مأساة روح {هالكه} في اوراق تائهه ~

السلام عليكم ...~

كد ما بحكي اني مش لازم اغيب بس برجع وبغيب , صابتني فلونزه كويه مكنتش كادره امسك البلفون او اللاب توب , ولسا اعراضها عليا بس صرت احسن الحمد لله , وعندي وجع راس بخوف لدرجه امفكره اروح ع دكتور لانه مش طبيعي هالوجع , عندي مشاكل كتير بالبيت واظن هي سبب وجع راسي , وخاصه صاحب البيت اللي متأجرين عنده , المسؤول عن البيت بضل يتصل عليا ويبعتلي مسجات وايميلات وبده اضل اقابله وبضل يتفلسف يعني كل يوم كل يوم بنكد عليا الله لا يسامحهم حسبي الله عليهم كهروني واتعبوني واحنا مش عاملين اشي , بس عم يجنن فينا مشان يزهكنا عشان نطلع , عليا امتحانات ومتاخره عليهم والسبب كان في مشكله والله يستر ما يطردوني من شغلي , مع اني كدمت هاي الاختبارات من فتره , بس طلع لازم اكدمهم مع الشركه التانيه اللي بشتغل فيها , وبكل صراحه يالله شو صعبات هدول الامتحانات , يعني بكعد يوم كامل اكدم فيه عالنت من كتر ما صعب ومن كتر ما بكعد اترجم عشان ما اغلط , يعني بس خلصت واحد وعليا خمسه , وهالواحد اتعبني غير شكل , امي مريضه ومكهوره لدرجه بدي اصرخ اني مش عندها , وبكدرش انزل وبتزعل اد برمي كل شي وبنزل عليها وبستناش اوراقي اللي الله اعلم امتى تطلع , اخ بس شو صعب البعد , وشغلي متعبني كتير كتير , يعني مرات بصفن انو يا رب يا رب تهونها عليا بانو شو اعمل يا رب ؟ بكدرش اترك الشغل عشان اهلي, لان انا كل فتره يعني كل اسبوعين او عشر ايام ببعتلهم مصروف , اهلي مراض وبدهم دوا فوق ال 1000 $ ما بين سكري وضغط وغده وكلسترول وفحصوات وغيون وكلشي , كلشي ! بكون مرات بدي اعيط عليهم , اني مش عندهم اناولهم , لهيك اغلب معاشي ببعته الهم , وبزعلوا عليا وبرضوش ياخدوا المصاري بس بعدين بنجبروا لان فش مصاري معهم ,وبيني وبينكم , انا متاكده اد ربنا رازقني فهو لانه عارف من جواتي انو احب ما عليا اصرف كل مصاري ع اهلي , وربنا عارف اني بس بدي رضى اهلي ودعواتهم بس , طول ما هم راضين عليا انا بمشي بالدنيا مطمنه لاني بعيده عن ربنا , الاشي اللي بقربني من ربنا هو اني بدير بالي ع اهلي بس , اخ يبي راسي بلش يضغط عليا وبلشت ادوخ , بعدين بكمل !

