مأساة روح {هالكه} في اوراق تائهه ~

السلام عليكم ...~

ليل التلاتاء || 12\28\2021

؛

بوعدكم بتحدي جديد , اجي اكتب في المدونه كل يوم لمده شهر وشوي , عاد الشوي الله اعلم يوم ولا اكتر . ليش بدي ارجع اعمل التحدي؟ مع اني انجنيت بزياده من التحدي الاول ! حياتي مليانه مجريات , كل يوم مطب او كل يوم اشي جديد بصير , ولما انوي اجي احكي عن حياتي وايامي , بنتوقف المجريات تصير معي وبتصير حياتي وايامي روتينه ممله وهاد اللي بدي اياه ..~

الاشي التاني هو اني كنت كاعده افتش في الصور اللي ع اللاب توب مشان اغير الخلفيات وين مكان (طبعا ما لكيت) , وشوفت صور عن كصص بيني وبين حبي ورجعت الدكريات وانتعست وخوفت اروح احكي معه وبديش احكي معه , وبديش يطلع عقلي وامسح الصور , لهيك اجيت ركاض هون (فش حد احكي معه)

مش راح احكي عن مجريات كديمه , مرات بوصل لمرحله مش متاكده اد حكيت عن الاشي ولا لأ في المدونه , اظن مع المجريات واليوميات الا ما يطلع اشي منهم ..~

||

ابلش احكي عن يومي ||~

اصحيت 2 ونص بالليل , عليا شغل , لكيت شغل بعد محاولات كتيره ولا اشي زبط الا هاد الشغل , شغل بمعاش بسيط وبارت تايم كمان , في محل بيبيع اواعي وادوات دار وكلشي عالاغلب , بشتغل كاشير ومحازن , لما كدمت ع الشغل كنت بدي المخازن , مشان بدري و فتح البضاعه وترتيبها وما اتعامل مع ناس , بس لما نخلص من البضاعه اللي بالمحازن , بتكون الساعه حوالي 9 الصبح , ف بطلبوني ع الكاش, شغل المحازن من ال 3 ونص الصبح لل 8ونص الصبح ومرات بتنزاد نص ساعه , حسب الشاحنه وكم كرتونه جايبه , طبعا الكل بخاف عليا مشان بطلع بدري من البيت, الحمد لله ربنا ما بزرع فيا هاد الخوف , كان ما اشتغلت وضليت عالدين , بس السواكه كتير حلوه والشوارع فاضيه ولما اشارات المرور نصها بكونوا موقفينهم موقت .

خلصت شغلي ع 9 وكنت ما مصدكه اروح ع البيت لاني بالليل ما نمت منيح , لسا بجهّز حالي مشان اسجل خروجي , الا المسؤوله ماري بتنادي عليا اني اضل بالشغل للظهر , ما حكيت لأ , لانو بدي مصاري , بس اندمت مع الوكت لانو اوصلت لمرحله اتعبت وراسي بده ينفجر , وما اكدرتش اكمل شغل , لانو صارت الساعه واحده الظهر , لهيط طلبت اني اروّح, وتركت ملان شغل على اللي وراي وهاد الاشي راح يعملي مشاكل بس ارجع ع الشغل , ممنوع تتركي الشغل لجد وراكي , لازم ترتبي وتنظفي اللي عملتيه وترجعي كل القطع مكانها , بس مع هيك بكرا معطله ,. اد بتلاحظوا بكل شغل بشتغل فيه بطلب يوم الاربعا اعطل فيه , لهيك فش تفكير الشغل .. في شغلات اتغيرت فيا من وكت ما روحت زياره ع الضفه وشوفت اهلي واصحابي , الحمد لله كتير مبسوطه عحالي , ومرات لما انجن شوي , بضل احكي لحالي ترجعيش لحالك الكديمه ترجعيش .

صابرين ع الحظ التعيس


اول ما اطلعت من الشغل الكل كاين يتصل عليا , اخوي واحد , بعتله ومسج واتصلت عليه ما ردش , اكيد المصلحه اللي بدو اياه مني راحت وكتها فلشو يحكي , اختي فيث اللي طنشت تلفونها , لاني تعبانه وفش فيا حيل اتحمل اي اشي من طرفها ,وغير اني زعلانه عليها شو عملت في شهيره , وبنات اختي هوبز اللي كعدوا يسالوا اد بنروح ع حديقه الحيوانات الخميس مش الاربعه, حكتلهم بكدرش واتفرشكت الروحه , وامي .. اللي ضليت احكي معها لوكت ما اوصلت البيت

||

ما اوصلت البيت مرت اخوي 3 كانت عامله اكل , وكنت ع لحم بطني , اكلت واتمددت عالتخت اشوف في هاوس كالعاده , ما شوفت الا رقم شايفه مش غريب عليا , بس ما رديت عليه ,. ووصلني مسج من الرقم وكانت جينفر , يالله جينفر اللي كنت اشغل معاها وكت ما كنت اشتغل شفتات ليل , بالاول اترردت احكي معاها , خوفت تكون كاليميروا حكتلها زمان اني بدور ع شغل , لاني من فتره حكيت مع كاليميورا اد كمان بتتزكروها كنت اشتغل معاها كتير , وانا داخليا بديش ارجع لهاد الشغل الكديم , بس هي ضلت تتصل وبعدين رديت عليها , وكان صوتها خجلانه , وحكتلي عن كصص شخصيه صايره معها وانها بحاجه مصاري , ربنا بعرف انو من وكت ما اجيت من الضفه وانا عايشه ع الدين الكرديت كارد لانو صرفت كل مصاري بالضفه ومش ندمانه , ومعيش كاش ولسا ما قبصت من شغلي , وبتعرفوا كل شهر عندي فواتير لازم ادفعها , من تامين سياره وفاتوره نتي وتلفوني , ومع هيك , مش راح اكدب عليكم , كان معي 700$ حاططهم ع جنب للزمن , ومش راضي اصيبهم واسد الدين تبعي , اليوم قررت انو تراكم بلاوي عليا بالكرديت كارد ولو ادفع دفعه , طولت المصاري وحطيتهم بالشنته مشان بكرا احطهم بالبنك , سبجان الله امبين طولتهم عشانها حكتلها بساعدك ب 600 , هي طلبت 1000$ والله لو معي بعطيها , الحمد لله ع هاي النعمه , حكتلي ماشي , لما اجت ع الدار عندي , اعطيتها 650$ وخليت معي 50 $..~

بعدها بلشت في تمارين مشان وجع ظهري ورقبتي , لانو ظهري مولّع , رقبتي صار يخف من وكت ما صرت اعمل تمارين في خشبه بحظها تحت رقبتي وبعمل تمارين فيها , وهيني ..~

بهاء سلطان .. ليالي طويله

الاختيارات الغلط بتعمل كصص حلوه P;

السلام عليكم ..~

ليل الاربعا 12\29\2021

2.1

||

ناسيه اي ساعه نمت امبارح , بس اصحيت قبل السبعه ع تلفون من الشغل , كانت ماري وكانت بدها اروح اشتغل مكان حد , اليوم عطلتي , ونفسيتي مش مستعده اني اروح اشتغل , لهيك حكتلها لأ , وحاولت ارجع انام معرفتش , لهيك ضليت بالتخت بين اصفن في برى عالحوش ع العصافير وبين البلفون , وبعدها كومت عملت فطور وكهوه , وكعدت افطر وانا اشوف بمسلسل كوميدي ! حكيت مع امي حوالي ساعه ..~

واتصلت ع هوبز اشوف اد زوجها اتسهل على الشغل ,حكتلي لأ وامبين مش راح يروح , في شويت اوضاع صعبه بالبيت عندهم ونفسي اروح اكون جنبها , بس اد زوجها غاد بديش , لانو الجو راح يكون متوتر لانو الكل بحكي داخليا مع حاله انو اللي بصير معاهم مني ..~

