت بدون ما اشيل المكياج او حتى اغيّر الاوعي , حكيت مع امي لانها اتصلت وما طوّلت معاها وحكتلها بدك تعرفي اكتر احكي مع ابنك يا مع بنتك لاني بدي انام , بس معرفتش انام , كنت بس متمدده وفش لا ضو ولا صوت ولا بعمل اشي لوكت ما اغفيت , واصحيت حوالي ع 3 بالليل من تلفون من صوص , زمان مش حاكين تلفون , وحكيت معاها حوالي نص ساعه , وكان في كصص , وارجعت نمت ..~

؛

يوم الاحد كنت اصحى الصبح افتح البلفون اشوف امي مش متصله اطمّن وارجع انام , واصحيت حوالي ع 2 العصر , من زمان منا هيك نايمه , واصحيت ع تلفون من اخوي واحد بيحكي" ويني وليش بردش ع المسجات والكل بسأل وشغلت بالهم " وبالعاده بلغي التنبيهات , لهيك مكنتش اعرف انو حد ببعت مسجات ورسايل , ودايما بحكيلهم وبحكي للكل , في اشي مهم اتصل , لانو بلغي التنبيهات , المهم عبرت الجروب طمنّتهم , يمكن الكل شافني كديش مكهوره , وكان يومي لنفسي لانو محدش اجى عندي , والدار كانت نظيفه , وكانت عطّلتي انو فش شفت ليل عليا , وبين افلام ومسلسلات ومانغا وتلفونات مع امي ..~

؛

اجى يوم الاثنين الصبح , وكنت لسا متنكده عشان مكنتش عارف اشتري ولا ما اشتري سياره , وكيف الدنيا وكصصي معاها , وبكره اصحى الصبح اطلع عالشغل , باخد وكت لما اصحصح , انا مش شخص صباحي من مره ,وكان بوزي واصل لمالطا , حتى ما رتبت حالي , وسحبت حالي واطلعت عالشغل لانو كان عليا شفت صباحي , بالباص امي اتصلت عليا وحكتلها انا واكفه بالباص بحكي معك بعدين , اوصلت الشغل , وع ميعاد الترويحه اتصلت ايمان وحكتلي انها بتستناني ع باب الشغل , اطلعت من الشغل واطلعت مع ايمان وطلبت تاخدني ع مكان اشتري كم شغله , واتلاكينا مع اماني , افطرنا واشربنا كهوه , وع الترويحه اتكالت مع ايمان , اكيد يعني لازم نتكاتل , لاني بالأصل كنت مش طايك حالي , من اول ما شوفتها حكتلها ايمان اضلكيش تحكي الحك عليا , الله بضّل يختبرني وانا بضل اسقط , وحكي بلاوي , ومنيح انو اتكاتلنا كبل ما اتركهم, عشان ما اطوّل بالمقتل , واجيت عالدار وبدي اقتل حالي من كتر منا مكهوره , عبرت البيت , واجيت بدي اتمدد , والله هداني ونمت نص ساعه , واصحيت ع تلفون من اخوي واحد بيحكي انه جاي عندي , كعدنا وضله للعشا , اتسهل اخوي وانا جهزت حالي واطلعت عالشغل , وشفت عمى عمى عمى ..~

؛

اجى صبح التلاتا واطلعت من الشغل وكنت عنجد تعبانه اشي مش طبيعي , مش عارف اد اخدت الباص ولا الاوبر , بس اجيت عالبيت وكنت عنجد نعسانه , رميت حالي عالتخت , ونمت , وبعد حوالي ساعه اصحيت ع جرس الدار , برن وبرن وبرن , وانا كنت مش متاكده اد بحلم او صحيح , لوكت ما استوعبت انو صحيح , وكنت عارف انها ايمان , فتحتلها ورميت حالي ع الكنبه وبلشنا بحكي وحكي وانا معنديش طاكه احكي , وكتير من كلامها مش سامعه , ضلت عندي للظهر , وبعدين اتسلهت , وبعد بنص ساعه اجت اماني , ضلت للعصر وبعدين اتسهلت , وبعد بنص ساعه اجى اخوي واحد وضل للعشا وبعدها اتسهل , واجى بعدها اخوي تلات , وانا كنت اجهزّ حالي عشان بدي اطلع عالشغل , وشايف الديك ارنب , لا نايمه ولا ماكله ولا اشي , كان يوم مشغوله فيه غير شكل , واطلعت عالشغل واوصلت متأخره , وشفت عمى .. الله يخليلي اياهم لاخوتي واخواتي بس عنجد بشوف انو كل وكتي تبعي بكون معاهم , يعني نهاري معهم وليلي شغل وفش نوم زي العالم والناس , ومع هيك راح احكي سر , لما نكون مجتمعين واكون اضحك معهم , من جواي والله العظيم بحمّد ربنا كتير كتير على انه اطعمني هيك اهل وعلى اني معهم وعلى انه في اشي بالدنيا منيح وهو وجودهم حواليّا ..~