امي بضّل تسألني اد بحكي مع حبي، وهو مرات بنحكي، خاصه آخر فتره لما اكون مكهوره ومفكعه معي عطول بتصل عليه، بس مع هيك مش بشكل يومي، ومن وكت ما حكتلي اني اخفف حكي معه، وانا كل ما بحكي معه بيوجعني ضميري واني بخونها لاني عم اكزب عليها، وانا مخففه حكي، بس هو لما يجي يحكي بكدرش محكيش معه ، امي بدها اياني اتجوز وبضل تحكيلي انو لازم تشيلي قلبك منه وتمشي بحياتك، وانا بدي امشي بحياتي واتجوز بس مش جاي النصيب! يا رب يجي النصيب مشان اريّح امي، انا وحبي مش لبعض ومن زمان، بس بعرفش ليش بنضل نتواصل، والاشي التاني اللي صار واحد من اصحابي كنت أعزه معزه اخت شلن، بس اكتشفت انه كدب عليا، وهو حكتلكم عنه اظن الشب اللي حكى بده يسافر ويترك أمريكا، اكتشفت انو كزب، واستغربت ليش كزب، بس حكيت اترك الكصه لوكت اد ربنا بوريجيني اد ظني صح او غلط، ومن يومين بشكل يومي بضل يحط شغلات عالواتس وانا مش طايكته، ومش بس مش طايكته، هدا الشخص لو ينحرق كدامي ما بزعل عليه لأنه كتير كزب عليا، يعني لما ارجع اتزكر كلامه وتصرفاته احسه كزاب شاطر، ينعن شكله احس حالي غبيه انو كدر يكزب عليا، لهيك لهيك روحت مسحت رقمه مشان ميضلش يطلعلي شو بحط، اليوم مسحت رقمه، من شوي في رقم بيتصل عليا، عم احكي مش غريب عليا، ومن تكساس لأنه هو من تكساس، بس بعرف ناس كتير من تكساس، ما اتوقعتش يكون هو، بس طلع هو وبحكي زي عوايده بصوته وضحكته ، اللي شوي حسيت اني مخنوكه منهم، وكعد يحكي ويبلش بعوايده انه مشتاك واني حبيبته وكل هالحكي الفاضي، كنت متحمله كلامه وبعدين طفح البرميل لما سألته (بشوفك هان وشو صار) وما شوفته حكى اشي مقنع أو حتى بالاصل جاوب، اتاكدت انه كداب، فا حكتله (عنجد انا انسيتك) وحكتله بتعرف (انك كداب، وكل كلام كدب) فهو ما عجبه هالحكي وحكى انا (بحكيش مع ناس بتثقش فيا) ، حكتله ( الله معك) هلكيت مش عارفه اد ظلمته أو اد هو عنجد كداب، بس كل الاثبتات بتثبت انه كداب يا ربي، واللي بكهر في كم شغله بديش احكيهم، شغلات بيني وبين حالي، شغلات محد بيعرفها الا حالي ومشاعري، اللي منها مرات بيخطر عبالي ينعن شكله، وبعدها بتجاوزه ، بس بشغلات كبيره بحياتي بيجي عبالي ينعن شكله، واحكي لو انه مكزبش عليا...عزيته هالشب وزعلانه من حالي اني معرفتوش ع حكيكته هالشب ، زعلانه من حالي اني أعطيته كيمه عند اهلي ، وزعلانه من حالي اني خليته يدخل بمعزه عندي، بس مع هيك لازم كل ما يخطر عبالي اتجاوزه، والله لا يسامحه ويجعله يتلقاها اد جد كزب عليا، واد ظلمته الله يسامحنا، بس اد طلع ابن حرام الله لا يرده، الله كبير.
ويما سامحيني وادعيلي الله يبعتلي نصيبي ابن الحلال اللي يريحني عن قريب يا رب، عشان انتي كمان يرتاح بالك، وصحيح صايب وجهي حساسه اخت شلن مش عارف من شو؟! يمكن من الكلب؟ الله يخففها عليا ويشفيني يا رب ويشفي جميع المسلمين يا رب يا كريم

||



||



هدا الكلب اسمه تايلر , ما كتير راح اعبر بالتفاصيل بس هو مش الي هدا الكلب , المهم بانه كل ما اشوفه وصار يعرفني بضل معي اغلب الوكت , والمهم اكتر اني اكتشفت انو كل ما اشوفه بصيبني حساسيه , بيطلع ع اغلب وجهي حب صغير حوالين تمي ومنخاري وع خدودي !

||




راح تلاكو جزء صغير من السماعه تبعتي , واكيد كل سنه بشتري دفاتر ملاحظات مع التقويم , وكان هدا الكتاب الاسود , بس شو مكتوب عالدفتر ابدا مش انا وما بوصفني ..~

السلام عليكم ..~

الحمد لله ارتحت من هم كان عليا وهو الامتحانات اللي حكتلكم عليهم , واليوم خلصت الاخير الحمد لله , ومع هيك في خوف اني كمان انطرد من الشركه , بس عملت اللي عليا , لهيك حكيت اجي احط كم صوره ..~