كان نفسي اخد مرت اخوي 3 ع مكان بس الدنيا الحمد لله ما وقفت مطر , ولما سالتها شوفت انو بدهاش تطلع بالمطر , حكيت بعقلي عملت اللي عليا , بس الجو شجعني انو اطلع اتمشى , لهيك اطلعت حوالي ساعه بالحاره ..~

صارت الدنيا مغرب , وصار ميعاد ساده يطلع برى ,حتى لو مطر بحب يطلع برى بالليل , وانا جهزت اموري عشان عليا شغل بدري , ونفظت غرفتي مسان لما التهي بالشغل بفظاش انظفها زي ما بدي ..~

عملت روتيني الليلي وهيني بشوف في هاوس ويا رب انام كم ساعه قبل ما اطلع عالشغل

مرات بتخاف تنبسط عشان بتعرف انو مؤقت

السلام عليكم ..~

1\26\2022 ليل الاربعا ..~

||

مش راح اوعدكم بتحديات لاني فاشله فيهم , والرهان اللي عملته االلي بالاصل ما بلّش مشان يخلص راح اعاقب حالي بصوره بالاسك مع الزمن بحطها ان شاء الله ..~

كديش بصوّر ايامي وباجي هان مشان احكيلكم عنها , بس عطول كلشي بطير من عقلي وببطل الي مزاج احكي واكتب , مرات بفكر احط السناب تبعي , بس بحكي مش ناكصني وجع راس ..~

اللي خلاني ابلش اكتب لانو كان يوم سيء وبالاصل اسبوع سيء ونفسيتي محطمه , مرات بحكي لحالي مشتاقه لفراشه تطير وترفرف بمعدتي , ومشتاقه لقلبي ليرف , كأني بستنى باحبال الهوى ليغير من مزاجي , وين الاصحاب اللي بحبو بكصصهم اللي مكنتش ازهك منها , ليش كلنا كبرنا وبطلنا..~

جاي عبالي شخص جديد

امي بتجنني بتلفونتها وبكصص الجيزه , في شب من فتره شوفته وما عجبني بس بنفس الوكت ما كرهته , امي بتجنني فيه اني اخده ارتبط فيه , بضل تحكيلي كبرتي ولازم تخلفي ومحدش لحد ومحدش دايم .. لنشوف شو بصير ؟! لشو النكد مش وكته .

||

نبلش بحالي , كبرت وصحتي مش منيحه , معدتي بضل تضرب عليا , لهيك انحرمت من اكتر ادمان بحبه اللي هو الكهوه , بضل اخد انواع دوا لمعدتي ع مزاجي بتساعد بس بدي دكتور وعليا موعدا لاسبوع الجاي وان شائ الله خير ..~

ظهري بوكفش وجع حتى مع دوا ودهون ومساج وبخليني بطيء بالشغل واكره ما عليا اكون بطيء كمان عملت موعد مع دكتور وان شاء الله خير ..~

ظاحونتي بتوجع بس بنسبه اكدر اتحملها بدون دوا , كل يوم بحكي بدي اعمل موعد وبنسى يا رب ما انسى عاد ..~

||

شغلي ..~

مبسوطه فيه , فش مصاري من مره , بس النفسيه بالشغل حلوه ومرتاحه ,دربوني ع كلشي الا شوي بالشغل , في شويت كره من اللي بشتغل معاهم مشان بخلوني اعمل شغلات هم ممنوعين يعملوها حتى لو هم اقدم مني بالشغل , ومع هيك مش مأثر عليا , ايش شغلي ؟

ببلش 3 ونص الصبح , من تنزيل الكراتين من الشاحنه في المحازن , طبعا احنا الصبايا ما بنزّل الكراتين , في السواق تبع الشاحنه مع شب بنشتغل معه اسمه رؤول , هم هدول بنزلوا الكراتين وبحطهم ع قشاط متحرك واحنا علينا نفتح الكراتين ونرتبهم في روفوف متحركه وبعد ما نخلص من كل الكراتين , بناخد الروفوف المحتركه ع المحل وبنلش نرتب كل اشي وين مكانه ..~

الصبايا اللي بشتغل معاهم كلهم نص شفت , ع التسعه الصبح بخلصوا شغلهم وبروحوا , بضل انا , كل كم يوم ببلش اعمل جرد للبضعه الكديمه , وببلش احط عليها اسعار ارخص , لوكت ما الكاش يصير عليه زحمه , بروح اساعد الناس ع الكاش للظهر , وبعدها بخلص شغل ..~

مرات بشتغلش كاش اد كان عليا كتير بضاعه كديمه بدها تخفيظ السعر , ومرات العكس اد في كتير زباين ع الكاش بروح اشتغل كاش , ومرات بتطلع كصص تانيه غير روتين شغلي , زي تغير ديكورات المحل او تزبيط وترتيب البضاعه خاصه لما اغيب يوم كلشي بنراكم عليا , ومرات بكون الحمد لله ملحّق ع كلشي بروّح بدري .


نحكي عن اللي بشتغل معاهم , في منهم رهيبات بالشغل , سريعات نار , بكون نفسي اكون زييهم سريعه, لسا بعرفش اساميهم لاني بنسى الاسامي ومش معطي اي حد لقب لانهم مش داخلين مزاجي , بالنسبه للشباب , بين كل الموظفين في 3 شباب وختيار بس , والباقي صبايا ,
راج احكي عن الناس اللي بشتغل معاهم , الشباب هم رؤول اللي بشتغل بالمحازن معانا وهو بشتغل عنجد كل الشغل الصعب , هو اسبنيولي وبعرف مكان كلشي في المحازن , الحلو فيه هو مسموحله لو حط سماعات ذنين , لهيك دايما هو بكون في حاله في باله وما بسأل عن كل الحكي اللي بصير بالمحازن ,بس كل ما بدي اساله اشي لازم يشيل السماعه , بحب اشتغل معاه كتير لانو دايما بساعدني بدون ما اسال وبشوفه بده يساعدني , عاد نشوف مع الزمن راح يضل منيح ولا شو ؟

الصبايا كلنا اربعه ومش كل يوم بنجي احنا الاربعه نشتغل , بس صار حكي انو يا ريت لو نضل احنا الاربعه كل ما يكون في شاحنه عشان نساعد بعض وطبعا رؤول معانا , في العاده خمس ايام بالاسبوع بتيجي الشاجنه وكل ما بتيجي بكون فيها من 200 الى 300 كرتونه كبار , فيهم كلشي وعلينا نفتح ونفرز كلشي .

في شب تاني اسمه شو اسمه شو اسمه , ديرك , هاد الشب بالعاده بشتغل آمن ع الباب بس بنفس الوكت بشتغل كلشي , يعني كنت اشتغل معه في تخفيظ اسعار الاغراض , وكاشير كمان , ويالله كديش احب اشتغل معاه لانو سريع نار , يا عمي شب , ايام الضغظ ع الكاشير , يخلوني انا وهو ديرك بس اتنين ع الكاش بس عشان هو نار نكدر نلّحق بعض , وايام تغير اسعار وتخفيظها كمان احس انو زي كأنوا بنلعب مع بعض سباق مين راح يكون اسرع . ودايما مبتسم معي


في كمان صبايا تحت ايد المديره , يالله شو ساعدوني اتعلم , اعرفت كل اللي بشتغلوا من الصبج لحدود الساعه 5 المغرب , ولانو في ايام اشتغل للمغرب , مين بشتغل فتح كراتين الملابس ورانا , تنتين رهيبات بنضل نلعب لعب تنكيز بعض , ولما يكون معي وكت بحب اساعدهم في الملابس , ومين بفتح كراتين الاحذيه بعيد عنكم ورانا , صبيه بتكونش بحاجه اي مساعده بالاحذيه , ومين بشتغل في غرف غيار الملابس , معاها المرض العاطل الله يشفي الجميع يا رب , مرات كمان بساعدها .