؛

واجى اليوم اللي هو الاربعا , والحمد لله الليله انا نايمه بالدار , اجيت عالبيت , وكانت الدار كايمه كاعده , افطرت واشربت كهوه , الا بدي ابلّش ارتب الا الجرس برن , وكانت ايمان , وبعد بساعه اجت اماني , وكلنا مجتمعين واتصلنا ع اهلي , وضلينا حوالي ساعتين عالتلفون زي كأنه امي وابوي معانا لانو في كصص كبيره , وحوالي العصر عنا , يعني نص الليل عند اهلي , هم اتسهلوا يناموا , وخواتي اتسهلوا , وانا بلشت حرث بالدار للمغرب , وبعدها اجى وكتي وهيني ..~

؛

صارت الساعه بدها تصير 10 بالليل وانا لسا بكتب , بين التلفونات اللي تيجي وانا اكتب , وبين العب مع ساده , وبين اصفن واسرح ..~

||..~

لما حد يجي يسأل مالك ؟ بديش احكي مالي ! لانو بعرف انو "معلّش وطوّل بالك "
؛
وغير انه بطّل أشي له طعم !! لا فلم ولا اغنيه ولا كتاب ولا شرب ولا اكل ولا نوم , ولا حتى اصحاب واهل .
؛
واد شوفتني بغلّط عحالي وبسب ما تيجي حضرتك تكمّلها وتسب عليّا , لاني بمون على حالي بس أنت لأ يا ابن الماما .
؛
وتستناش حد لانو محدّش جاي , واد انتي نسيتي كيف انا ما انسى , وانتي كنتي كلشي
؛
"انتي بتستاهلي حد احسن مني" انا معفنه وراضيا فيك
؛
وانساك منّي لاني مش منيحه ومتعوده اكمّلها لحياتي وانا مش منيحه

السلام عليكم ..~

اليوم هو السبت والساعه 9 واشي بالليل || بدايه اخر شهر بالسنه 2018 ..~

||

مش ضايل الا شهر وبندخل السنه الجديده واللي اتغير فيّا نفسيتي , كانت زفت صارت زفت بلس

؛

مفش اشي محرز صار معي خلال هاليومين , نفس الروتين تبع الشغل عمى , مريضه , وبتكاتل مع ايمان , كد ما حاولت اعصّر مخّي ايش صار يوم الخميس من مره مش متزكره , اد عملت اشي , اد شوفت حد , اد صار اشي , بس كان عليا شفت ليل ..~

؛

اما بالنسبه لمبارح الجمعه , بالشغل كنت كتير تعبانه ومريضه , وصبّحت مش كادره اتحرك , كان صايبني وجع راس مع وجع معده بخوف , وما عملت الكصص اللي بالعاده بعملها بالشغل وحكيت لكارمليتا انتي اعمليها انا مش كادره , وكارمليتا حضرتها ما عملتها , وهدا خلّانا ندخل بمشاكل بالشغل , وبعرف لما ندخل بمشاكل الكل بحكي فيهم "اللهم نفسي" , وحتى لو الحك عليها اكيد بترميه عليّا , معروف ! وغير انه (دون) ما بعملها وبرميها علينا , بس اكيد لانو بعرفنا انا وكارمليتا بنفسدش عنه , وهو بستنى اشي خفيف عشان يعمل مشكل عشان يترك الشغل ويتكاتل مع جينفر , وانا وكارملينا فاهمين عليه , لهيك بنضّل ساكتين عشان بدناش اياه الحيوان يترك جينفر اللي هي بتكون مرتُّه , في كل واحد برمي عالتاني , وانا تجنّب للمشاكل بعملها , ولانو بعرف جينفر بتدعمني بالمصاري , والمصاري عندي احسن منهم كلهم..~

