مأساة روح {هالكه} في اوراق تائهه ~

اوفت مش راضي يزبط ينعن شكله بكاع الكندره !!

محاوله من مكان تاني



حلو حلو هيه زبط , يا عمي عبقريه !! هدا كان فطوري الاربعا , لاني بالبيت ومعي وكت اعمل فطوري المفضل اللي هو بيض وباكينك حبش ,البيض محروك ونص استوى هيك بحبه والباكينك مكرمش وشاي وخبز ومخلل لفت وزيتون



لما اطلعت اتلاكى مع خواتي اشربت بالبيت كهوه لانو اتصلوا عليا واطلعي ويم , كعدت استناهم محل ما دايما بنتلاكى بنحكي عنه راس الجبل جمب محل وال جرين , فا عطول عبرت اشتري كهوه وهاي النوع مرتب بانها تكيله ومره , لان بكدرش ع الكهوه الحلوه واغلب ستاربوكس حلو , تتحلى ايامي وايام اللي بقرأوا , ولانو الدنيا شووووب اشتريت البارده واشتريت مي لاني انسيت المي تبعتي كمان ,, بس حد امبارح كانت كتير شوب

الخميس

لان امبارح ما جهزت حالي للشغل اليوم من كتر ما كنت منكده , اليوم الصبح بسرعه عبيت هالشنته الصغيره من اي شي من الرف اللي بغرفتي عشان اخده معي







عفكره هاي اللي عالشمال ساندوش بس لاني كنت بنص عين وانا اعمل فيها ومعي عشر دايك لاجهز حالي واطلع من البيت احسن ما الباص زي عواديه يسبقني ومش ناكصني نكد

اللي بشتغل معهم في منهم خليتهم يحبو الكهوه العربي , لهيك كل ما اشتغل معهم بعمل الي والهم فا يم بكون مبسوطه عالاخر



هدا كان غداي مع اني هيني جوعت , عملت عالسريع انناس مع لبن ورشت ماماشيا وشويت لوز

بلشت الناس تزين للهالوين



وحدن

؛

عفكره عنجد انا بحب مروان خوري لان كلمات اغانيه ينعن شكله شو حلوه وواقعيه , بدي اروح اعمل اشي اكله ! واشوف شو اعمل بعدها , يمكن اشوف تكمله (مدكرات عشيقه سابقه) عفكره الي فتره بضل اشوف بس مسلسلات عربي .. اراكم يا اصحابي والله يجيب الخير النا كلنا .

صحيح الليله اللي صابني ارق احى عبالي اصورلكم الشبابيك محل الصور والضواض



لانه عتمه الحمد لله الصوره مش واضحه ولا حتى امبينه لهيك بكون ما خالفتش اي قوانين , ودايما بختار لون الضواض يا اما ازرق او نيلي

اووه 4 زوار ؟ اول مره بحياتي كلها بكون 4 متواجدين لاشي انا عملته ههههه , اخ يبي مرات مش لازم الواحد يكون صريح وصادق علط اكون هيك انا .~

في الايام اللي بتكون عطوله بحب البس فضه محرزه , انا بالعاده بحب الفضه كتير وهي الاشي المفضل عندي وبعدها اي شي عنايه , بحبش الاواعي كتير او المكياج كمان ,, بس الفضه !!

المهم امبارح لانه يوم عطله ف البست هدا السنسال اللي ما بلبسه دايما لان بخاف عليه عشانه خرز وهو هديه مع كمان واحد شكل بومه , لاني بحب الهرر والبومه جابلي التنين , اما الحلق فهو انا اشتريته لان بشبه ع الزفير الابيض لان حجري الزفير الابيض ولان في لولو ومع انه رسمي بس كان من القطع اللي شوفتها واشتريتها بدون ما افكر او اندم بعد ما اشتريها , كتير خفيف وحلو وبلبك ع اي شي بلبسه , وخاصه لان عندي سنسال زفير ابيض فا شوفته لابك عليه

السلام عليكم ... مفش اشي محرز الحمد لله صار معي امبارخ ولا حتى اليوم ..

