مأساة روح {هالكه} في اوراق تائهه ~

السلام عليكم ..

اليوم السبت والساعه حوالي اربعه ونص العصر, عم بشرب في ريد بول وبسمع في { ربى الجمال اسأل روحك صحارى دمشق حفله} وخليني ابلش احكي بالاشياء اللي من زمان امفكره احكيها وان شاءا لله ما انساش اشي .

السبت , الليل اتغلبت بالنوم بس غصبت حالي , اصحيت بحدود 8 الصبح , ع تلفون من اختي هوبز انها بدها تيجي عندي وتعملي منسف, كومت عطول افتح باب الحوش وروحت طولت اللحمه من الفريزر , ارجعت عالتخت هيك اتمدد كمان شوي وبعدين جوعت , ارجعت كومت وعملتلي فطور ولاني بكون رايكه ومعي وكت فا بعمل اشي مرتب , وارجعت عالتخت ابعبش عالفيس لانو بدي شغله ومش لاكيها يخساره وحاولت حتى عالنت وما لكيتها كمان , ما خلصت اخر الساندوش الا امي بتتصل وكالعاده بضل تطلب شغلات بلاوي اعملها وصرت احاول اتجنب طلاباتها عشان ما نتكاتل , صرت اغيّر الموضوع حتى ومع هيك امي بترجع للموضوع تا بالاخر بحكيلها (يما خليني اروح ) هي مش راضيه تستوعب انه حياتنا نصيب ومش بشطارتك ولا بتعبك , ما علينا المهم امي راحت وشوي اجى اخوي تلات , استغربت انه صاحي بدري , اجى هيك يصبّح عليا , واعطيته حتى من الساندوش اللي عملته لاني ما خلصته كله , وعمل كهوه ورجع وبعدين اجت مرته وكعدنا نحكي عن المعرض , وهو في معرض سنوي للسيارات بالحاره عنا , حكتلهم عنه وخلينا نروح فا هي طبعا بتحبش السيارات , بستعرب في حد بحبش السيارات , بس طبعا هو بحب وحكتلهم انا بعاود الحقكم لان هوبز بدها تيجي , وطلع المعرّض مأجل للاسبوع الجاي وان شاءا لله ميكونش عليا شغل , المهم هم طلعوا الظهر واختي هوبز اجت وانشغلنا وابنها كسر الطاوله وسعرها 50 $ بس انا صرخت فيه وقاتلته وحكتله ( انا مش امك تكعد تعيطلي , لعمرك اد عيطت بهمنيش ) لهو وكف عياط وراح يكمل لعب ويشوفوا بفلم (boss baby) , الا هو اد بتسألوني شو اكتر فلم شوفته بحياتي بحكيلكم هدا الفلم من اول ما نزل هالفلم لحد الان وهما كل ما يجيو الصغار عنا يشوفوه ومش مره مرتين ورى بعض , طول ما هم بالبيت وهالفلم شغال , والصغار بعرفوني انا بكعدش اراضيهم او ادّلعهم اد عملوا اشي غلط , انا شديده لهيك اد خواتي بتغلبوا فيهم بحكولهم ( راح انادي خالتكم مريم) وانا البعبع تبعهم وجد بس تطليعه مني كلهم بسكتو , المهم اتسليت انا واختي هوبز وجيبنا كتير كصص ومن شوي هي روحّت الله يساهل عليها وع اولادها وانا هان بكتب , وانا اكتب اجاني تلفون من اخوي تلات وهو (atm) لما حط فيها مصاري ما حسبتهم وهات عاد وبتصل يشكيلي الله يحلها وحكوله تبعون البنك اعيطنا اسبوعين , اخ يا ربي , لحد الان هاي هي كل مجيات يوم السبت من الصبح للعصر .