ومن كتر التعب اخدت اوبر عالدار , مكدرتش امشي لاني بدوخ , وكل هالكصص صارت لانو كان اسابيع نفسيه معي , وانا بعرف جسدي باني لما اتعب نفسي هو بروح فيها وبمرض وبرتمّي بالتخت , لهيك صرت ما يهمني اشي بالدنيا , لا الناس , ولا الاصحاب , ولا اتأثر , بس بتيجي كصص بتخصّني انا وحياتي واهلي, ولما تيجي هاي الكصص , بتعوّض عن كلشي بهمتش لامره , لتوصل فيها ترميني بالارض من التفكير والهم والكهر , لهيك هدا الاسبوع من كتر الكهر والمشاكل اللي مرّت عليّا بالفتره الماضيه , امرضت , جسمي تعبان , ما بين اني بعيد عنكم بستفرغ وخبيّت هدا الاشي عن الكل لاني بديش حد يخاف عليا , ومعدتي بدهاش اكل , لهيك يالله يالله اكل وجبه بالنهار , وبين وجع الراس لدرجه بدوخ , وخاصه انو فش راحه لاني بشتغل شفتات الليل ..~

لما اوصلت البيت مكنتش متوقع انو ايمان تيجي عندي , مع اني بعرف انو يوم الجمعه بالعاده بتيجي , بس لانو زوجها مسافر والدنيا شتا وسكعه , حكيت ما اظنش , لهيك اوصلت البيت ورميت حالي عالتخت , ويالله كيف كل عضّله بجسمي بتوجع وبتضرّب عليّا , وصوت التلاجه اللي بسمعه براسي , وظهري اللي بخليني ما اكدرش اخد نفس طويل لاني كل ما اتنفس بوجع اشي بلاوي , واجريّا اللي تحتهم مخدّات عشان ارفعم ولسّا بضربوا عليّا , ما لحكّت اتمدد نص ساعه بالحرب مع حالي عشان اني اغفى وانام , الا جرس الدار برن , برن وبرن , ومفش حيل فيّا اكوم من التخت , ما اطلعّت افتح الباب , الا فش حد عند الباب , اطلعت برى ولكيت ايمان بتمشي بالشارع بعيد عن الدار , فكّرت اني مش بالدار لهيك رجعت عالسياره , ناديت عليا واجت عبرت عندي , واخوي بالليل كان طابخ لهيك المطبخ كايم كاعد , ولما اجت ايمان وبنتها الصغيره قلبت الدار غير شكل ,واجت اماني الظهر مع بناتها عندي , وضلوا للعصر , الدار عندي صارت زي الزباله , وعنجد بنكهر لما يوسخوا الدار ويكعدوا يتفلسفوا اني الدار مش مرتبه وهم واولادهم السبب , وحكتلهم انا بشتغل فوق 12 ساعه برى وبنامش , ومريضه , فش حيل اشتغل بالدار , عالفاضي بضّلوا يتفسلفوا .

وكان عليا شفت ليل مع فرجينا , وكد ما اخدت دوا من كل الانواع عشان اتحسّن , عالفاضي , وفرجينا انتبهت عليا , لانو معروف عني بشتغل كتير بالشغل واكتر منهم , لهيك الكل بحب يشتغل معي , لاني بساعدهم , لهيك لما امرض او اتعب الكل بساعد من جهته كمان انو بعطوني بريك , خلصنا الشغل صُبح السبت ,واطلعنا روحنّا مع بعض بالباص , وكنت بدي اخد اوبر لاني لسا تعبانه , بس لانو بدايه الشهر لازم احط الاجار تبع البيت في البنك , لهيك وصلت البنك وحطيت الاجار , واتحوجت شوي فطور وتسالي مشان اليوم عطلتي , لانو البنك والمول جمب بعض , وكنت اجرّ بحالي عالدار جر , لانو البنك كريب ع بيتي .

