مأساة روح {هالكه} في اوراق تائهه ~

الساعه ظ، بعد نص ليل، مش عارفه انام، اولا اتكاتلت مع حبي وهدا مش اشي جديد، بده يحاول معي بالحكي ليعوّض اللي ما عملوش، يا ريت اكون بنت اللي بتصدك الحكي، بس يا عمي كله حكي فاضي بالهوا انكعوه وخليها تمطر بلكي تاخدكم عند ربنا ونرتاح، حكيت مع انناس تلفون وطولنا وكمان الاوضاع مش ولا بد عندها، كديش عايشة بماضينا، كل اللي صار كوم ولما صوص هلكيت بعتتلي مسج شو صاير معاها كوم تاني ، كان نفسي ابكي معاها وما مصدكه تركب نت لاحكي زي العالم والناس معاها لانو فش بالبيت عندها نت وهي عطول راحت عالنادي لتخبرني بمسج، الله يصبرها يا رب، اه يبي يا صوص الله يعينك، مش كادر استوعب بالسرعة هاي هيك صار، لو انه القتل حلال.. كان بقتل اللي بحبهم بلحظة وبكصد حبي وبحنّط جسمه تمثال وبكون مبسوطه انه مش راح يكزب عليا او يوعدني باشي وما يعمله يبي شو حلو لو هالاشي يصير، وبقتل حب صوص كمان زياده بيعه، يبي شو مكهور عليها اكتر من حالي لانو هالبنت يالله شو ضحت يالله.. حيوان ابن اللزينه.. عالاقل انا بضحيش وبسألش وبعرف انو كلشي مؤقت لهيك لما تيجيني خبطات بكون متوقعها منه وخاصه ع تصرفاتي وتعاملي وكسوه قلبي وراسي.. بس هي لأ هي عالاخر عالاخر ولا شعره ممكن تخليها لنفسها لأجل اللي بتحبه... حيوااان ابن اللزينه

اليوم الاربعا كان من الايام اللي انشغلت فيها والنفسيه مش ولا بد , اطلعت من 8 ونص الصبح وارجعت ع 4 العصر , اصحيت بدري ونمت متاخره فا يم مشبعتش نوم واشربت اليوم 5 كاسات كهوه ومع هيك ولا مره حسيت اني اصحيت ولا مره حتى انبسطت عالكهوه اليوم ,طلبت واحده من اختي فيث تجيبها من دارها لانو معيش وكت اعمل او اشرب كبل ما اطلع من داري وما شوفتها الا الكهوه بارده, ما عجبتني بس اشربتها , ولما اشترينا من برجر كينك كانت محروكه طعمها بحزي بس اشربتها , ولما طلبت من اختي هوبز التانيه تجيبلي كهوه من بيتها جابتلي واحده فيها سكر , حكتلها ( من امتى انا بشرب مع سكر الكهوه) وكانت نهايتها لما طلبت من بنت اختي تشتري كهوه , جايباها بدون غطى وانا بالسياره واختي تسوك انكبت عليا , لا حول ولا قوه الا بالله !! تا بالاخر اجيبت عالبيت ولكيت اخوي عامل كهوه وما صدكت ويالله كديش تكيله الكهوه اللي عاملها فا روحت اكل معاها بسكوت مشان يقضي ع التكل , ومع كلشي صار مش منيح اليوم وكل التعب والكهر الاشي اللي مهونها عليا اني مجازه من الشغل , كلشي مش منيح بيجي مره واحده .

