مأساة روح {هالكه} في اوراق تائهه ~

اييش , زمان ما القمر بان ... تعبااانه ومشغوله وحاله .. ومع هيك راح اجي اكتب !! مفش شغلات مهمه .. خليني اروح ازبط الجو وهيني جايه ..~

اييش من جديد , عفكره الوكت بمشي بسرعه , خليني امشي بالعكس من اليوم التلاتاء ليوم السبت الماضي واشوف شو بتزرك كصص , بس عالاكيد راح انسى بلاوي .

الثلاثاء بالليل , من شوي حكيت مع امي لان اتصلت عليا المغرب وكنت لسا مليش كتير عابره البيت وتعبانه انو احكي , حكتلها ( يما برجعلك , خليني ارتاح شوي ) المهم هلكيت ما حكينا كتير لانو حكينا الظهر عندي حكي بلاوي , وكمان حطيت قناع ع وجهي لانو بلش يطلعلي حب ع وجهي لان جسمي تعبان ولما اتعب ببلش يطلعلي , اشربت ميراميه وكعدت مع اخوتي وخاصه تلات لانه اجى من الشغل من شوي وغير انه الي 5 ليالي بشوفهش منيح عشاني بشتغل بالليل , وبلشت اعيد من مسلسل انجل لاني اشتريت السديهات تبعاته وقررت اليوم افتحه , اشتريته ب 140$ , عندي مشكله بالسديهات اللي بشتريها اني بفتحهاش بحب اخليها منظر , زي سيدهات مسلسلي المفصل هاوس , المهم بلشت اشوف فيه وشبكت الديفيدي ع البروجكتر وما زبط الصوت وكعدت 5 دكايك اجرب لوكت ما فكدت الامل فا روحت انادي اخوي واحد وبسرعه ورجاني شو الحل !! لما ارجعت من الشغل شوفت اخوي واحد فاتح السياره وببعبش فيها ويبي انا شو بحب مكانيكي السيارات او اي شي بخص السيارات وتصلحيها , عطول بلشت ابعبش معه واحب ما عليا اتشحبر وغير اني بحب ريحه البنزين , ضلينا حوالي ساعه واحنا نجرب كصص فيها وانا اتعلم شغلات كمان , بغد ما خلصت شغلي روحت اجيب صندوق الامازون للبروجكتر تبع اخوي , كنت بالشغل بارت تايم اليوم من الظهر للعصر , اتعبت بشغلي والمشكله معي انو لزكه الظهر طلعت وظهري لسا بيوجع , بالطريك عالشغل حكيت مع امي وكتير حكي وكصص والمشكله بعرفش اني اهدّي امي لاني بعرفش اكون خياليه او اعطي امل لهيك صعب مرات عليا اكون النور لامي , بسمعلها بس بنفس الوكت بكون كلامي واقعي زياده عن اللزوم ,افطرت كبل ما اطلع عالشغل واشربت شاي لان معدتي كانت كتير متوتره عشان كنت سهرانه بالليل وما اشربت كهوه وبطريكي عالشغل اشتريت كهوه لان بعرفش يوم يكون بدون كهوه , اصحيت ع 10 الصبح ونمت ع 7 الصبح , ارجعت من شغلي شفت الليل , وامبارح بصراحه خفت بالشغل , صارت كصه هيك التمست منها , وامي حكتلي لازم تسمي تاني مره .

حكتلكم مجريات الثلاثاء ريفيرس .. بالعكس من الليل للصبح , اهم شي باليوم انو بدي انام بالدار وبتختي ,, يب شو عزيز عليا هالتخت لاني بنام فيه بس ليلتين !

ابلش عادي .. يوم الاثنين 17\2\10

كنت سهرانه شفت ليل , واجاني شفت نهار 9 ونص لل 12 , ومعه كمان شفت ليل , ولما قرأت المسج طنشته لاني كنت تعبانه ,كان هدا البارت تايم شغل خفيف حلو, بس كنت مخلصه الاكل اللي معي وضليت جعانه وما اشربت كهوه فا يم كانت نفسيتي بالارض , وخاصه المسج تبع شفت الليل الطوارئ , الا جين بتتصل وغصبتني عالشعل , وانا اتصلت وسألت خواتي اد بدهم يجيو عندي , ما بكدروا لانهم اجو يوم الاحد عالدار وانا كنت بالشغل , وحتى اختي هوبز عملتلي رز بخليب لاني طلبت منها , الله يخليها اولادها يا رب ويهديهم , خلصت الشغل وارجعت عالبيت , وانبسطت ع الرز بالحليب , ومع اني كنت تعبانه ومش نايمه من ليلتها بس مع هيك كانت معي طاقه , روحت نظفت الفريزر وطبخت وغسلت ورتبت البيت , الا اجى الليل وجهزت حالي لشغل الليل , واكتشفت قناه بتجيب سانفيلد وبغ بانع , فا بكون اشوفهم واضحك وانا مكهوره وتعبانه .