اه صحيح في صبيه اسبنيوليه , بتحكيش انجيليزي من مره , بس بتساعدني في الرفوف المتحركه لانو شفتها بالنص , ع السبعه الصبح ببلش, ومع هيك هالصبيه بحب اشوفها , لانو ربنا لما يخلق الجمال , عندها شكل القلب , يا ريت محدش يكون فهم .

||

بدكم احكي عن حبي , زمان مش حاكي عنه الجحش , اللي صار مش انزلت ع الضفه وروحت عالاردن بس ما حكتله اني نازله, انزلت وما شوفته ,بتصدكوا , خطوتين من عنده وما شوفته , لاني حيوانه , يبي كديش اشي صعب , اد صعب عليا انا اللي قلبي حجر , كيف هو اللي كتله احاسيس , كديش امي حكتلي اني اروح اشوف , مكدرتش ! مكدرنش ! او اكون صريحه هون كمان بديش اشوفه , لانو راح اتحطم , ولانو راح ارجع لنفس كصه اول سفر لهون وشو صار , كان بده يمزع جواز السفر ولولا خليت اخوي واحد يدّخل بالكصه زمان , لهيك ما روحت اشوفه لانو م كادر اروح اشوفه واتركه , خوفت من حالي اني ما اتركه هالمره .

طيب اللي صار لما ارجعت هون , اهلي كانوا بالاردن , وامي ضلت تطلب مني اني احكي معه لانو وضعه مش عبعض , ضليت اكزب ع امي واحكيلها بديش احكي معه , بس بنفس اليوم اصحيت لكيت مسج منه عالواتس , ولا عمره المسج بتغيّر "كيف حالك؟" , مكانش الي عين احكي معه , كنت كتير خجلانه انو احكي معه وانا كنت بعيده خطوتين عنه وما شوفته ولا حتى حكتله اني نازله , متعود عليا اني مش راح اتخابث ولا اكزب عليه , واد بسأل اي سوال بحكيله الجواب ع بلاطه حتى لو جارح الجواب , بتزكر حكتله اول اشي خلينا نحكي تلفون وحكتله من اولها انو مليش عين احكي معك وبلشنا نحكي من المغرب لتاني يم الصبح لل 7 او اكثر شوي , وهاد الاشي من شهرين , قبل ما اشتغل , وبعد ما خلصنا التلفون نمت , اصحيت مسج منه نفس الجمله اللي بتطلعلي بكل مكان في خياتي , في الافلام والمسلسلات اللي بشوفها حتى في الكتب والمانغا اللي بقراها والي هي " ليش م انا ؟" واتكاتلنا هههههه , وحكالي بالزبط شو راح يكون تصرفي , وبالزبط عملت التصرف اللي حكاه ومكدرتش ما اعمله عشان اطلعه انو غلطان والتكهن تبعه مش صحيح , وخلص من وكتها متحاربين , احسن

اهلي ..~

امي وابوي الله يعطيهم الصحكه والعافيه بدهم اياني انزل اصوم رمضان عندهم , ايوى هههه ما صدقت اني ادخل هان عشان اعاود اغامر كمان مره , هو نفسي والله , بس الله اعلم كلشي بايد ربنا

خواتي ..~

الله يهونها بس يا رب , مراض وازواجهم مراض ومطارده في المستشفيات وخوف وقلق , الصحه صعبه ..
بنت اختي كانت خاطبه وهليكت هي وياه مشاكل وبدهم يتركوا وحاله حزن وحسرة علينا كلنا , مع انو انا كعدت مع الشب خطيبها وما عجبني , بس ما حكيتش اشي , هاد اللي ناكص بدون هالواسطه خواتي بكرهوني وبحكولي عشاني كنت مرتبطه وانفضلت , بناتهم بدهم يعملو متلي وانو اللي بصير فيهم مني , لهيك ما حكيت لاي حد الشب مش منيح , وهيه تركوا , بضلوا يحكولي بشكل عام اني بشوف كل الناس مش مناح وانو بعطيش فرص للناس , بس مش هيك الكصه , الكصه انو الحياه بترمي كدامك ناس ومع السنين بتصير تعرف مين بكدب ومين بحكي الصدك ويمكن حتى ما تعرف , بس بضل تجارب بتعطي لو نسبه قليله تعرف الشخص من كلامه , وتعرفه من تصرفه , يا سيدي ان شاء الله ربنا بعوضها وبعوضني عن كريب .

السلام عليكم ..~

ليل الجمعه || 1\28\2022 ..~

||

صور من حياتي بيوم من ايام الجمعه



بصحى حوالي 2 او 2 ونص الصبح

|



بعمل فطور سريع خبز ولبنه مع كاسه شاي لاني بفتره بشربش كهوه

|

ببلش اجهز حالي وانا اكل واشرب الشاي



فش لبس محدد للشغل , الا البجامات اللي معبيه الحزانه عندي الللي ممنوع البسها بالشغل



كلشي فضه بلبسه في ايام الشغل في المخازن بوكعوا مني بالشغل وبضيعوا , صاير ضايعلي 3 وكلهم من المفضلين , بس اوصلت لمرحله ما ازعل من جواي



سيروم وكريم للوجه , الكريم كتير عاجبني , بعطي لمعه ع وجهي بتخفف من شكل اللي صاحي من النوم



سيروم للشعر بخفف من الفريز وبحب مشط الخشب كتير



هاد العطر كتير بكرهه , لهيك منزلته للشغل , ريحته قويه وبتقتل , بنخنك من ريحته



مكياجي اللي هو نفسه من اول ما بلشت احط مكياج بجياتي , ايام المدرسه , بحب الخط الاخضر او الازرق او الاحمر حسب المزاج تحت عيني مع مسكارا تطويل ورفع وكحله بيضا, ومن فتره حبيت هاد الايلاينر اللحمي اللي بعمل بس دنب صغير فيه ما بيظهر اني حاطه ايلانير بس بحلّي العين ,بحاول اتجنب الكحله البيضا بالشغل البدري .بس بتيجي ايام بغيّر من مكياجي حسب .



باخد شنتي وجكيت الليفايز اللي كان حملي من وانا صغيره يكون عندي واحد متله , كان عند اخوي واحد متله , وكنت اضل احكي لحالي امتى اكبر مشان اشتري متله , هو والبستار الاصفر تيمبلاند ,وربنا حقق هالاجلام اللي مش مصدك حالي انو كاين عندي احلام وتحققت



بس قبل ما اطلع من الدار , لازم اضوي ضوء للورد اللي عندي واقوي من ماكنه الرطوبه , وهدول شغلات اسمعت حكي وفلسفه من خواتي , انو كيف بضّيع مصاري عشان ورد وكل هالحكي وانو اد بفكر هيك معناتن بفكرش بالجيزه ولازم افكر بالجيزه مش بالورد , حتى المتعه من شغلات بسيطه زي هيك بعملوها نكد , وبضل احكي الكل بدوه اياني ع هواه هو , هواي انا ممنوع , بحلموا .

||

فش صور بالطريك ع الشغل , لانو اللي بتزكره , من اولها حكيت تلفون مع امي واسمعت اخبار مش منيحه من مره وفوك كل هاد لسا قبل ما اعبر السياره انقطمت شنتي ووكعت هي والاغراض اللي فيها بالشارع باالليل وحاله , وانا اسوك كمان واحد بده يقتل حاله واكف بنص الشارع والاشارات خضرا , لولا ربنا ستر وابعدت السياره ولا كان صار في خبر كان

||

وكمان بشغلي ممنوع تصوير المخازن او شغلات لانو في كميرات وين مكان وبديش انفصل من الشغل , لهيك ما صورت الا لما اطلعت من شغلي وعبرت سيارتي , وسيارتي صوتها مش عاجبني الله يستر

||



هاد المحل اللي بشغل فيه



واشتريت شنته من المكان اللي بشتغل فيه , مش زوكي ولليوم مش عاجبتني بس فش مجال بهاد الوكت

||



لونها كحلي وجيبت حجم وسط مشان تدخل في حزانه الشغل

||



كنت جعانه , لهيك عملت ساندوش مع سيريا

||



بجبش المكياج يضل ع وجهي وانا بالدار وخاصه لما اتوضى , بضل خايفه ما يجوز الوضوء خاصه اد كانت ماسكارا ضد المي , وعشان بضل لابسعه قناع ع وجهي لازم اغسل وجهي , لهيك بستخدم هدول , ماسكار خصوصا عشان تزيل الماسكارا وغسول لوجهي ومزيل مكياج

||



عشان وجهي ما ينشف بحب احط اشي عليه , وحطيت زيت للحبوب , اللي مرات بحبه ومرات بكرهه لانو يا بنفع يا بزيد

||



لانو الجمعه من احب الشغلات اعملها هي الكهف , والحمد لله ربنا هاديني اني كل جمعه اقرأها , وبدي اسكّر 3 سنين ويا رب طوال العمر .