فد بضّل تيجي ببالي , بعرفش ليش هاي البنت بضل ببالي , بعاود احكي عنها بعدين

خليني احكي عن حاح ..~

حاح هو عندي اعز صاحب عالنت واسمه عندي بالبلفون هو { الصديق} مش من اول الناس اللي اعرفتهم بحياتي عالنت بس اكتر الناس اللي ضلوا متمسكين فيا بكل غيابي ومزاجي , اعرفته بمنتدى كديم كنت فيه ولا عمره اجى يحكي معي وانا بالمننتدى حسب ما بتزكر , اللي بتزكره انو مره دخلت بمسابقه المدونات بالقسم والسبب كنت بدي اعرف مين بتابعني بجد لانه راح يصوتلي , وكانوا اربع اصوات , ولاني كنت اداريه وبكدر اشوف من مصوتلي , كان هو منهم , عفكره الاربعه هدول انا لليوم بتعامل معهم , بعدين راح احكي عنهم , خليني اكمل عن حاح , ومكنتش اتعامل معه بعرفش ليش؟ المهم لما تركت المنتدى كان يجي يحكي معي عالاسك وكنت اضل احكيله انو اتركني بحالي وانا مش هي البنت اللي كنت تقرأ مدونتها وابدا هالشب ضلوا معي لحد الان , حوالي بين5 او 6 سنين واال عمر .. اول مره حكينا فيها تلفون اشي بشع صار , كنت غايبه فتره عن عالم النت وع كد ما اغيب عن عالم النت الا هدا الشب يضل بينا تواصل عالايميل برسايل طويله نحكي فيها عن ايامنا وكل هالكصص , ومره انا غيبت عن الرسايل لاني جد كنت بفتره كرف ومش كادر اتواصل مع حد ,بس كنت مخبرته اني كتير تعبانه وراح اغيب . المهم اليوم اللي اتصل فيها عليا كنت ليلتها متكاتله مع ناس عالواقع يعني طوشه كبيره وصار تهديد الي ولاهلي وكان عليا شفت ليل , بتزكر بعد ما صارت الطوشه ضليت اميّله عالشغل وكان شفت صعب عالاخر , ليله صعبه تنزكر وما تنعاد , وكانت تيجيني تلفونات ويطلع رقم خاص وما اردش لان بردش ع خاص وكمان بالشغل وكنت خايفه عشان الطوشه , لوكت ما طلع رقم واتكرر لابس مكانش حاطط اسم الدوله ومكانش الرقم ظاهر دولي , ع وجه الصبح فا عاودت رديت عليه .
حاح- مريم فلان معي
مير- اه مريم مين معي ( وكان صوتي عالي ومعصبه وبدي اطاوش لانو زكر اسم العايله )
حاح- بدي احكي مع مريم فلان
مير- انا مريم مين معي ( وصوتي زاد)
حاح- مريم فلان موجوده
مير- يا زلمه انا مريم فلان وانت اللي متصل مين معي شو اسمك
حاح- انا فلان الفلان
بعدها انا فطست عحالي ضحك واضحك بصوت عالي وصرت احكيله انو يسامحني ليش كنت احكي بعصبيه وحاله وحكتله بالزبط ليش ومن هالحكي .. هدا كان اول تلفون بينا , واتصل لانه كان كتير مشغول باله عليا , فهدا هو صديقي المقرب عالنت .. راح احكي عن الباكي بالايام الجايه

الدنيا ولابعمرها بتعطيك اللي بدك اياه , ودايما بتكهر الواحد غصب عنه , هالفتره اخسرت شخص وافترقنا غصب عنا احنا التنين , خلى عيوني يرغرغو وكعدت بفتره كآبه , ترك فراغ وخاصه بانه آخر فتره كنا قراب كتير , نسهر ساعات واحنا نضحك ونتمسخر , نصحّي بعض ونجلط بعض بانه ازعاج , انكسرت لاني كسرته , هدا تاني شخص بحياتي اللي ازعلت ع فراقه وازعلت من حالي اني كسرته ( مريم انا تعبان تعبان . نيجي نهرب . او ننتحر مع بعض . كلها اسبوع بنزعل عبعض وبنتهي كلشي . اوعدني . اد اجيت عندك بتشوفيني ؟ اد حبيت اتصل واطمن عليكي . زي كأنه بنعرف بعض مليون سنه . اخ يا مريم . مجنونه انتي ) بهاي الفتره غبت عن الكل حتى عن حبي واظن انه زعل وحردان , وصاحباتي وحتى اخدت كمان اسبوع اجازه من الشغل , زعلانه اني تركته , خواتي كانوا كل يومي يجيوا ياخدوني نطلع مشان التهي لانو عارفين شو هالشخص كان مهم بحياتي مع انه كنا عارفين احنا التنين انو راح يجي اليوم اللي نترك بعض بس مش بالسرعه هاي , مسمتيه احلى رقم , يخساره يا صاحبي , الدنيا مش حلوه زي ما بتحكي , لنشوف شو الدنيا بتجيب ...~

اخوي واحد زعل لاني مروحتش معه ومكدرتش احكيله انو وجهي نحس وبديش يصير اشي لهيك بديش اروح معك , اليوم من صباحيته مطبات وكلشي بوقع وبنكسر وبنكب وما صدقت ارجع عالبيت ,الله يوفكك يا اخوي وتسمعني خبر حلو ..~

هون باحدى الايام وهدول دفاتر مزكراتي , هدا المكان اغلب وكتي بكون فيه طول ما انا بالبيت وخاصه اد بشرب كهوه او بكتب او بقرا او بصفن او بحكي تلفون ...~

؛


عم بسمع في باند كاريوكي ( الكيف + السكه شمال في شمال)