يوم الجمعه 17\6\10

مش متزكره كتير من يومي , خليني ارجع شوي عالسناب تبعي اشوف شغلات تزكرني .
اللي بتزكره انو منمتش منيح بالليل من مره واصحيت كتير بدري , حلو هيني بلشت اتزكر , كان فطوري شاورما امركاني اشتريتها من كاسكو لما روحنا عليه الخميس واشتريت تنتين لاني اتعشيت ع واحده الخميس , وواحده افطرت عليها الجمعه , وبما انه شوب فا صرت اعمل كهوه بارده , ولاني كنت رايكه عالاخر فا قرأت فصل من الكتاب وكتير انبسطت من حالي اني قرأت , وكان اغلب الوكت انا بالحوش عالدرج اقرأ واسمعت اغنيه جديده عندي لام كلثوم وهي { من اجل عينيك} بس بدي وكت لاصفن فيها وبكلماتها , وكنت ع تلفونات مع امي , ومشوفتش حد الصبح لان كان اخوي ومرته بالشغل وحبي اله يومين مش عبعضه وانا مش من النوع الفضولي او النوع اللي الزك بالواحد, بحب اعطي مسافه واترك الواحد لحاله يرجع واد مرجعش بعاود اتحركش فيها بس لسا بدري , المهم عندي ما اكونش السبب اما اد شغلات تانيه بهمنيش كتير بصراحه , لان الحياه ملانه مطبات , اخ يا ربي انا بنتبه عحالي مش هالبنت اللي اتعب حالي عشان افهم شو بعقول الناس , بحب كلشي يكون عبلاطه , يعني كنت مكهور مفكعه معك .. عادي تعال احكيني بسمعلك , اتصل عليا بنص الليل بصحالك , زعلان مني او من تصرف تعال احكيلي عنه بلكي نلاكي حل , اما تكعد تثقل عليا وكل هالحكي الفاضي واني من حالي اعرف شو براسك , سوري بتعبش حالي , وهدا الحكي مش لحبي , هدا الحكي لكل اصحابي , اد صاحب عندي بشوف حاله ثقيل عليا من احساس وما حكالي , ترجعش تحكي معي من اصله , لاني اد بكره الشخص او تصرفه بخبره لاني وكحه , الشخص نحكي الوحيد اللي جد فهم عليا هاي الكصه هو صاحبتي صوص , صوص كتير بترن عليا وبكون نايم وبنص الليل وبسمعلها , واختي فيث كمان , اد كانت مفكعه معاها بتتصل عليا صح بتكعد تحكيلي صحيتك وكل هالحكي بس بتعرف من جواتها انو باثرش عليا , المهم حبي مش عبعضه ان شاء الله يكون يعني فش هالاشي الكبير صاير معه , بس بتجي للواحد ساعات بده يكون لحاله , خليه شوي وبرجعله , ما بساله مالك لان بعاود بخبرني كلشي , لازم دايما نعطي الناس وكت خاصه اللي بنحبهم , وكان امبارح يوم رايك عالاخر باني بالبيت ومش سائله عن اشي , بعدين حوالي العصر اجت اختي هوبز عالباب بسرعه اعطتني ملوخيه عشان افرّزها وكانت عامله لازانيا , اعطتني الاغراض وحكتلي ( فش معي وكت , بلكي اجي بكرا عندك) الا هو كصدها اليوم يوم السبت , وطوّلت وانا اعمل بالملوخيه لان جابت بسم الله 8 ضمم , عملت 5 وبعدين اجت مرت اخوي وشافتني بعمل وكعدت تساعدني , بصراحه يعني كبل ما اجت تعمل سالتها اد اديكي عطر او لأ , لان بديش تروح تخلي كل الملوخيه عطر او اديها مش نظاف او يجي شعر عالملوخيه لانها مش هالبنت النظافيه وانا عندي الاكل بحبش اي حد يصيبه , عندي اتعب حالي ولا يخرب الاشي , وخلصناهم الحمد لله , واخوي تلات اتاخر , اتصلت عليه اطمن اد هو بالنادي او شو صاير وطلع عباب البيت , كعدنا اسهرنا شوي وبعدين حطيت قناع ع وجهي وشوفت فلم حلو وعجبني , بس مش راح احكي اسم الفلم .