||



عملت كاسه شاي , والصوف هاد مرت اخوي تلات عملتي واحده للكاسه وكديش مبسوط عليها

||



كنت طالب من امازون فلاشه لانو بضلني بفتره كآبه وبدي اشوف هاوس وحضرت اللاب توب بكعد فوك الساعه ليشتغل وبضل يطفي وكرف , لهيك مش مستعده الساعه اللي بدي اشوف فيها حلقه اعبر في هيك كصص , لهيك بضلوا بالفلاشه وكل ما بدي اشوف بشبكها

||



الاكل كان بايت من اليوم القبّله مكلوبه ع لحمه





||

الشوق والاشتياق



الغروب دايما بزكرني بامي , لهيك بحب اطلع اكعد ع العتبه مشان اشوفه

||



العشا كان خبز شراك ملفوف فيه لحمه ومشوي

||



بلعب هاللعبه تاونشيب من فتره ومرات بدفع مصاري حقيقه ينعن ابو شكلهم


||



يوم طويل ع البلفون ع اللعب بس ولاني النوع اللي ما بخلّي البلفون يقفل لحاله , او عامل الشاشه تطفي , لهيك بضل مضوي بدون ما اعمل عليه اشي


وهيك حكيت عن يوم ويعطيني الف عافيه

||

اليوم شغل بدري بس خلصت بدري كمان , مش عارف اد لازم افكر بالكصه هاي ولا شو ؟! من امتى بتحكي انت , وتطلعيتك ما عجبتني كمان , ومع هيك كل ما تيجي عيوني بعيونك ببتسم لاني مسكتك , بس انا لشو بدي اوصل , كله حكي فاضي صح ؟! بس حلو المتعه لانو حتى وانا احكي عن الكصه مبتسمه , تنسيش الواقع يا مير ! راح اشوفك الاسبوع الجاي فكرك ؟اليوم لما شوفتك ما اكدرتش اصبّح عليك لانو محدش عمل , بس وانا جنبك بعقلي صبّحت عليك , من وين اطلعتلي , زكرتني بهداك اللي لليوم بيجي عبالي مع الابواب والكهوه , الدنيا بتبعتهم مشان تاخدهم , ونكعد بحسرات , ينعن شكلكم واحد واحد ..~

السلام عليكم ..~

ليل الاحد 1\30\2022 ..~

||

صور من يوم ميلادي 31 كان امبارح , اكبرت

||



كان يوم عطله واسهرت بالليل قبله , والغرفه مكركبه

||



روتين الصبح

||



الجو كان منيح

||



الفطور , بحب اكل طمر ع معده فاضيه او عسل




||

اجهز حالي :~



احب اقنعه عندي لوجهي , بنوّر وبشد الوجه لهيك وجهي بكون مرتاح اغلب النهار من هاد القناع

||



والقناع ع وجهي بنفس الوكت بعمل شعري

||



بصراحه عندي يكل خزانتي 3 جينيز , 2 ليفايز من سنين عندي وهاد اشتريته السنه الماضي مايكل كورس وهو اغلى جينز اشتريته , بلبسه الا بالايام اللي بعرف اني مش راح اشتغل لا بالدار ولا عندي خواتي لاني بخاف عليه .

||

نيجي للفضه :~



اول اربعه من اليمين للشمال
الخنصر .. مكتوب عليه (فلسطينيه) اشتريته لما كنت بالضفه .
البنصر .. الابيض هديه من فد صاحبتي , سألتني شو بدي هديه , طلبت فضه وكٌتب منها , لهيك اخدتني ع محل فضه واخترت هاد الخاتم .
الوسطى ..الخزره البنفسجيه من مرت اخوي 3 , كمان هديه منها
السبابه .. الرابع هاد من زمان اشرتيته قبل ما اجي ع امريكا من عشر سنين ولما خرب خبيته عشان اصلّحه والحمد لله صلّحته وبحب هالخاتم كتير لاني بحب المصاري وهو ربع ليره فضه

هدول الاربعه طوال ما انا بالضفه وانا لابستهم وهون كل ما اطلع من البيت وعارفه مش راح احوس وضامن مش راح يوكعوا بلبسهم كتير .

اللي ورى دبله دهب في الخنصر اشتريتها من هون وبحب البسها ع خاتم دهب اللي في البنصر اظن انو من امي او من اختي هوبز والتالت بحبه لانة شكله متل العيون ولانو شو انا

||

شو بلبس فضه في رقبتي :~



اسمي وهاد هديه من مرت اخوي تلات كمان

وشجره الزيتون عليها علم مع فلسطين تحتها اشتريتها وانا بالضفه

اه ضيعت بلاوي مصاري ع الفضه لما زورت الضفه , روحت كل محلات الفضه في رام الله وانعرفت, وكل حد بده يهديني هديه تكون بين هالاربعه شغلات (الاكل .. يا يطبخلي يا يعزمني ع مطعم | الفضّه يشتريلي | كُتب | بيجامات )

||

نيجي للمكياج :~



تنتد اللي هو بعرفش بشوفه زي فانديشن خفيف او سي سي كريم , يعني بعطي طبقه طبيعه ع الوجه



كالعاده نفس المكياج

كحله بيضا جوى العين لتوسعها
ايلانير ذهبي فوك العين
دنبه صغيره لون لحمي
خط اخصر تحت العين
مسكارا




والعطر كان توري بورش


||

اتوكلت ع الله واتسهلت ع المشاوير اللي عليا



الحمد لله شو حلو لما اكون صافف السياره جنب البيت , البيت الزهري

||

اول مكان ..~



روحت ع مشتل خصوص للورد , بعيد عن البيت وغالي الورد اللي عندهم , بس بنفس الوكت بعرف انو بكون جديد كل يوم بيجيوه , السبب بدي ورد عشان زوج هوبز كان بالمشتفى وكعد خمس ايام وكنا ع اعصابنها بس الحمد لله ربنا كبير وكريم وصار احسن وطلع من المستشفى

وكمان زوج اختي فيث مرض بس الله سلّمه الحمد لله

؛







اشتربت لكل واحد ضمّه من النوع اللي في انواع ورد صبّار لاني بحب ورد الصبّار وبعرف انو بدوم بالبيت كتير , ما حبيتش اجيب جوري شوفته بكون رومنسي وما بيلبك ..~


||

مشوار التاني :~

صارلي زمان مش شايف الصغار (اولاد خواتي) وبعرفهم كديش بحبو الدونتس , ما حبيتش اعبر ع البيت عندهم مش حامل اشي الهم






||

المشوار التالت :~

لانو ميلادي حبيت اطعمي الكل كيك , وهالسنه الكل كان عارف عن يوم ميلادي لانو شهيره حكت للكل



معرفتش شو اجيب كيك لانو اد الشكل حلو النكهه محدش بحبها , يا بطلع جزر يا فانيلا , لهيك اخترت كيك نكهه شكلاطه وعليه فراوله .