امبارح بعد نا كنت بالمنتدى روحت حطيت ع وجهي قناع لانو كان عليا شفت ليل وبحب اريّح وجهي قبل الشفت , والشفت كان كتير متعب , وصيت لاخوي ع بروجكتر وما وصلش مع انهم حكو انه وصل واخوي زعل وهيني بتعامل مع الامازون مشان نشوف شو نسوي, واختي فبث متكأبه عالاخر وكد ما بحكيلها امشي نطلع مش كداره تطلع , اد بتكون مهموم مش لازم اضل بالدار لان التفكير بزيد عليك وهي مش من النوع اللي لو كانت بالدار بتلهي حاله , انا اد كنت مهومه وبدي الهي حالي بالدار بشوف اشي فلم او مسلسل اوحتى عاليوتيوب او حتى النكت , ع سيره عالنكت هدا مره واحد حرامي سحب سحبه طلعله شرطي هههههههههه يالله عالنكته من عمري 5 سنين وانا بعرفها وبضل اضحك عليها كانوا اول مره بسمعها مع انها زنخه ,المهم حتى امبارح كان غداي جنحان , لما يكون مفش اكل وبديش اطبخ بس بطول جنحان جاهزين ومبهرين بس عليا اشويهم او اقليهم وبفضل اقليهم . وحكيت مع امي وبعديت اطلعت ع شفت الليل والحمد لله متعب نفسي وجسدي وحاله , بس الاشي اللي جد كهرني انو قناه (نيك\نيكلودين) بطلت تجيب فريندز .. ينعن شكلهم جابوا اشي بداله ومش حلو , منيح انهم بجيبوا (فرس برنس اوف بيل اير) هدا كان المفضل عندي .. بالشغل حكيت مع واحد من الاصحاب واكرهت هدا الاحساس بعرفش شو هو بس لما بعتلّي (كيف حالك يا مريم) كاان في طاقه غلط بالرساله وحكتله (شو هالطاقه هاي ؟) وفطست ضحك , انا بعرف بما انه هدا الصاحب الحمد لله صار اشي حلو معاه , اشي مصيري الحمد لله فا لانه مبسوط زعلان ع انه لحاله اللي صار معه اشي حلو , وكان نفسه يصير معي اشي حلو كمان , ليش هيك احنا كلنا بنفكر ؟ ليش مش انانيين بانو اد كنا فرحانين طز بغيرنا المهم احنا , لأ احنا اد فرحانين بيخطر ببالنا كل الناس اللي بنحبهم وبنشوف كيف هم مش مبسوطين وعندهم مصايب , كيف احنا نكون مبسوطين لحالنا وهم لأ ؟ لازم نحس معهم وما لازم ننبسط !! هيك حسسني من رسالته , المشكله انه نسي كديش شايف بحياته او نسي انه بعمره كله ما شاف اي يوم خير , لازم يفهم انه هدا الخير الحمد لله عليه لسا ولا اشي ما كل شي زفت شافه بحياته , لازم يطنّش وينسبط ويتهنى وما يفكر باشي او بحد .. تفكرش بحد او فيا , انبسط انطز يا روح امك , تخافش عليا . المهم خلصت شعل الليل واجيت عالبيت حكيت مع امي شوي ونمت من 7 لل 10 بس , واصحيت وحكتلي اختي هوبز انو بدها تيجي عندي تطبخلي , بسرعه افطرت واجت وطبختلي سبانخ لاني بحبه واشربنا كهوه ونمينا ع الناس واتسهلت , بعدها حكيت مع امي وحكتلي (انو حلمت بحد من معارفنا هون ) فا حكتلها (سكري خليني اتصل اطمن عليه) واتصلت عليه والحمد لله هو بخير بس بضل يسال عن اخوي واحد ومرته وانه لازم نروح نزوره , مع اني بكرها المنافقه الخبيثه بس لازم اروح معاها , وارجعت طمنت امي واكلت وهيني هان , صحيح ظهري من فتره بوجعني كتير واليوم حكيت لاختي تحط لزكه للظهر الي , ويالله شو شدت ظهري ووجعتني اكتر ,, فا حكتلي امي (لانو ظهرك امبين كتير بوجع لهيك شدته )