الخميس 17\5\10

يوم الخميس , مستحيل اتزكر كيف الليل كان , بس كان عليا شفت الصبح كم ساعه بس , وكنت بالغلط حاطه المنبه ع 6 الصبح بدل 6 ونص , ورن المنبه وبدّل ما احطه غفوه روحت وقفته , وايش يعني وقفته ؟ يعني اد نمت بتروح عليا نومه وبتأخر عالشغل , ضليت اغصب بحالي اني اضل صاحيه وبديش اكوم من التخت واكسب وكت اني افطر او اشي لان اخوتي صاحين وبحوسو بالمطبخ وبديش اشوفهم ويكعدوا يحكوا معي , لسا بدي وكت انا لاستوعب الناس الصبح واكدر اتحمل اي حد مين ما كان , لهيك بستغرب الناس اللي اول ما تصحى بتحكي عالبلفونات وبتكعد تبعتبش وهي لسا نص صحوه , المهم استنيت تا طلعوا وكومت جهزت حالي وبسرعه كعدت اركض حتى الحك الباص , وانسيت حتى اخد اكلي معي تبا بس , ولما وصلت الباص بالعاده بيجوا باصين ورى بعص , واحد ملان عالم والتاني نص , وبالعاده اللي ملان بكون الاول وبعد كم دكيكه بيجي اللي معبى نصه , ايش يعني ملان ؟ يعني فش مكان توقف مش تقعد , طلاب مدارس وجامعات وموظفين فا يم بتنعصر وبتطلع روحك , لهيك انا بالعاده بستنى اللي نص , بس هاي المره انكلبت الكصه وهي سبكني النص واجى المعبى وانا متأخره بدون هالواسطه فا اطلعت فيه , وفش مكان اوقف كنت واقفه جمب الشوفير كمان من كتر العالم , وضليت ازحف واعصر بحالي لحد ما لكيت مكان اكدّر وانا واكفه امسك باشي , لاني يا عالم انا بنت اديا رخوين يعني كلشي بفلت منهم , لهيك وانا واكفه بالباص وهو كل شوي يوكف ومن هالحكي الا ما اوكع , وع كصه اديا الرخوين , امبارح وانا احكي مع امي بالبلفون تبعي وكع مني واجى جمبي عالكنبه ويا ريت ضل محلّه , لأ راح نط من الكنبه ع الارض ومن الارض نط ع باب العتبه تبعت غرفتي وهي المنيوم , فوك ما هي الشاشه مكسوره انكسرت بزياده ... اخ يا ربي ! فطست ع حالي ضحك , وبيجو وبيحكو( انتي بنتبهيش ) اي انتباه وهو طار بلفوني مترين ؟؟! وامي لسا عالخط كانت وضلت معي وكأنها ما سمعت الخبطات وسألتني (مالك بتضحكي) حكتلها ( انكسرت الشاشاه بزياده) وهي زعلت وانكهرت وانا اضحك واضحك . المهم امي بتتصل عليا وانا بالباص وبكدرش احكي لاني واكفه , والله بحبني اللي كاعد نزل عالموقف وانا كعدت مكانه واتصلت ع امي وكعدنا نحكي , اد بتلاحظو اني انا وامي كتير بنحكي لان احنا اصحاب وهي صديقتي كتير , مع انه مرات بزهك بس بنفس الوكت بتزكر كتير مواقف لامي معي منيحه , وغير انه بضل مشتاكه وهاكله همي عشان هيك بدي اتجوز باقرب وكت مشان اريّح لان هي امفكره اد بتجوز برتاح او هي بترتاح عساس يعني شايفه نصيب بنتها حلو , الوجه بيتغير بس البخت هو هو , يعني مين ما راح اخده مش راح يكون احسن من الاول وامي ع امل انه يكون احسن , الاول .؟ اه في كان اول , لهيك اد كنت بدك تتجوز ومعك الجنسيه الامركانيه وساكن بسانفرانسيكيو تعال خبرني ههههههه ما عم امزح , لا حول ولا قوه الا بالله , بس حط ببالك في حد بقلبي وانا اد بدي اتجوز لانو لازم اتجوز بس . المهم اوصلت الشغل وصابني الوجع اللي بتزكر وخلصت شغلي وروحت ميّلت اشتريت لاخوي واحد بكيت دخان عشان نظفلي الحوش وبعتله صورته , ومرته طبعا بتنجن لانها بدهاش اياه يدخن والله بنات , كال مصروف وكال صحته وهي ولا بتسال عن صحته لو بتسال كان بضلش تعمل معلبات ودهون وزيوت , كال صحه كال , كان بتكهروش بكصص تافهه , وكد ما هي تصرف بضل مصروف الدخان كسره , بس لما اشتريه محدش بيعرف الا انا وهو لاني هو بضل يجيبلي شكلاطه وريد بول , يعني هدايا بينا !! بالنسبه اللي بصراحه ادخن اتحشش تشم تنر وتصاحب بنات بهمنيش , بس خبرني عشان اكون بالصوره وما اعتبره كدب , هدا الخيانه عندي وهو الكدب , اما تروح تتسلى طالما انك جد مبسوط الله يبسطك كمان وكمان , عقلك براسك بتعرف خلاصك , وهدا من واقع ,المهم وارجعت عالبيت وعاودت اطلعت لان كان عندي طاقه ونفسيه اني اطلع , جربت مطعم دايما كان نفسي اجربه , واكله بقتل .. زنخ يبي شو زنح الاكل وهو مشاوي كمان , كال اكل فلبيني ومطعم مشهور كال ... اكلت لكمتين وسحبت حالي واطلعت , ولما شوفت هيك حكيت اروح اشرب كهوه واتحلى لان الزناحه ضلت بتمي , وروحت ع المقهى المفضل عندي بالحاره لان الكعده فيه مرتبه ومخفيه وطلبت كهوه وتشيز كيك وكعدت شوي , اخوي واحد اتصل عليا حكينا شوي , وسبحان الله لما ارجعت عالبيت اتلاكينا مع بعض عالباب , كعدت شويت بالبيت الا اخوي تلات جاي عالبيت وبيحكي انو (ايش رايكم نروح نتحوش ع كاسكو) وبالزبط جهزنا حالنا واطلعنا اتحوجنا , وارجعنا عالبيت وضبيت الاغراض ومكانش عندي وكت احط قناع ع وجهي لهيك حطيت جيل وحكيت مع امي ونمت .