اليوم صدفت اني شوفت سيارتين بورش وسيارتين جيب مرسيدس بنفس المكان , من وانا صغيره وكنت العب لعبه وكان فيها سياره عاجبتني , لما سالت شو اسمها واعرفتها ضليت احبها , صغيره سريعه بين الكلاسيك وبين الحديثه , اما جيبات المرسيدي مش واضحين بالصوره الا لما تكون تعرف كيف هو , هي من السيارات المفضله عند اخوي .
انا صبيه بحب السيارات كتير وبحب التشحيط والتفحيط والهجوله كتير كمان , اد كنت من هاي الشغلات وبتعملها تعال احكي معي (غمزه) ..~

||






||



من فتره اشتريت هاي المكينه اللي هي نحكي طابعه , بتطبع الصور من بلفونك , 130$ وكل 20صوره ب 10$ يعني الفلم , وهي بتقبل 10 صور , لاني متل متل ما حكتلكم ارجعت اكتب بدفاتر مدكراتي وصرت احب احط صور بالدفاتر لتكون زكرى الي

ايش اجاني من ابسي لشهر واحد ..~








ابلش من فوق لليمين ..~

سياته (ciate) وعفكره لفظها صعب , غير انو هاي الشركه جربت منها اشي وعجبني كتير , وانبسطت انو بعتولي ايلانير لان الايلانير اللي عندي مش عاجبني , اللي كمان اجاني من ابسي , ورهيب هالايلاينر هاد لونه اسود حلو والرسم فيه سهل وخاصه الخط الرفيع لاني بنت بحب المكياج الطبيعي اللي بس مكمل مش تغير بشكلي , لهيك بحب الايلاينر الخط الررفيع ,وغير انه ما بختفي اللون بسرعه ..~

قناع رمل لسا ما جربته , لان وجهي بفتره حساسيه وبفتره حب , وبديش يزيد ! مع اني بعشق الاقنعه ..~

كريم مرطب , كمان ما جربته , مش بحاجه عندي , بخليه ..~

الروج الناشف اللي انا من الله بكرهم , بحسهم بنشفو الشفايف , حتى لو انه ما بعبي الدنيا وبضله عالشفايف , بس لما احطهم بحس حالي رجل الي , انو رجل هاد ! احكي فتاه آليه , حتى لما احط مرطب تحته بضل مش عاجبني , وحتى لونه مش حلو عليا , بخليه هديه لحد ..~

ومناكير اللي عجبني لونه ونوعيته , بسرعه بنشف وبتحمل خبطات ..~

لانو قربت اخلص من الكتاب اللي معي ,, وما مصدكه ابلش بهدا ,, وعشان اشجع حالي اشتريت حاشيه للكتب ,, ولما شوفت هدول عطول اتخيلت امي كدامي وعجبوها لاني امي هيك دوقها ,, وعجبني كتير اناقه الصندوق فا اتوقع راح اجرب اشي تاني من الشركه لانو حسسوني كانها هديه حلوه وهي بالزبط حلوه .. كان سعر التنتين 7$







||

اشي تاني وهو طلع بالصوره الاخيره طُبعه لورده شقائق النعمان محطوطه ع اللاب توب , لاني من فتره صايره كتير احب اشوف هالورده وين مكان لان بتزكرني بيبيت اهلي بالضفه , لان احنا ساكنين بمنطقه ع زمني كانت ملانه ارض وشجر عمره الالاف السنين ع زمن الرومان , بس خلال 3 سنين اللي اجيت فيهم هان امي حكتلي , راح الشجر وراح الارض وكل الناس معمره وبانيه بنايات وما راح تعجبك زي ايام زمان , عفكره انا كان عندي فلكر ع زمن مكانش في الانستا , وفي عندي صور ولازم مره اجي احط منهم هان , المهم هاي الورده كانت معبيه المنطقه بالربيع عنا ووين مكان ورد احمر , كنت احب اشوفه , لهيك بتزكرني !