عشان عيد الحب شوفت هاد اصلح اشي من نكهه ومن شكل

||

بعدها روحت عندي اختي فيث بالاول وسملت ع الجميع وانزلت بعدها عند هوبز وضليت عندهم وطولت وانا مع زوجها , وبعدها اجت فيث عنا وضلينا للمغرب

||

قبل ما ارجع عالدار اجى عبالي بوريتو , لهيك ميلت اشتريت اكل






||

سيارتي بحكيلكم صوتها مش عاجبني وبتحمى , لهيك اول ما صفيت السياره بالحاره عنا دخنّت ههههه , مااحلاها سيارتي بميلادي يا ربي انحرق الماطور , دخن الماطور, دايما بشيّك عليها من زيت ومي وما بشّغل المكيف لانو بعرفها حساسه




عاودت شغتلها ما طلع دخان من الماطور , بس مع هيك خايفه لهيك بكرا , ان شاء الله راخ اخدها ع المحل اللي عنا بالحاره ويا رب يكون مشكلتها بسيطه وبدهاش مصاري كثير .

||

ولما عبرت الدار كنت شوي متنكده عشان السياره , بس الحمد لله صايره اتأقلم اكتر مع المصايب هيك بحكي لحالي , ما شوفت الا جاي بريد وكان زياده في اجار الدار , اخ يا ربي شو كصه اصحاب الدار والمسؤوله عن الدار مع الجوع تبعهم بزياده في اجار الدار كل سنه , حسبي الله عليهم

||

طيب عبرت الدار وجهزت حالي لأريح اعصابي , وطلّعت ساده بره ع ميعاده , وجهزت حالي لانو اليوم كان عليا شغل ولولا الاحد وكل محلات تصليح السياره مسكرين ولا كان روحت شوفت السياره ابدى , المهم نمت وركنت ع ساده لانو بعرف ميعاده اي ساعه بيجي , اصحيت ع الميعاد وساده مش جاي , بنادي عليه مش جاي , حكيت مش مشكل بتأخر ساعه , اصحيت بعد بساعه كمان لسا مش جاي , اعطيت حالي فرصه عشان ما انجن, ارجعت نمت واصحيت بعد نص الليل وساده مش جاي , صرت احكي لحالي يعني سيارتي خربت والاجار تبع البيت زاد وامبين نهايتها انو ساده ضاع بنص هالليل , وصابني الارق والاستنظار , بعدين حكيت بينفعش هيك مريم , اطلعت ع الحوش انادي وانادي وهو مش جاي , اتحطمت وكتها , ارجعت ع غرفتي و ميه فكره وفكره شو صار بساده , بتعرفوا كيف الخيال والتوسوس اللي بصير , بعد ال 2 الا حضرته شرّف ساده , كنت بمرحله مهدوده من التفكير فش حيل اقاتل عليه واصرّخ , اعطيته حضن ورميته عالارض وانا ارتميت ع التحت نايمه .

||

اما اليوم الاحد شغلي طوال النهار كاشير , ما شوفتش حد , بس لمره بعمل سكرين شوت لمسجات اليوم بيني وبين خواتي وبناتهم مشان 49 فطبول امريكي سانفراسيسكو خسر اليوم

السلام عليكم ..~

||

2\3\2022 من مغرب يوم الخميس

قبل كم يوم جوز اختي هوبز دخل المستشفى عشان قلبه وعملوله عمليه وكنا بفتره الله لا يورجيها لاي احد , ولولا ربنا لطف والحمد لله ستر , الممرضه حكتلنا هاي اخر مره بتشوفه , ومحدش بيتخيل اللي كنا فيه , الحمد لله ان ربنا لطف وصار احسن .

||

صور من حياتي الله اعلم تاريخ الايام ..~

ابلش في الحوش :~





امبين انو عندي خلند بالحوش , تحت شجره الخوخ , لحد الان ما شوفته بس كل يوم بيطلعلي تراب من بيته

||








السنه الماضيه هاد العنكبوت مر من حنبي وهو صغير وانا كاعده ع الدرج تبع الحوش , بقتلش العناكب , كان لونه دهبي , بعد بفتره صرت اشوف بيت عنكبوت صغير ع شجره الخوخ , وبعد فتره شوفت صار اكبر واكبر , بعدين انزلت ع الضفه زياره ولما ارجعت لسا كان موجود نفس المكان وصار كبير , كنت كتير مبسوطه عليه , كل حد يجي عندي ويطلع ع الحوش , يبلشو يحكوا اقتليه ولشو مخلياه وكل هالحكي , بس خليته وما رديت عحد لوكت ما دخلنا بالشتا والمطر القوي , اختفى , اختفى مع" تساقط ورق الشجر "

||

احكي عن ساده :~

من فتره اشتريته هاي الشجره لساده



كانت صغيره ومكانش مبسوط عليها , اطرّيت احط حرامات عليها ليرتاح , وبعدين حكيت شو بدي بقله العقل , عاودت اشتريت واحده تانيه



وما لكيت لون يعجبني , ف اخدت الرمادي



وبحب احط شرشف عليها عشان اسهل للغسيل , لانو كل فتره بحب اغسل الشرشف تبع ساده

||

نحكي عن الضفه , مش كتير صوّرت وانا بالضفه , لاني حبيت استمتعت بكل دكيكه من حياتي غاد , واد في كم صوره ف بكونوا كتير شخصي بالتسبه الي لاحتفظ فيهم , ومع هيك بدي احكي عن كم شغله ..~




فد اخدتني ع مطعم اسمه صُوفي برام الله , كديش انبسطنا غاد

||



صاحب ابوي مكان شغله بطّل ع دوار للساعه في رام الله , كنا كل ما نطلع انا وابوي عرام الله ومعانا شويت وكت نروح نكعد عنده نشرب كهوه , زلمه محترم وبعرفوا بعض من زماان


||



هاد وحيد , ربنا بعتلي اياه وانا بالضفه , اه سميته وحيد لانو ملوش حد , امبين عليه انو كان ضايع عن امه وكان صغير ويضل يماوي , بس الحمد لله درت بالي عليه وكنت اطعميه واخبيّه بالليل مشان في كلاب , واول ما يطلع اذان الصبح , اصحى واطلعه من المكان اللي مخبيته (, في عنا غساله بالحوش , كنت اخبيه جوى الغساله , ) واطعميه مشان يرجع ينام ما يكعد يماوي , كان مفجوع , يضل ياكل لدرجه امي ابوي حكولي اضلكيش اطعميه لينفجر بطنه , اهلي ما خلوني ادّخله جوى البيت , لانو حكولي بدناش يتعود ع انه يدخل الدار وانتي مسافره , ضليت معاه لمده شهر , بعدها ارجعت هون ,, لما اهلي رجعوا ع الضفه من الاردن , سالت امي كيف وحيد , وحكتلها اد منيح خبريني واد لأ ما تحكيلي اشي , وما حكتلي اشي , معناتن مات .


||

اخر شي وهو سطح بيت اهلي



بالصدفه اخدت هالصوره . بالعاده بالليل بعد نص الليل وكت ما كل اهلي يناموا , كنت اعملي فنجان كهوه واخده اطلع اشربه ع السطح , ليش كنت استنى الليل . لانو زي ما حكيت مكنتش احب اضيع اي وكت بدون ما اكون مع اهلي وجنبهم وحواليهم , وغير انو بالليل مستور محدش بشوفني , كعدت ايام طويله اطلع ومحدش من اهلي بيعرف , كنت كتير مبسوطه لما الهوا يخبط وجهي , ولما اسمع اصوات الناس وضحكهم , مره صحيت امي بالليل , وما لكتني بالدار , ضلت تستنى فيا , لما انزلت , بتحكيلي شو كاينه عند اخوكي ؟ حكتلها لا عالسطح , ويالله شو استغربت , كيف تطلعي بالليل بتخافيش , ومتزكره شو صار مع ابن الجيران , مش ناكصني اكعد اتحسر عليكي , وكعدت تحلفني انو ما اطلع بالليل . ابن الجيرن اتصاوب بس ربنا ستر , اللي بصير مرات بالليل طخ احنا ساكنين قراب ع اللي ما يتسمو وملهومش امان

السلام عليكم ..~


يوم الاخد تاريخ 2\6\2022 ..~

||

جمعه وسبت كانوا من الايام اللي كتير انعجكت فيها , وما صدكت يجي الاحد لاكعد بالدار وارتاح , بالاول اطمنكم عن سياراتي , الحمد لله كانت المشكله بسيطه , وهي تبع الزيت كان يسرّب زيت ولما تسخن السياره ينحرق الزيت ويطلع دخان , كنت اعرف من زمان بس صارت تسرّب وتهرّب زيت اكتر وفي خوف انو يمكن توّلع السياره لا سمح الله لهيك لازم اغيّرها .