وبعتت مسج لخواتي اني كتير تعبانه بديش اطلع اليوم , اماني حكتلي بدها تيجي تطبخ , حكتلها خليها ليوم تاني , لاني عنجد فش فيا حيل , والدار كايمه كاعده بديش فلسفه وبديش يساعدوني فيها , لهيك اليوم السبت اول مره هيك بهمنيش امشي بالدار واشوفها كيف مش مرتبه ولا نظيفه , والجلّي اللي وين مكان بالمطبخ , لانو كمان حضرت اخوي طبخ الجمعه , يعني يومين ورى بعض طبيخ , والجمعه اللمّى اللي تسالي وكهوه وصغار يوكلوا ويوسخوا , ومع هيك بنفس الوكت مبسوطه انو في حد بطبّخلي حتى لو بوسّخ , بس اليوم مرضت عالاخر , يعني طول اليوم عالتخت بين النوم والاكل عشان الدوا والشرب , وبين المشاهده بس , ما عملتش ولا اشي واحد , حتى غرفتي اتعبّت جلّي , بهمنيش , ضليت عالتخت , وعنجد كنت اغفى وانا متابعه الافلام والمسلسلات , كديش حلو احساس انو الواحد يغفى بدون محاوله , والحمد لله انو فش عليا شغل الليل , لانو جينفر اتصلت الصبح وحكت اني اشتغل الليله , حكتلها اسال فرجينا وكارمليتا لاني مريضه , والحمد لله انها اعطتني عطله وهيني .

؛

شغلات جواي احكيها ..~

اليوم انتبهت انو الزياره زايده في المدونه , استغربت ! في حد بتابعني .؟ في حد بتعب حاله وبضّيع وكته وبقرأ وهو مش فاهم راسه من اجريه ؟ شو المميز ؟ كعدت هيك اسال حالي ! وحتى اكون صريحه اكتر معاكم ما اخدت دكيكتين وانا اسأل حالي , لانو بهمنيش يزيدوا , بهمنيش حد يتابعني , وبهمنيش تكونوا مناح معي , كل الكصه بالمدونه اطلع كلشي جواي , واعرف حالي اكتر , ومعنديش مشكل تنعرف حياتي الشخصيه لاي حد طالما بعرفوش , والله لا يبعت حد بعرفه يقرأ المدونه ,خاصه اني بحكي شغلات يمكن تجرح الناس اللي بحكي عنها لانو ربنا ببعتلي ناس حساسه , وبرجع بحكي عندكم الحريه تعملوا اللي انتو بدكم اياها في المدونه , وانا كمان عندي الحريه اكتب عن شو ما بدي ولنشوف الزمن وين بياخدنا ..~

؛

اتكالت يوم الجمعه مع ايمان , امتى بنتكاتلش , حاولت بس اخليّها تفهم اشي عني , وبعرفش اد فهمته , كد ما بحكيلها اني بصدكش الناس يا ايمان , اضلكيش تحكيلي انو فلان بده يصير وفلان بده يعمل , كل الناس بدها تصير وكل الناس بدها تعمل , بس مين اللي عنجد صار ومين اللي عنجد عمل اللي كان يحكيه ؟ ليش بتصدكي الناس لما تحكيلك انها بدها تصير ؟ انا بشتريش سمك بالبحر , ولو الحكي بمشي معي كان زمان ضحك عليا واحد بكلامه , جيبي حد صار وبعدين بصير حكي تاني ..~

؛

بخصوص السياره , اتفكت مع زوجها لاختي ايمان انو يعطيني سياره اختي , هو شخص بعرف بالسيارات وعنده سيارات , وعند اختي سيارتين , واحده جديده وواحده مستعمله كديمه , اتفكنا انو يعطيني الكديمه بمبلغ بسيط , او احكي براس المال مش راح ياخد مربح , بس يرجع من السفر , وهو عنده سيارات الكلاسيك الكديمه ينعن شكله ومش مخليّني ولا مره ادخلها , بالاصل مش مخلّي اختي تدّخلها , بخيل ! وعنده واحده بسيطه خفيفه بياخدها عالشغل , اليوم اختي بتتصل ع الجروب وبتحكيلنا انو سيارته الخفيفه مسروكه , ومش معروف شو صاير , اد حد من قرايبه مستعيرها , لحد الان مش معروف , بس اد راحت هالسياره , انا بكدرش اخد سياره اختي عشان هو راح يستخدم سيارتها التانيه , يعني كصه تنحل معي مشكله السياره ويصير عندي سياره مش زابطه ..~

؛



×

شكرا لكل حد وصل معي لهون ..~

بعرفش اد حطيتهم قبل هالمره ..~

؛



المساعده مش متوفره بالوكت هاد .