يوم الاحد بكون من الايام اللي جد بتعب فيها لان بكون ليله السبت شغل وصبحيه الاحد شغل وليله الاحد , وصبحيه الاتنين ,, فا يم بكون ماكله روح الخل ,بالاصل بشتغرب من حالي اني بكدر اتحمل , الكهوه هي السبب بتخليني امشي .. فا كان اغلب الاسبوع شفتات ليل من الخميس للاثنين ,, بيجي معه شفتات نهار كصيره , بنامش الا بالنهار بين ساعتين وتلات ومرات بكعد يومين كاملين بدون ولاساعه نوم ,, هدا سبب اني بضل احط اقنعه وجهه ,لان الكريمات اللي عندي الدكتوره منعتني اي شي مش جيل احطه ع وجهي , وحتى جلسات الليزر منعتها , وخاصه عشان باخد بدوا فا حكتلي كله بيتفاعل .

خليني اورجيكم كم صوره عندي .

يوم السبت 17\30\9

طلبت النكهات اللي بحبها , اللي هي مانجا , شكلاطه , جوافه , فراوله
وكهوه شويت هاف اند هاف بدون سكر , وبحب اشربها بدون الغطايه اد كنت كاعده مش بالباصات , اما اد بالباصات بفضل بالمصاصه حتى .

يوم الاحد 17\1\10

بالعاده بهدا اليوم اللي بكدر اقرأ فيه وانا بالشغل , وبقرأش كتير بس فصل واحد , يوم بالاسبوع فصل واحد , اخ بس لو اتجرأ شوي , مع اني ختمت هدا الكتاب بعمر 15 وكنت اضل احلم يكون عندي هدا الكتاب , بس لما كبرت صرت بديش اخلّص الكتب اللي بقرأها , مع اني بدي اخلصه لاجل ابلش بالاخوه كارامازوف لاني كمان اشتريت المجلدات الاربعه , بعرفش هدا التناقض وهدا العقل اللي بخاف انه يخلص من الكتب ..! واوصلت الفصل الرابع ..~
هدا المقطع من الفصل التالت .

من الاغراض اللي اشتريتهم يوم السبت , وردتي المفضله هي اسمها السجاده اللي هي هاي , وبحبها بكل الونها , لانها رقيقه بدهاش مي كتير وبدهاش شوب كتير , وبدها عنايه كتير بانو تنتبه ع كل شي بتعمله معاها لان روحها ضعيفه بسرعه بتموت , مرات لازم تورجيها للشمس ومرات لأ , وما بتعيش بالبرد لهيك الافضل اضل جوى الدار , اللي عالشمال هاي الكديمه والتنتين الجداد لازم باقرب وكت ارزعم ان شاء الله , حبيتها وانا صغيره عند بيت اهلي بتزكر امي تكون حاطها بالصالون وكانت طويله ولونها نبيذ مخمل , من وكتها حبيتها !

هيني صورت السديهات اللي عندي ..~

هاوس هي الشخصيه المفضله عندي بكل اشي شوفته , اشتريته بحاولي 100 $ ولسا ما فتحته



انجيل عالاخر بحبه ومع اني كتير ناسيه كصص منه لهيك حبيت اشوفه من اول وجديد اشتريته بحاولي 140$ وفتحت السيدي الاول .






هاي شغلات بضيع مصاري عليها .

عفكره مكهوره وتعبانه ومش عارف انام كمان، متمدده بالعتمه وبسرح بكصص، امتى يجي وارتاح، اليوم عملت تحديث للايفون الحيوان بده اعمله غصب عني، وانتبهت انه رجّع ارقام قديمه عندي وكعدت ابعبش ع رقم شخص ، يا خساره ما لكيته انجنيت، بعد ما اجاني امل صغير بأنه يكون موجود واحكي معه، اخ بس وين عقلي ما سجلت رقمه ع دفتري، او بالاصل ليش مسحته، كله عشان قررت انه انتهى هالشخص من حياتي ومستحيل ارجع احكي معه، يبي الدنيا شو غداره، يعني لو رقمه عندي هلكيت كان انحلت كصه كبيره معي، لان بتزكر لما اتكاتلنا غبت عنه حوالي سنه ولما ارجعت احكي هو ما صدك وكان يستنى وامبين هلكيت كمان بستنى، واللي بكهر بعرفش وين بيته! بعرف الشارع بس شو رقم بيته لأ، بعرف سيارته لونها ومديلها بس بعرفش نمرتها، بعرف اسمه بس بعرفش اسم عايلته، يمكن ربنا مش رايد.. يا ريت اعرف انام لأن عليا شغل بدري