الصوره الجديده :~



الصوره الكديمه :~




||

عندي من فتره طويله كحه بدون سبب , من اشهر , لهيك لما روحت ع الدكتور طلب انو اعمل تصوير اكس راي لصدري احتياط لانو مش عارفين شو سبب الكحه , واعطاني دوا للجيوب الانفيه لنشوف اد بنفع الدوا , وان شاء الله ما يطلع اشي بالتصوير .

المستشفى اللي روحت عليه بيحكوله مستشفى جينرال في سانفراسيسكوا






من احلى الشغلات فيه انو مش بحاجه تعمل موعد للاكس راي وفش عالم كتير فيه




||

كان ع مرت اخوي تلات ميعاد دكتور ولانها لسا جديده بامريكا بدها مساعده , كلنا كنا جداد وما نعرف اشي اول ما اجينا , اخدتها وطلبت ادخل معاها مشان اترجملها , مع انو لليوم في مصلطلحات تمريض واسماء لليوم ما بعرفها



وبعدها كمان طلبوا انها تاخد التعطيم التالت



||

الشغلات اللي خلصتها :~



هاي الشمعه ناسيه اسمها وكانت ريحتها منيحه , بس مش مفضله , بس اتعلمت انو اشتري شمع غالي شوي لانو عنجد بطوّل عندي وما بدوب بسرعه , هيني هلكيت بفتره بحث ع شمعه محرزه

||



من فكتوريا سيكرت بحب عطر او مرطب الجسم منهم خاصه لما يعملوا عروض وتخفظيات , بس هالريحه كديش كرهتتها , لانو فيها ريجه جوز الهند مع فانيلا , وبحبش الجهتين , لهيك كنت استخدمها زي معطر للجو او معطر للملابس , اي مكان بدي تكون ريحه ومش مهم اد ما بحببها .

||



اخر شي الماسكارا , بحب الماسكارا كتير , وبحب اجرب اي نوع بوكع تحت ايدي , لليوم بفضل دايما من بينفت او مايك اب فوريفر , بس بنفس الوكت لازم اجرب ..

لهيك خلصت هدول التلات انواع :~
florence by mills , اول مره بجربها , بس كتير عجبتني , بتعمل تكثيب للرموش , وما بتكتّل او بتشبّك الرموش مع بعض , وطريّه ع الرموش , وما بتكّ تحت العين او تسحل . بس نحكي مش ثابته كتير , يعني حد اقصى مع الحركه والتعب 6 ساعات . وسهوله تنشال من العين

item lash snack هاي كتير حبيتها لانو الفرشاه تبعتها من المفضلات عندي , لاني بفضّل تطويل الرموش مش الكثافه , وهاد النوع كان يطوّل ويفصل الرموش بطريقه طبيعيه عن بعض , كتير استخدمتها بشغلي لانو بتظهر اني مش حاطط ماسكارا , طبعيه لتطويل الرموش , طريه عالرموش وسهل تنشال , بس من مره مش ثابته , يعني ساعتين او تلات ساعات بالكتير .


benefit the real هاي مفضله عندي من اول ما اكتشفتها , بطوّل وبترفع الرموش وثابته 12 ساعه , بستخدمها دايما في الايام اللي بعرف بدي يضّلوا رموشي واكفين , مشكلتها انو تكيله ع الرموش لهيك مش بشكل يومي استخدمها , وبتنشّف الرموش وبصيروا كتير قاسيين , وبدك وكت لتشيليها من الرموش , مع كل هالشغلات , بس بحب استخدمها لانها بتوّسع العين .

السلام عليكم ..~

ليل الاربعا 2\9\2022 ..~

هاليومين كديش شوفتهم طوال عليا , بأخد صور باول اليوم وبعدها بلتهي وبنسى , او العكس بصحى وبتكون شوي وراحت عليا نومه و لهيك يالله يالله وبرجع عالبيت تعبانه ..~

يوم الاثنين اصحيت متأخره وركاض ركاض عالشغل ع 3 ونص الصبح , ما اطلعت من الدار وعوايدي اتصل ع امي بالطريك , وبتحكيلي انو ستك (الجده) انجلطت ومريضه , اللي هي بتكون ام امي , انا بحبهاش لستي لانها مش حنونه بس بحكيش لحد هاد بيني وبينكم , ومع هيك الدنيا دواره لهيك ما في احلى من الدعاء في نيه , الله يشفيها عن كريب ! بس امي زعلانه اكيد مهي امها وانا ازعلت ع زعل امي , بعرف لخمه .

اوصلت الشغل متاخره كم دكيكه , بس ما شوفتش رؤول جاي , لا حول ولا قوه الا بالله , اد رؤول مش هان يعني راح نأكل عمى بالشغل , خاصه انا , بلشنا شغل وكل واحده فينا بوزها في طلوزه , لسا الحمد لله كلنا ع بغض 4 صبايا والمديره اسمها فينسا مع سواق الشاحنه .

فينسا اشتغلت مع السواق , والصبايا التلات اشتغلنا ع فتح الكراتين وترتيبهم , وانا خلتني فينسا اشتغل وين مكان , مره معاها مره مع البنات , حتى خلتني اعمل فحص بعيد عنكم عمال النظافه لازم الواحد بشرف عليهم خصوصا لما بدهم يرمو الزباله بالحاويات مشان نتأكد ما رمو اشي من الاغراض او من القفول وهيك كصص , وحتى خلتني افتح واقفل البواب لاي حد بيجي عالشغل وهاد عليه مسؤوليه , اتعبت ليوم التعب .

بعدين خلصنا من نص الكراتين , ضل النص التاني اللي هو شو بعمل رؤول فيهم لانهم عفش يعني كنابايات وخزاين ولوحات وتركيب , بس لانو مش هان , والصبايا اللي بشتغل معاهم خلص شفتهم وما بقدروا يشتغلوا اكتر لانو عليهم شغل بمكان تاني , ضليت انا مع صبايا بلش ميعاد شفتهم , منهم صاحبه شكل القلب .

طوال وانا بالشغل وفينيسا تحكي " بدي اقتل رؤول , كيف ما يجي , كيف ما يتصل ويخبر انو بدوش يجي " بعدها بلشت بالكراتين في شغلات تركيبها معقد شوي , وكنت بطبئه وانا اعمل فيهم , ولا حد بيعرف كيف بيتركبوا الا رؤول وفي شغلات تكيله بس شكل القلب ساعدتني لو اشي بسيط بس ساعدتني , وكانت فينيسا بدها اياني اشتغل اكتر من 8 ساعات بس على مرت اخوي تلات ميعاد دكتور كمان مره ولازم اخدها ,

خلصت شغلي واحده وكانت اختي فيث تتصل بدها اطلع معها , فكي عني , حكتلها بدي اخد مرت اخوي ع ميعادها ليوم تاني , ارجعت عالبيت اخدت مرت اخوي عالميعاد وطولنا , بعدها ارجعت المغرب ع البيت , وكنت جد جسمي تعبان بس الحمد لله ..

||

بالنسبه ليوم التلاتاء , كمان راحت عليا نومه , ركاض حتى فطوري بالسياره , اوصلت متأخره ورؤول مش غاد , وكانت هالمره مساعده المديره اللي هي ماري , وحكتلي رؤول مش راح يجي لانو سيده (جده) اتوفى , وكاتي كمان مش جايه يالله , هاي كاتي بتشتغل عن عشره كديش بحب وجودها لانها سريعه وبتنجز وبتعلم كتير منها , كنا اربعه مع سواق الشاحنه , ماري وسواق الشاحنه , وانا زي اليوم اللي قبله ماري خلتني اعمل كلشي , بدهم اياني اتعلم ع كلشي , والصبايا فتح الكراتين , وماري طلبت اتأخر بالشغل , وزي اللي قبله بالزبط بس كان شوي اسهل لاني في شغلات مرت عليا مش اول مره , كل كراتين العفش . خلصت شغلي ع الوحده وحكيت خليني ارتاح مع الطلعه مع خواتي كل مره بضل يحكوا بدنا خصم الشغل تبعك وانت بتطلعيش , لهيك حكتلهم يجيو ع المحل محل ما بشتغل ع ميعاد ترويحتي وضليت معاهم ساعه , شوي اجيت بدي اتكاتل مع هوبز . بد ما خلصوا حواجه وما صدكت ارجع عالبيت .