؛



ليش دايما صوتي مع الناس بفكروني بقاتل وبصرّخ ؟

؛



عشان ما تتفاجئ راح تطلع من مرحله زفت لمرحله ازفت !

؛



بتضحك بالنهار مع الناس وبتبكي بالليل لحالك ~

السلام عليكم ..~

اليوم هو الاحد والساعه هلكيت 9 واشي بالليل , 12\2\18

؛

امبارح الحمد لله نمت بالدار , واصحيت بدري وصحتي ممتازه الحمد لله , وطبعا الدار كانت كايمه كاعده , لهيك افطرت ورتبت الدار واشربت كهوه وبلشت بفلم الا اختي ايمان واخوي واحد بيتفكوا يجيوا عندي , واجو حوالي الظهر , اختي اماني كانت ماخده بنتها الصغيره على المستشفى عشان اجرها مصدوعه , وكانت اختي في المستشفى من الصبح والحمد لله طلعت الاصابه بسيطه , لهيك العصر اجت عنا , اجتمعنا وفتحنا سيره حبي مشان كان عيد ميلاده قبل يومين وكمان مشان امي وابوي بالوكت هاد عندهم بالاردن , كعدوا حوالي 3 ساعات , وبعد ما اتسهلوا بسرعه ارجعت رتبت الدار وجليت الجلي واجيت اكعد , الا اخوي تلات بيتصل وبحكي اد نطلع نتحوج , ووافكت , لهيك اجى اخدني واطلعنا اتحوجنا واجيت عالدار , حكيت مع امي وابوي بالبلفون وهيني ..~

بالعاده يوم الاحد بكون عطلتي مشان بيكون عليا صبح الاثنين شغل , ومن بكرا بتبلش النفسيه مشان ببلش الشغل , اد حد بيعرف بكميرات فوجي فيلم خبرني ! سألت حد من اصحابي وبيعرفه عنجد بيساعد وبيفهم , بس طلع بيعرفش اشي عنهم , وحكى بده يسألي ولحد الان مردّش خبر , ينعن شكله هو والحد اللي بده يسأل , ليش الناس مش ع موعدها ..~

؛



لاني صبيه عقلي دايما بوجع بحب احط ع الرزمانه تبعت الحيط غير الدفاتر شو مخططاتي بالشهر , وهاي الصوره شهر 9 وبدايته , وبحطّ رموز , زي مثلث , قلب , خطيّن, علامه المصاري وهيك كصص عشان محدش يفهم شو بكصد من خواتي .~

في دولارين على الشمال , كان حظ معي خلال شهر 8 .

بالنسبه للصوره تحت الرزمانه , هي صوره احدى ابواب البيوت في المغرب , اخدتها من (الينور) كنت اشتغل عندها , لما كنت ازورها في البيت كانت حاطه هاي الصوره من تصوريها لما راحت ع المغرب على حيط المطبخ , وكنت كل ما اكعد ع طاوله المطبخ اشوف الصوره وحبيتها خاصه انو في هر فيها , بس مش ظاهر هلكيت , لهيك مره طلبتها منها , وهي وافكت , مع انها عزيزه هالصوره عليها , بس طلع كل منيحي معاها واضح لدرجه تعطيني هيك صوره عزيزه عليها ..~

اما بالنسبه للفوق عاليمين في مداليات ومسبحه , المداليات من مرت اخوي اتنين لانو بتعرفني بحب المداليات وبتعرفني بحب كلشي فلسطيني , لهيك اشترتلي هدول ويالله من احلى المدالييات عندي لدرجه مش مستخدمهم من كتر ما انا خايف عليهم وحبيتهم , اما المسبحه فهي من مرت اخوي واحد لانو معروف عني بحب المسابح وهي علم فلسطين , مع اني بصراحه بكرهم وبحبهومش لنسوان اخوتي , ومع هيك لاني صبيه بتهمنيش الشغلات من مين طالما انا حالي بستفيد منها ..وحتى لو اجتني هدايا من اشخاص بحبهم وبعزّهم والهدايا ما حبيتها ولا بستفيد منها , فا انا يا برمي الهديه يا اما بعطيها لحد , لاني بصراحه بشوفش قيمه الها , بحكيلكم يا ربي ليش هيك صايره ؟بطّل اشي يهمني ومهم عندي , بطلت اهتم للبشر كلهم , بالاصل بكره لما بدي اجي اتعرف ع حد جديد او اتعامل مع حد , بكره الناس وبخاف منهم , لهيك بكره كصص الجيزه وكصص النفاق , شو اعمل ؟ منا بدي امشي بالدنيا وبنفعش امشي بدون هالناس لانهم راح يضلوا طول عمرهم حواليا , ولهيك اد حد بده يجيبلي هديه صار يسألني بالاول لاني عنجد بحكي بالزبط ايش بدي وهيك بنكون احنا الاتنين متفكين ..~