الجمعه الليل 17\29\9


اييش , امبارح ما اجى عبالي اكمل كتابه او احط صور مجريات يومي , حتى اليوم والسبب انو بكونش معي وكت , النهار بين النوم وشغل البيت وكصص الالتزامات وبين شفت الليل , مع انه بكون نفسي اكتب واطلع كلشي جواي , بس النهارات بشوفها قصيره , واللي بنتبه عليه بانو اللي بكتبه ملان اغلاط املائيه سامحوني بس لاني من النوع اللي برجعش اقرا شو كتبت لهيك بيطلع اغلاط , مفش اشياء مهمه صارت معي الحمد لله , بحب بالاصل ما يصير معي اشي , بفضل انو يومي يكون روتين هادي بسيط بدون كرف الناس وكرف الدنيا , شفت الليل كان متعب الحمد لله هههههه بستعرب من حالي انو هيك متحمله كرف شفت الليل , بس لما تشوف انه ما بيطلع بايدك اشي ومفش حل ارمي جوى قلبه وانكهر , اد بتحكو ايش بشتغل فهي امبينه شو شغلي هههه , اخ يا ربي واحده بامريكا بتشتغل بالليل ايش يعني ؟ ليش دايما بروح شمال انا هههه , مش مهم ايش شغلي هلكيت خليه مجهول شوي عشان اكسب حسنات منكم , المهم اللي صار بشغلي انو واحده من العملاء اهلها بدهم يعطوها مخدر لفتره مشان بعدها يعطوها نحكي الابره عشان تموت , بستغرب بالكفر تبعهم وبالقسوه انهم يوافقوا ع هيك اشي حتى لو هي بدها , كان خبر صادم وهيك فكرت فيه كتير , خلال شهر بنشوف اد راح يضلوا ع قراراهم او راح يغيروه .

السبت 17\30\9

اوصلت البيت بين 6 و و6 ونص الصبح كالعاده وكنت جد نعسانه وتعبانه كتير وكالعاده وهو بتصل ع امي مشان اطمنها اني اوصلت البيت وانو بدي انام وحطيت حالي ونمت , وهاي مره بنام زي العالم والناس وبصحاش ع اي صوت , اصحيت ع ال 10 بس حاولت اغصب حالي انو ارجع انام والحمد لله انو ارجعت نمت واصحيت ع 12 واتفجأت من حالي انو نمت , كديش كان مزاجي ونفسيتي وجسمي مرتاحين , كان عليا مشوار اليوم وهو احط اجار البيت بحسابي بالبنك , بما انه عقد اجار الدار باسمي وباسم واحد من اخوتي , بس بفضلوا انو عالاغلب احط الاجار باسمي عالشيك , يمكن لاني بتعامل مع اصحاب الدار ويمكن لان مركون عليا بكتير شغلات وخاصه بالمصاري , روحت عالبنك وروحت ع كم محل اتسوق وارجعت عالبيت وضاع كل النهار , ما اوصلت البيت وعملت كم شغله الا هيني هان , اللي انبسطت منه جد اليوم وهو اخوي واحد بلش يرتب بالحوش ويبحشه , جد الله يعطيه العافيه ابسطني , يمكن لان من زمان بطلب منه ويمكن لانه بده يرضيني عشان اخر طوشه صارت , لان من زمان بدي يترتب الحوش مشان ازرع فيه خضرا , انا بنت الزراعه , بحب زراعه الورد زي امي بس بنفس الوكت بحب اكل من الاشياء اللي ازرعها زي امي وابوي , من وكت ما زرعت كوسا وعجبني طعمها حبيت انو ازرع كمان كتير شغلات , المشكله انو من فتره متل ما حكيت ظهري بيوجع وبكدرش احمل الفاس وهدا سبب طلبي من اخوي انه يبحشه لاني بالعاده ماشيه بمدأ (ايد واحده بتزكّف) لاني عشت اعتمد ع حالي وعشت انو ما تستني حد يعملك اشي لانه ما راح يعمل او راح يعمله بعد تطليع الروح , ان شاء الله افضى وان شاء الله ازرع كم شغله انبسط عليهم ويزكروني باهلي , كمان اتزاعلت مع حد من اصحابي ولما اصحيت اليوم لكيت منه مسج بس بما انه النفسيه رايكه ما اجى عبالي اعطيي للامر اهميه وتركته لوكت ما اكون بدي اكاتل , في عندي صور بس ما اظن احطهم اليوم , خليني اروح اعملّي كاسه ميراميه ادّفي جسمي واريحه , واتمدد اشوفلي حلقه من اي شي .اراكم ع خير
يا رب ما يكون في اغلاط بديش ارجع اقرا .