الساعه عندي نص ليل وكنت مخططه اجي اليوم اكتب , بس ضيعت كتير وكت بالملوخيه , وما شوفت فلم الا توب الساعه نص ليل , مع انه الاربعا والخميس والجمعه كانوا ايام مليانين كصص ولازم اكتبها , المهم اخدت اجازه من شغل الليل هدا الاسبوع وراح ارجع الاحد ان شاءا لله , وعفكره نفسيتي كتير منيحه او احكي انا بطلت تفرك معي اي شي او يفرك معي اي حد , صايره هاليومين انانيه بحت , تخرب تعمر بطلت اهتم , حتى اتوقع هاي اطول مره انا بعصبش فيها , مش عارفه وانا اكتب اجى عبالي اكتب واحكي بس بنفس الوكت بدي انام اغصب عحالي لانو امبارح كتير اتغلبت تا نمت واصحيت كبل صلاه الصبح ومعرفتش ارجع انام , حتى محدش كان فاضي او موجود اني اتسلى واضيع وكت , وما صدكت يطلع النهار مشان افتح باب الحوش واسرح بالسما , من شوي انناس بعتتلي مسج وغريبه بصراحه , بس مسجها كان كتير حلو وبتحكي فيه ان اشتقتلك واني نفسي اشرب كهوه معك وانو تبا لكي ولامريكا ههههه , انناس هي صديقتي المقربه والمفضله وجارتي بالضفه , بتعرف عني 90% بس من وكت ما اجين هون ومن وكت ما كتروا اولادها الله يخليلها اياهم صارت كتير تنشغل وكمان في مشكله فرق الوكت بينا لهيك دايما بنتغلب تا نتلاكى وبنحكيش الا بالمناسبات او شغلات طارئه بصراحه لاني بنت انا بفضل دايما ابتعد عن الكل وبنت بترك الكل , لهيك محدش ضايل معي , لان علا تصرفات بتخلي الكل يبعد عني خاصه كصه اغيب عنهم بدون انذار واكيد الكل بزهك ومن هالحكي , المهم استغربت هيك حكت معي وما كترت حكي معاها لانو جد مليش نفس احكي, عفكره انا ابصر مالي باني بضل مريضه , خاصه ظهري وبطني , يعني من يومين بطني مش راضي يطيب لا الدوا او الاعشاب اللي اهلي حكولي عنهم , هيني بكتب وبوجعني , هديك المره الله ستر يوم الخميس , كنت بالشغل بشفت النهار الصبح وفجأه هيك وجعني كتير ومكدرتش اتحمل الوجع ولا كدروا اجريا يحملوني لهيك كعدت ع الارض اقرأ عليه وكعد حوالي دكيكتين وشوفتهم سنه , وحتى وجهي عرق وخاصه جبيني , ما صدكت انه خف ارجعت وقفت بدون ما حد انتبه عليا شو صار لاني بديش التحقيق تبعهم وخدي اليوم عطله وكل هالحكي الفاضي , كلها وجع وجسمي بعاود بتعود ويتحمله , بلشت انعس وانا اكتب ... حلو حلو ! خليني احاول انام اد ما اعرفت برجع

صحصح في شب متابعني بس ,, عادي لو حطيت اسمك ؟ انت يلي بضل تحط تقيمات فاضيه ؟ او خليني اعطيك لقب ؟ خلي الشغله بيني وبينك الا اد بدك تنعرف .. باثرش عليا ! المهم خبرني بالتقيم خلي الفضولين اللي بيكدروا يوصلوا لتقيماتي يتعبو حالهم ويروجو يشوفو شو كتبت هههه

وفي سؤال وهو ليش ما احمّل بدل ما اشتري الديفديهات ؟
لان هاوس شوفته واكتر من مره وحبيت الديفدي لانو بحب كا منظر وبحب مرات هيك السهوله بانو بس اشبكه وكله جاهز لاني من النوع اللي اد بدي احمل اشي بزبطش معي يا الترجمه غلط يا نص الحلقات مش موجوده ويا ويا ويا ,, بس هاوس من كتر حبي اله

اما انجل فا يا صاحبي اتعبت ادور عليه انه الاكي حلقات او الاكي اشي كامل لاني بحبش المشاهده اون لاين لاني بكدرش اعيد المقاطع الا ما يخرب معي , لهيك ايأست وحكيت ينعن ابو اللي بده يتعبي , اتعب مصاري واشتريه , وهدا اللي صار .. شكرا عالسؤال