من بكرا راح ارجع للشغل وخلصت الاجازه وبالوقت الحاضر طلبت اني ما اشتغلش شفتات ليل لنشوف , راح اضل اشتغل شفتات نهار , لحد الان صاحبي بعقلي وبضل افكر فيه , لسا ما اتعودتش , امي طلعت مريضه كتير ادعولها بالشفى , الدكتور انجن فيها انها ساكته على حالها وبضل تتحمل الوجع وهيه زاد , لاني مش عندها , اخ لو عندها امسكها من ايدها واخدها غصب عنها , اخ يا ربي يطلع ورقي بسرعه , اخوي واحد امبارح ما نجحش وحكيت منيح ما روحت معه كان حكيت لحالي اني السبب , وسمعته كلمه وكانت كاصده مرته الحيوانه , صاحبي حاطط عالسناب صوره مع بنات بعد نص ليل , وحكيت اخلع هدا الحيوان بده يورجيني انه رد عليا وراح يسهر مع واحده وانه مبسوط , عطول لغيت الصحبه معه ليضل يعمل كلشي عشاني ليراضيني , اللي بعيد عن العين بعيد عن القلب , شو راح عمل الحيوان ؟ راح حط عالواتس ينعن شكله لانه عارف مستحيل اشيله واشيل رقمه ينعن شكله بس مسكني من ايدي اللي بتوجع , اخ بس هالحيوان حتى وهو بعيد بضحكّني , الله يجبر بخاطره ويعوضه عن قريب يا رب , حبي لسا حردان وكالعاده من 13 سنه مره واحد بس بلّش هو , انا بروح احكي معه دايما وخاصه لما اسمع انه مش بخير , بس لا يا روح ستين امك هاي المره جد جد جد ويا رب ما بديش ابلش لان فش مصلحه منك هلكيت ههههه , وغيرا نه سامعه انو اخبارك حلوه وعال العال , اقصر مده ما حكيناش فيها 5 اشهر واكبر مده كانت 3 سنين ونص , كعدنا تلات سنين ونص ما نحكي واختي فيث صالحتنا . وهو الوحيد اللي ببلش بالحكي معه ينعن شكله بس بيستاهل ع راسي والله .

اليوم الخميس اصحيت بالليل وكبل ما اشوف كم الساعه كنت استدعي انو ما يكونش طالع النهار لان نفسي اضل بالتخت، كانت ظ¤ الصبح حمدت الله واجيت ارجع انام معرفتش، وبلشت بالكوابيس والأحلام وبضل تتكرر عليا هاي الأحلام وهي الدنيا ليل بنمطقه كلها جبال بجبال وبضل اهرب في حد بلاحق فيا وبكون انط من أماكن عاليه والخوف يالله شو بكون خايفه وقد ما بحكي بالحلم انو حلم بس بصدكش الا لما اصحى وانا عرقانه، شو كصة هالجبال شو كصة الليل وكصة ضباب عتمه بشوفش اشي وكصة شجر بخوف، وحد بضل يلاحق فيا مين هو وليش، والبكهر انو بصيبني شد عضل وبتتشنج أجري بالليل مرات وكديش بكره وجعها لان بضل لتاني يوم.

عملت موعد مع دكتور سنان للأسبوع الجاي لان جد بكدرش اتحمل وجع سنان انا والله يستر، لان هون تصليح الأسنان بكلف ومعيش تأمين، وغير انه اقرب موعد الاسبوع الجاي، وروحت اتغديت بمطعم بحب اكله وبحب خدمته بس بحبش كعدته ولا الناس اللي بتيجي عليه، بس اكله زااااكي، واشتغلنا بالحوش لان فيها شجره نجاص وبضل تجيب حشارات عالدار..