كان عليا كصه طويله بالدار وهاي الكصه بتنكد عليا , ضليت كم ساعه اعمل فيها وما خلصتها لانو مضلش فيا حيل اعمل اي اشي , وبعدها اجاني تلفون من اخوي واحد , علاقتي معه من مره صايره , هو بدكم الصراحه علاقتي مع الكل صايره هيك , اظن بطلت اسمع كلام امي وهو اد بسمع كلام من اخوتي او خواتي اضل ساكته , كانت اضل تحكي اد الاول بحكي التاني بضل ساكت , المهم فتح كصه مش لازم يفتحها , وحكتله انا مليش دخل , صار يحكي من امتى ؟ حكتله من فتره . وزعل وسكر الخط وراح .

||

اليوم كمان راحت عليا نومه , ما صدكتش حالي لما اصحيت وشوفت كم الساعه ؟! كم مره بوكع بالغلط اخ بس محدش يصحيني خاصه لما اطفي المنبه , فطوري بالسياره وركاض عالشغل , بس اوصلت عالميعاد الحمدلله , وشوفت رؤول , كان نفسي احكيله متأسف ع خسارتك , بس بحاول بجياتي اخلى الشغل شغل وما ادّخل في حياتهم وما احكي معاهم كتير , كنت داخليا مرتاحه انو اجى يشتغل , والااحلى نفس سواق الشاحنه لازم اسال عن اسمه , والااحلى كل الصبايا موجودات , بس احلى اشي لما فينسا طلبت مني اشتغل مع رؤول والسواق تبع الشاحنه , احلى اشي اشتغل مع رؤول لانه سريع نار ولانه بساعدني بدون ما احكي , دايما بعطيني حلول سهله وببخلي الشغل اسهل عليا , كان متفاجئ اني اتعلمت باليومين اللي غاب فيهم عن شغله , بس هاي اول مره بتخليني ع نفس الكشاط تبعه ومعاه , بالتوفيك بالترقيه تبعتك ()

خلصت شغلي الظهر ونص الصبايا مش راح يجيو يشتغلوا بكرا اخ بس , وانا كمان بدي اطلع بدري عشان عليا ميعاد دكتور , يعني الله يستر من بكرا , لأ واللي صار كمان اليوم , انسيت انو اليوم الاربعا وانسيت في تنظيف الشوارع , ولا ببالي وخاصه لما شفت انو الشوارع معبيه سيارات , صح شوفت الناس بالشارع وبسيارتهم والحاره معجوكه , بس خلص نصيب انو لازم اخسر مصاري , وصفيت السياره واجيت عالبيت ولا ببالي , بعد بخمس دكايك اسمعت صوت سياره التنظيف ؟! حكيت لاااااا مستحيل كاين الاربعا اليوم ولسا مش منظفين الشارع , اطلعت اشوف سياراتي يا حبيبي يا حلاوه , قبل ما اوصل سيارتي وانا امشي في سياره حمرا وراي امبين انو صاحبها ناسي نفس الشي , شوفت التكت معلّك ع سيارته , بس ما شوفتش واحد ع سيارتي , حكيت بعقلي امبين انو بس معطينه التكت وساحبين عسيارتي , وبعدها بلشت اضحك مع حالي انو شو هالهبل اللي بتحكيه يا مير , وانا احكي مع حالي اوصلت السياره وشوفت التكت تبعي , حكيت الله يستر اكم ., بالعاده فوك الميه ومرات ميه وخمسين واكتر , بس بعرفش لما شوفت انو 84 انبسطت بتصدكوا ؟

في عندي كم صوره من اليوم بحطهم بعدين ..~

السلام علييكم ..~

ليل السبت 2\12\2022 ..~

||

امبين بلشت اتعلّق بالحبال من اول وجديد , راح اشتاك هالاسبوع راح يكون طويل , مهو السبب !

.~

نرجع لايام الاسبوع , الخميس ,كان عليا موعد سحب دم عشان صحتي بدهم يتأكدو اد في اشي فيا وكان ع صيام الفحص , لهيك عشان بعرفهم بالشغل صعب اد جدفينا غاب , لهيك طلبت من فانيسا انواد اجي عالشغل بس اطلع بدري مشان موعدي ع 9 , لهيك اطلعت من شغلي ع 8 لانو شغلي في واد ومكان فحص الدم في واد تاني , شغلي في الدلي ستي وفحص الدم في سانفراسيسكو , اطلعت من شغلي بسرعه بسرعه واجيت ع الدار لانو مكان فحص الدم فش تصف السياره ملغي عشان عاملين في الموقف خيم لللتطعيم , لهيك صفيت السياره وسحبت حالي روحت في الباص , اوصلت ع الميعاد بالزبط , وعملت سحب الدم وارجعت ع البيت , بعرفش شو صار بس قليل جدا جدا انام في النهار بحياتي , بس ما شفت حالي الا نايمه وانا معيش خبر , الحمد لله محدش اتصل عليا ولا اصحيت ع اي صوت , نمت , حوالي ساعتبن , اصحيت شفت ساده نايم جنبي , ساده من النوع التقيل وبحبش ينام جنبي , بنام حواليا بس بعيد عني او عالشجره تبعته , بس ينام جنبي لأ , الا بمرات بكون فيها مريضه , ف استغربت نايم جنبي .
مش متزكر شو صار بعدها باليوم .

الجمعه اصحيت بدري بدري كتير , لهيك افطرت ع راحتي ولعبّت ساده وجهزت حالي عالشغل ع 3 ونص الصبح , اوصلت الشغل قبل الميعاد, شوفت سياره انجيلا اللي بشتغل معاها , وسياره ماري المساعده , وكلنا انزلنا ودخلنا الشغل , كعدنا نحكي انا وانجيلا انو امبين رؤول مش راح يجي اليوم ولا حتى كاتي , بس سيلفيا اتصلت وحكت مش راح تكدر تيجي , يعني بس انا وانحيلا اليوم ؟! كانت مفكعا معانا ومكهورات ونضحك بنفس الوكت , ما مر شويت وكت الا رؤول اجى , اووه انبسطنا , بعدين بلشنا الشغل الا ما شفنا كاتي جايه وكديش انبسطنا وفقدنا الامل انها تيجي لانها من النوع اللي ما بيتأخر من مره , هاي اول مره كاتي بتيجي متأحره , اسمعت طراطيش حكي انو الاسبوع الجاي رؤول مش راح يجي عاالشغل لانو عليه تدريب بمكان تاني عشان ترقيته , ضليت مش متأكده من هالحكي , اول ما صار الوكت اللي خلصنا وانجزنا شغل كتير , حكيت بدي اروح اسأله , لانو بصراحه بحب تواجد رؤول بالشغل لانو بساعدنا وبنجز معانا كتير وبعرف كلشي , وانو يغيب اسبوع يعني انا راح اشتغل مكانه وراح اتعب , روحت اساله وحكى راح يغيب اسبوع عشان تدريبه , اتمنيتله التوفيك وتركته , هاد الاسبوع يعني فش حد يساعدني ويقرأ عقلي وكت ما اكون بدي مساعده مش راح الاكيه جنبي , تبا , بس بنفس الوكت مش منيح الكرك عليه , خليه يتوفك بالتدريب وبعاود يرجع .