لما روحت عند 7\11 هدا محل اسمه سفن الافين , بحب كهوته كتير , ودايما كل ما اروح عليه الا ما اشتري لاخوي بكيت دخان , شوفت نوع جديد البكيت تبعه لونه رمادي وصغير واغلى من العادي , فا اشتريته عشان اخوي يجربه , وحتى سألت البياع انو اد خفيف ولا تكيل ؟! وحكى انه بعرفش , المهم كنت متوكعه انه يطلع خفيف , بس طلع اتكل من العادي وعجب اخوي وانبسطت انه عجبه , واللي صار كمان وانا احكي مع اخوي اللي هو اخوي واحد , حكيت (خلينا نجربه) وبعدين عطول وراها حكتله ( انت تجربه احسن تفكرني ارجعت للدخان ) اخوي حكي ( وترجعي) , طبعا انا بديش ارجع لان بخرّب وجهي بس عشان هيك , وانا واخوي واحد معنداش التحكم او شو الصح وشو الغلط , انه كل واحد يعمل اللي بده اياه , لانه هدا الاخو صاحب اكتر من اخو , ومرته بتكره صحبتنا , لهيك لما هي تكون موجوده انا ببعد عنهم لانها غيوره وعكلها صغير ويعني بتوجع الراس بتفكريها اللي زي بنت عمرها 7 سنين وبهمنيش بصراحه طالما اخوي بحبها , لهيك اد هي مش موجوده انا واخوي بناخد راحتنا بالحكي لانو زي ما حكيت بنحكمش عبعض , وبنعبر بحوارات صعبه وباسرار , حتى من فتره مش بعيده , كان اخوي واحد يحكي مع حبي كميرا ونادوا عليا وكعدت احكي معهم يالله اتركزت ايام زمان لما كنا احنا التلات بس , ولما كل ما يوكعوا بمصيبه يجوا عليا ويخبروني ونكعد نخبي عبعض مشان اهلي او اهل حبي ما يعرفوا , او اكعد افطس ضحك عليهم , مهو حبي واخوي اصحاب عالعظم , بس زي كل اصحاب ببعدوا وبرجعوا , لهيك صعب عندي انسى حبي , واخوي عارف انو بحبه ومش لبعض بس انو يعني لشو الحكي انو منحكيش مع بعض , غير انه الثقه اللي بينا بحبها كتير , بحب الثقه اللي بيني وبين اهلي , لانو والله من تجربه فش بعد الصدق والصراحه بينك وبين اهلك والتفاهم وانو نسمع لبعض ونشوف شو الانسب , والله الاهل لما يكونوا اصحابك يالله شو بخفف وجع الدنيا عليك .. الله يخليلي اهلي يا رب ويشفيهم ويشفي كل مريض بالهدنيا ويرحم اموات المسلمين ويجبر ويعوض يا رب يا رب انت كبير وكريم .




||

نيجي لاشي بعشقه وهو الكهوه , عفكره اجى عبالي , لازم اروح اعمل غله كهوه ع كيف كيفني , فا كعدت اطحن كهوه الموت اللي حكتلكم عنها كبل هالمره , وكنت شاريه كهوه ستار بوكس اسبرسوا وخاصه العربيه لان بتكون تكيله .. وبخلطهم وبتطلع رهيبه ..~

من الشغلات اللي اشتريتها والسبب ..~





||



صبيه بحب الجرابين تبعات البيت غير شكل , بحبش اضل بالبيت بدون جربان لان بحبش اجريا يتوسخوا او ينشفوا , بحب يضلوا بيض نظاف ناعمين , لهيك كل فتره بشتري انواع رخيصه ولما اشوفها جردت وخربت برميها .. وعجبني هاد لان عليه هر , وانا بنت بعشق الهرر , اخ كديش مشتاكه للهرر اللي كانت عندي وانا عندي اهلي , بس كلهم ماااتو ~ 3$



لان صرت اكتب كل فتره وبحبش يضلوا كفوف اديا يلمسوا الحفه تبعت اللاب توب , رايحين جاين , لهيك اشتريت هدول واقي وبس منظر , هيني عم بكتب ولابسهم وكتير مريحات للكتابه 4$

.

كل فتره وفتره بشتري هدايا لاهل الضفه من اهلي وصاحباتي , واي حد بنزل ع الضفه بعطيه , ولاني بحبش اشتري كلشي بوكت واحد عشان ما اضغط حالي , لهيك كل ما يوكع تحت ايدي اشي محرز بشتريه وبتركه للزمن , وعنا شناتي مايكل كورس كتير مشهورين والناس بتحبها , وغالين ومع هيك فش اشي بغلى ع اللي بحبه .. عن حالي مش كتير مغرمه بشناتيه ..~

اشتريت تنتين من النوع اللي بكدر ع سعره وراح احتفظ بسعرهم ..~




؛

https://a.top4top.net/m_748vgyl01.m4a


؛

.

.

.