امي لانها مرضت ووصلت لمرحلة انو لازم تروح عالدكتور فا عملت كتير فحوصات وبلاوي وطلع كصص الله يشفيها كديش مكهور عليها، ولان اهلي ع الحديده معهومش مصاري ف اخذوا مصاري من جارنا، اليوم لما استفسرت من وين دفعت الآلاف حكتلي، اخوي اللي الحمد لله ربنا طعمه الخلفه هاي السنه واخيرا من رمضان لحد الان بشتغلش الشغل واكف لهيك فش مصاري، يا دوب يطكطك عشان الحليب للصغار، واخوتي اللي هون يالله يالله يدبروا اجار الدار وخواتي اللي بحكموش ع قرش، انا كنت محوشه شويت مصاري، حوالي ظ£ظ*ظ*$ كنت بدي اشتري علبة العطر الي ولعبه كول اوف ديوتي الجديده بس تنزل لأخوي واهمهم كان لما صاحبي كاااان بده يجي هان نطلع نطش، احكي العطر مش ضروري، واللعبه لوكتها بكون محوشه، وصاحبي مش بس بدوش يجي هان، لأ قطعنا علاقتنا عالاخر اخ بس، لهيك اخدت هالمصاري وبعتهم لاهلي وزعلوا انو انا بالاصل بشتغلش وكنت مجازه وبنفعش يأخذوا مصاري وكل هالحكي وهالاسطوانه اللي كل ما ابعتلهم مصاري بيحكوه، وحكتلهم مهو يا عمي دين ولسا ناكص بضل عليكم دخيل الله شو بكره الدين.. وما حكيت لحد من اخوتي أو خواتي اني بعتت وبديش يعرفوا، لان هاي الايام انا بكدر اساعد وفي ايام بكدرش، انا متأكده هم راح يساعدوا لان الدنيا هيك الك وعليك، تنتين من صاحباتي العزيزات عليا بعتولي عالسناب بخصوص الصوره اللي حطيتها، اللي هي شو حاطه ع باب الغرفه وهو صوري مع كل حد بحبه وبعزه من اهلي وحبي، واحده حكتلي انتي بتحبي الزكريات والثانيه حكتلي كصة الحب انو عايشة بالماضي لدرجة حاطة صور اللي بتحبيه.. وعنجد انا بنت عايشة بالماضي لهيك الكل بمشي وانا مكاني وحتى برجع لورى، حتى حبي مشى بحياته الا انا مش ماشيه لنشوف آخرتي..
الله يشفيكي يما.. حبيبتي.

احزروا شو .. عبرت المنتدى مشان اجي ع المأساه و احكي انو واخيرا رجعت مطرت الحمد لله واني بالبيت مش بالشغل ما استمتع بصوته وريحه الجو , بس وانا فاتحه الباب ع الحوش وبسمع بالصوت والترشرش وكل هالحكي الحلو عن المطر ,, اضل متخيله امي بتكاتل عليا انو كيف فاتحه الباب بالليل وانتي لحالك والكل نايم والخوف تبعها , بعدها ما شوفت الا اجاني رساله خاصه وانا مغلقه وسائل الاتصال وحكيت بعقلي (اخلع شو المخالفه هاي المره ؟ مش شايفه الفضا وبديش اتقاتل مع حد هلكيت ) طلع تكريم , لان لما شوفت عنوان الرساله ارجعت حكيت ( عشو ؟ شو عامله انا منيح وامتى؟) اتخيلوا تكريم هيك عشان بضل ابرم واحكي كتير بالمدونه اتكرمت هههه , اللي خلاني جد انبسط ويتغير مزاجي هيك | التصاميم | عرفوا شو يختاروا , عرفوا شو ممكن يعجبني وعجبني .. شاطرين ينعن شكلهم .. راح احط منهم اكيد باقرب وكت ..~

هون التكريم اكبس

امبارح الجمعه، طبعا معرفتش انام، كنت مخنوكه هيك واضل اصحى بالليل، وصبّحت مريضة، ولكيت مسجات من اختي فيث عم تحكي انو طول الليل كانت تحكي مع صاحبي وانو لو نرجع ومن هالحكي، فهمّت اختي انو كلشي انتهى بينا، لاني بعز هالشب كتير بكدرش اكمل معه، ضليت اغلب الوكت بالتخت وكان عليا شفت شغل، وحتى رئيسي بالشغل افن اتصل عليا وكان في مقابله لناس جداد وبطلبني دايما اكون معه مع انه انجليزيتي ضعيفه بس الحمد لله كانت المقابله حلوه، وخلصت شغلي وارجعت عالبيت وكنت جد لسا تعبانه وحتى لما اجيت انام بسرعه اغفيت، هدا اللي متزكرته.

ما صدكت اوصل البيت، اتعبت بالشغل وحتى بالبريك تبعي اجى عبالي اقرأ وكان الفصل زنخ وطويل وكتير حكي، ما كملته لأنه زاد النفسيه زفت، وخواتي عندهم كصص اغلب اليوم بحكي معهم، ابن هوبز وكع وانشعرت ايده وهات عاد كديش مكهورين عليه هالولد من كتر ما بضل يوكع الله يحميلها اياه، وامي زودتها بالحكي معي لدرجة حكتلها ( اتركيني بحالي) انا صايره حساسه منها بدرجة كبيره، مكدرش اتحمل كلامها، صرت احس انها بتتدخل فيا صايره مكنتش هيك، بس بتتدخل بكصة الجيزه وحكتلها ( اللي بعجبك ما بعجبني واللي بعجبني ما بعجبك، ومش راح ارد عليكي بالجيزة، تزعليش مني يما ) دايما هاي الكصة اللي بنضل نتكاتل عليها، ومشتاكه لصاحبي.. كتير، لحد الان صار للكصة اسبوع وما اتعودت، ينعن شكله.