اما الشمال فهي مداليه دب عليها حرف حبي اجتني هديه من صبيه بشتغل معاها , والمسبحه السمرا من حبي من العُمره ومعاها اسواره محطوطه كانت في مفتاح السياره , صقالله يا سياره ..~

؛؛



هاي مداليه حنظله على خريطه فلسطين اجتني هديه من اختي ايمان لما اجت ع الضفه , ودايما محطوطه في البلفون معي ..~

؛؛



هدا بكيت دخان مع اخر سيجاره من اخوي واحد , حكتله يخلّي اخر سيجاره ويعطيني اياها مع البكيت , ولحد الان حاططهم منظر بغرفتي , عشان البكيت اسوّد , مع اني صارلي حوالي اسبوع بفكّر ارجع ادخن , بس بعرف كديش وجهي بيخرب وهدا هو السبب الوحيد المخليني ما ارجع ..~

؛؛



الحوش باب غرفتي ايام العز , ايام مكانت امي هون ودايما نكعد فيه نحكي ونشرب كهوه ..~

؛؛

ايش اشتريت ..~



سيروم وجه , زيت غير شكل , بستخدمه مرتين لتلات مرات بالاسبوع وعالاغلب لما انام بالدار , لانه زيت فَ بخلّي الوجه مزيّت ويلمع غير شكل , بشدّ الوجه وبيبيّض خاصه لما اغسّل وجهي بعده , بس بكره لونه وريحته , وما اظن اشتريه كمان مره لانه مش رهيب , بس المنيح فيه انو ما بزيد الحب الحراره عالوجه ..~ 22$ من الامازون

؛




جل مثبّت للحواجب , عشان عندي حاجب مشطوب من وانا صغيره , في شعر منه بضّلوا واكفين , لهيك بستخدم هاد وعنجد انه مثّبت منيح , يعني عاجبني وسعره كتير مرتب , اد بدك اشي خفيف طبيعي جدا بس يمشّط الحواجب ويخليهم مثبّتين على التمشيط عنجد انه رهيب ..~ 8 $ من الامازون

كصه الحاجب الشمال مشطوب عندي لاني وكعت وانا صغيره وكانت معي تمثال كزاز على شكل هر , اتعركلت في اجرين ابويا وانا صغيره حوالي عمري 4 او 5 سنين , لاني بتزكر لما اوكعت , وانكسرت الهره , واجى الكزاز حوالين عيوني وشطب حاجبي , والحمد لله , الحمد لله ما شطب عيني , وبتزكر كيف اجى ابوي عليا ركاض ويضغط على حاجبي مشان الدم بينزل , سبحان الله كيف الصغير بتزكر هيك شغلات ..~

؛



كل ما اجمّع النقاط من ابسي , بحب دايما استبدلهم في كريم للايدين , كتير بعشق كريم الايدين , وهدا نوع عنجد رهيب بانه عنجد بخفف الجفاف اللي حوالين الاظافر , بس بكره ريحته , بكهروني هان في ريحه الفانيلا , عنجد كلشي ريحته فانيلا , ريحه كويه , هي كريحه حلو زياده عن اللزوم عندي , بتقلب المعده ..~

||

اد بتلاحظوا شغلتين بحكيش عن حالي فيهم بالمدونه ,شو بعمل لاخرتي من العباده , والعنايه بحالي , الله يهديني اكتر ودايما لاني بشوف حالي بعيده عن ربنا , بس بنفس الوكت لما اعمل شغلات عشان اتقّرب من ربنا بحاول اكتم مشان اكسب ثواب اكتر , اما بخصوص العنايه , يمكن بشوفه خاص وبرتاحش احكي عنه , لهيك لما احكي عن مجريات ايامي بختصر العباده اللي بتمر بيومي , وبختصر العنايه اللي بتمر بيومي , بس بحكي عن الشغلات اللي بستخدمها في عنايتي , لاني صبيه بعشق العنايه لابعد حد ..~