عفكره مرات بتلخبط وبكتب اخوي تلات بدل اخوي واحد , راح احاول انتبه المرات الجايه

بدي اروح اكل اشي لان المنسف عفكره بشبعك بس ساعه وبعدها بتجوع , وبرجع احكي ان شاء الله عن الاربعا واحط صور , غير انه كمان خليني احمل دراما وفلم اكسب الوكت . شكرا لاي حد بيقرأ

هيني اجيت , اكلت وكعدت مع اخوتي , وحطيت ع وجهي قناع وحكيت اجي اكمل كتابه , ويا خساره ما حمّلت اشي , لبعدين الدنيا ما راح اطير , عم يضربوا فتاش ومش محرز وبشوفش اشي بالاصل , وبسمع باغنيه { islands young the giant } وهيني حكيت مع امي تلفون وحكيت مع اختي فيث شوي , اليوم السبت بس خليتي احكي عن الاربعا .

الاربعا 17\4\10

كان من الايام اللي مخططين انو نطلع فيه انا وخواتي , وخاصه فيث لاني كنت من زمان مش شايفتها وحكتلي (بوعدك اشوفك الاربعا طول النهار) طبعا فيث ولا عمرها عند كلامها ومرات بتحكي (اني بحس اني ما عملتش اشي الكم او لاهلي) بحكيلها ( اه ما عملتي ) لاني ليش اكزب عليها واحكيلها انو لا .. بالزبط هي ما بتعمل وبالاصل هي بتخرب الكصص علينا وبتهتم لمصحلتها ومصلحه اهل جوزها ع اهلها وهدا اشي بزعل الكل لان اهل جوزها من مره مش مناح , بس طالما هي راضيه هي حره وتتحمل كل اغلاطها وطيبتها الزياده هاي , المهم اتصلت عليا بدري وفكرت انو حكتلي هيني عند الباب تعي افتحي , طلع لأ مضيعه مفاتيح السياره , كنت بهديك اللحظه نفسي اطلع من بلفونها واشنكها , من صبيحه ربنا ع هيك خبر , حكتلها بسيطه لانو عارف كيف حياتها , مع انه مش هي لحالها شافه الويل او تعبانه , الكل تعبان بحياته والكل عنده مصايب وهموم , المهم راحت وحكيت بعلي انو الطلعه خربت , حتى بطول هاي الفتره من الصبح للظهر محدش من خواتي حكى معي , كانهم خجلانين يحكو معي او خايفين لانو وين وعدهم ؟؟! بس انا كنت هاي البنت الرايكه زي ما حكتلكم , ولما اكون رايكه بعصبش كتير وبترك الكصص وبضل احكي لحالي انو الخد متعود ع الكفوف , المهم ضليت يوم الاربعا وعلى ما اظن عالدرج ع باب الغرفه واظن اني شوفت كم حلقه من دراما يابانيه ..._ اجاني تلفون من شوي من حبي الغيور الاهبل , كانت النفسيه تعبانه ولحد الان , اخ بس لو مرات هيك يرمي ورى ظهره لو بوم علاقل , المهم حكينا حوالي 10 دكايك وعليه حرث يا حراااام , احب ما عليا اشوف الناس بتتعذب وخاصه كصص الحرث والشغل والوكعات , اوعك توكع كدامي لاني راح اضل ماسكها عليك طول العمر ,رعندي نذاله اخت شلن _ وحكيت انو اليوم امبين مش راح اشوفهم , الدنيا صارت ظهر الا اختي هوبز بتتصل عليا وبتحكيلي ( هينا عند الباب) استغربت وروحت افتحلهم وحكولي التنتين ( مش راح نتأخر فش معانا وكت , اجينا نشرب معك كهوه ) لانو بيعرفوا اني بحب مرات اشرب كهوه مع حد وخاصه معهم , كعدوا حوالي نص ساعه او ساعه الا شوي وشربنا كهوه واتسهلو , من الحكي اللي صار انو اختي فيث كعدت تلات ساعات وهي ادوّر عالمفاتيح وطلعوا معلقين قدامها بس ع طرف علاّقه المفاتيح , واللي صار كمان بانو تركت باب السياره مفتوح وخلصت بطاريه السياره , يعني المشوار مستحيل يصير كأنه , وانا لانو عندي طاقه اجي عبالي ازرع ورداتي اللي اشتريتهم يوم السبت , وزرعتهم واخدت وكت بس انبسطت كتير عليهم اني زرعتهم ويا رب يعيشو , ولان الدنيا بهدا الوكت شوب شوي خليتهم برى لاشوف وين بدي احطهم بالدار , كمان قطفت اخر كوسا لانها خلصت بلشت تنشف , ولاني اشتغلت بالحوش وحسيت صرت نتبه من التراب اللي عليا , حبيت اريّح جسمي لهيك عبيت البانيو مي ورميت حالي نص ساعه فيه يرتاح .

كانت هاي اغلب مجريات يوم الاربعا .. ضايل عليا الصور ! مش عارفه احطهم اليوم او اروح اتمدد لان عليا دوام بكرا يا رب عخير

( مش يعني اد احنا متكاتلين تاخد كل كلمه وكل حرف فالبوستات عليك , عادي الكوكب كبير وفيه زباله كتير غيرك )

؛

(مفش حاجه اسمها اللي فات مات , اللي فات هاد راح يضل يوجعك لحد ما انت تموت )

؛

(قدرتك ع التسامح رغم الاذى , بدل على انك حمار وتستاهل كل اللي بصير معك )

؛

( متسامحش حد شوهك نفسيا)

؛

ليش لازم اكون متلك عشان اعجبك ؟ طيب ليش اعجبك بالاصل ؟ ينعن .},ْ{,ْ{ ب 60 كندره )

كندره = الحذاء

؛

ايش يا صاحبي راح اسميك الاول طيب ؟ لانك اول متابع والدائم لحد الان , مع انه الاول مش هالاسم الحلو , او الدائم مش الاسم الاكيد ؟ لعاد شو .؟؟

اييش ,, السلام عليكم ..~

يوم الاحد كان كله شغل 24 ساعه والحمد لله بحب اشتغل يوم الاحد لان اللي بشتغل معهم مناح الا واحده فلبينيه حيوانه بس بشوفها شوي الصبح لما تاخد مكان شفتي .. اما كلشي بشغلي الحمد لله منيح حتى لو بضل سحبه واحده اشتغل وفيه بعض البريكات , ويوم الاثنين شغل بارت تايم خفيف واغلبه ضليت بالبيت واجت هوبز عندي , ولحد الان انا ماخده العطله طول هدا الاسبوع الا اد بيحتاجوني طوارئ , فش عليا اي شفتات ليل وفش عليا شفتات طويله , المشكله اللي عندي هكليت انو عليا ادرس للامتحانات بخصوص شغلي , كل سنه لازم اخد ساعات تدريب واختبارات عالنت وبصراحه بتكون صعبه عليا , ان الله تتهون عليا , اما بخصوص اليوم الثلاثاء وهو اطلعت مع اختي فيث واخيرا , لفينا بالاسواق وحكينا كتير وبس وهيني بالبيت .. مجهزه دزينه افلام رعب يا رب اسهر ع واحد الليله , خليني احط الصور .