اتاخرت فل شفت يوم الجمعه , لانو مش راح اعمل روتين الجمعه , وارجعت ع البيت عملت حمله ترتيب الغرفه لانو صارلي فتره مش مرتبها , واجى المغرب وطلعت ساده برى , وبعرفش كيف نمت وما عملت اي اشي من روتين ليل او اي اي اشي , بس كل ما اغفى يجيني تلفون , فش حد الا اتصل عليا , احكي التلفون وارجع انام ..~

||

اما اليوم السبت :~




بكون ساده يطلّع ع العصافير اللي برى ويستنى مشان اطلعه برى

||



||


فطوري :~



اخوي اشتري امبارح بوريتو بس كنت نايمه لهيك افطرت ع نصه

(بوريتو ‏ هو نوع من المأكولات المكسيكية، والذي يتكون بشكل رئيسي من تورتيللا ملفوفة بشكل أسطواني لتحتوي ما بداخلها، والتي هي على خلاف التاكو الذي يبقى عادة مفتوحاً. تكون الحشوة عادة من اللحم أو الأرز أو الفاصولياء مع الصلصلة أو الأفوكادو والجبن وتتنوع الأحجام وأنواع الحشوة بحسب المنطقة)

||

اليوم يوم المشاوير :~



شو البست اليوم ؟



||

ع وجهي :~




تونر , سيروم , كريم وجه


||



قناع بالعاده بحطه تحت قناع التم لما اروح الشغل مشان الحساسه اللي بتطلعلي من قناع التم , بس لاني اليوم بديش احط قناع كامل ع وجهي لاني لسا باكل وبشرب , لهيك حطيت هاد الفناع لانو حتى لو حركت تمي بضل ثابت , وحطيت قناع للعيون


||




واقي شمس لانو الدنيا اليوم كانت كتير شوب وانا بحبش التان عليا



||

ميكاجي



يمين للشمال :~
هايلايت اضاءه كريمي
غلاس نود لحمي احب نوع عندي
مسكارا
ايلانير لحمي
ايشادوا ازرق حط تحت العين

|



اليوم ما طلعتش بسيارتي , اجت اختي اخدتني من داري , بعدها روحنا ع دارها ناخد اولادها عشان يطلعوا معانا



||

روحنا ع اكتر محل اختي فيث بتحبه




وول مارت (شركة وول مارت ‏ هي شركة أمريكية متعددة الجنسيات للبيع بالتجزئة تدير سلسلة من محلات السوبر ماركت ومتاجر الخصم ومتاجر البقالات، ويقع مقرها الرئيسي في بنتونفيل أركنساس، تأسست الشركة رسمياً في 31 أكتوبر 1969، وكان مؤسسها هو سام والتون، تمتلك الشركة وتدير مستودعات سامز كلوب للبيع بالتجزئ)

||



اشترت شويت اغراض لانو كلشي كان غالي ع اختي

||

بعدها وصلتني عند اختي هوبز , وانا ضليت عند هوبز وهي رحعت ع بيتها , وبعد ما خلصت اللي عليها فيث عاودت نزلت هي وبناتها عند هوبز , واجى اخوي واحد ومرته عند هوبز , اسهرنا , وكبل شوي الكل روّح ع بيته


||

بغ سام
جاوبيني

السلام عليكم ..~

ليل السبت || 2\19\2022 يوم عطله ..~

مليش نفس احكي عن اسبوعي , يمكن لانو كان ممل جدا بالشغل , وتعب جسدي بحت , طول الاسبوع الماضي من الاثنين للجمعه , شغل من التلات ونص الصبح لل 12 الظهر , اول شي مكنتش اشبع نوم من مره , ومعدتي كانت متعباني طوال االسبوع لحد هلكيت , وروؤل مكانش يشتغل ولا يوم فيه لانو كان في تدريب بمحل تاني , لهيك كنت اشتغل كل شغل رؤول وكديش اشتكت لرؤول , اضل احكي مع حالي وينه وينه امتى بده يجي , طلع هو الوحيد اللي جد جد بيساعدني بدون ما اسأله حتى , بس من تطليعه بيعرف انو بدي مساعده , حتى مرات اكون اعمل بالشغله ولسا بفكر كيف بدي اعملها ولما يشوفيني هيك بيجي عطول يساعدني , امتى يجي الوكت اللي نشتغل مع بعض , يبي ما احلى الحياه لما ربنا يبعتلنا ناس فيها يفهموا علينا ويساعدونا ويسهلوا الحياه علينا , هو بسهل الشغل عليا بوجوده .~

ومع هيك شوفته مرتين بالاسبوع , كان يجي كأنه بعد تدريبه , مكنتش اعرف ليش كان يجي , ومكنتش اسأل , مره اجى كبل ما اخلص شغل بشوي , وكانوا كلهم مجتمعين بمكتب فانيسا , كل المساعدين اللي تحت ايدها وهو معاهم , وكان وجهه من مره مش عبعضه . بالعاده كبل ما اخلص شغل بحب اروح ع فانيسا اخبرها بالزبط ايش عملت وايش ما عملت , فا لما روحت ع مكتبها وشوفتهم كلهم مجتمعين وشوفت كيف وحه رؤول , حكيت انسي يا بنت بترجعي بعدين , بالزبط بعد ما الكل تفرّق ارجعت ع فانبسا وخبرتها عن شغلي .

ومره كانت الدنيا لسا بدري وكنت بدي اخد البريك تبعي , س قبلها وانا اشتغل واساعد فانبسا اجاها تلفون منه وكانوا يحكوا عن الشغل والتدريب, بس ما اهتميت شو بيحكو , مع انها هي كانت كاصده تحط ع السبيكير مشان اسمع , بس معنديش الفضول وبحبش ادّخل , المهم لما روحت ع غرفه الاستراحه مريت من جنب مكتب فانيسا وشوفته عندها بالمكتب ف صبحت عليه , حكتله صباح الخير رؤول , حكي hey! وبعرفش ليش كان ع وجه مستغرب ؟! مرات بكون نفسي اعرف شو بعقله لانو جامد بحت وبحكيش , بس لما احكي معه بيحكي .. ومع هيك لشو تعب الراس صح , شو ما كان بعقله يكون مليش دخل , طالما حد يساعدني ..~

بعيد عن انو رؤول مكانش طول هاد الاسبوع , كمان البنات التلات اللي بشتغل معاهم , كل يوم واخده فيهم تغيب , مره انجيلا ومره سلفيا ومره كاتي , والاطكع كمان السواق غاب يومين واجى واحد طاكع بداله , والاطكع كمان انو كانوا يجيو كراتين بلاوي وعفش بلاوي , يعني كان اسبوع بالنسبه الي وفانيسا اسبوع متعب واسبوع الحظ مكانش لصالحنا , لاني كنت اساعد فانيسا , لانو بالعاده كانوا رؤول وفانيسا , فا صرت اساعد فانيسا , واساعد البناات واعمل العفش , الكل اللي بشتغلوا معانا بالمحل بس ع شغلات تاني , يجيو يجكوا واو مريم في كتير عفش . واللي مش بحظ فانبسا انو اللي تحت ايديها اللي هي ماري وهي واحده عربيه ومنيحه معي , ما اجت طوال الاسبوع لانو الاسبوع الماضي وكعت وظهرها لسا بيوجع , بس مع هيك مشينا بالاسبوع بعد ما انهدينا ..~

||

بالنسبه لحياتي بعيد عن الشغل :~

فش اشي جديد , اتكاتلت مع اخوي واحد ومع اهلي , وعم اكبر ولسا مش متجوزه ولا مخلفه , امبين راح اعاود ارجع التطبيق وارجع للكصص الفاضيه , لا تفكري بحن قلبي بيوم


||


غزل
مشيني