,,,,,



؛

ابلش من اليمين , مش عارفه اد كلمه اليمين صحيح كتبتها ؟! اظن !

هدا من الشوارع اللي بحب امشي فيها وقريب عشغلي والسبب انه واغلب الشوارع اللي جمبه بتخليك تشوف المحيط عالمزبوط وبخليني احس انو المحيط جاي يبلع الدنيا .

|

هدا الدرج هو اكتر درج بحبه لانه من الادراج المخفيه اللي محدش بمرك منه لهيك اكتشفته صدفه ومن وكتها اد كنت كريبه منه لازم امشي منه والاحلى فيه انو مرات في هر اللي هو قط يعني بلاكيه وهو قط دلع عالاخر واد بحب الدلاعه فهي بس للهرر

|

هدا الدرج حكتلكم عنه اللي بيكشف كلشي وبشرح النفس بحبه بس مش بمحبه الاولاني لان هدا الدرج دايما بتلاكي فيه عالم بلاوي وانا بحبش الاماكن المزدحمه

|

هدا الشارع اظن نفس الشارع اللي حكيت عنه اللي هي الصوره الاولى عاليمين

|

هوون هدا باب الحوش اللي بغرفتي , غرفتي فيها بابين , الاول عالحوش والتاني المشبوك بالدار , وانا بنت بعشق الحوش وهدا سبب حبي لهاي الغرفه حتى لو صغيره لانها عالحوش , فا اغلب وكتي عالدرج او عالباب اقرا اشرب كهوه احكي مع الناس اصفن واسرح واسمع اغاني , حتى ابعبعش عالبلفون وعاللاب توب , اول ما اصحى عطول بفتح الباب وبخليه فاتح وبرجع انام او برجع عالتخت المهم من اول الاشياء اللي بعملها اني افتح باب الحوش , امي بضل توصي فيا انو تخليش الباب مفتوح وبتخاف ومن هالحكي بس بكدرش بنخنك , راح تشوفوا ان الباب مضروب وملعون اساسه وبهمنيش المهم هان بامريكا في بيت حتى لو هيك , وطبعا هدا مش بيت ملك هدا بيت اجار وصاحبه حيوان مسلم اظن افغاني بس هو بيحيكي انه من فيجا , وين فيجا هاي ؟
بضل يحكي بافغان والله اعلم , منافق من اسوء الناس اللي شوفتهم بحياتي , مرات الواحد بزعل لما يشوف هيك ناس مسلمين , راح تشوفو جزء من الصور اللي هي من انمي المفصل (نانا) وكمان هدا الاشي الاسود هو فرشه للمساج عالكهربا لاني مرات بحب اشغلّها

|

وهو كمان صوره تانيه لان فيها الورد اللي زرعته ومبسوط عليهم ونفسي ازرع كمان ويا رب ان شاء الله .

هدا بافضل كهوه بالحاره عنا عندي , لان الكعده في مكان مضبوب زي الحوش خلفيه واغلب الناس ما بتكعد فيها , بفضلوا الكعده اللي عالباب او اللي جوى , واد كنت كرفانه وبديش اكعد بالبيت وهدا صدف يصير باجي عليه او اد كان عندي طاقه بمر عليه او اد كنت بالحاره وفي مشاوير فيها كمان بميل عليه , وكهوته زاكيه كمان , و ودبل اسبريسو تبعته اخ يا ربي شو بتعدّل المزاج بنت اللزين تكييييله عالاخر

|




هدا بالايام اللي كنت ارزع فيها , كهوه بارده مع كيك


؛

,

هاي الكوسا اللي عندي بالحوش وهدول اخر حبتين عليها , شايفين ما اكبرها

بخصوص اكلي مرات بشوف مش هالاشي اللي يعني احط صور شو باكل ؟. مش عارفه انا بحطه عالسناب وخاصه اني بحب الاكل بس مرات بشوفه مش هالاشي احطه بالمدونه

اظن بكفيي لليوم لاني جاي عبالي اضوي البروجكتر واشوفلي فلم رعب , يمكن ارجع المسا لان نفس احكي عن اعز شب عليا عالنت حاح وهو الصديق لما حكى معي يوم الاحد وكيف اتعرفت عليه ومن هالشغلات لاني بدي اترك سيرته بهاي المدونه لاني ما تركتها بالمدونه الكديمه