مأساة روح {هالكه} في اوراق تائهه ~

الجمعه كان من الايام الصعبه عليا ..~

بعد الظهر اطلعت ع شفت البارت تايم وبعدها ع شفت الليل , بالطريك امي اتصلت عليا , وحكتلي انو (ام حبي نازله عالضفه) , هي وامي متكاتلين وهدا مش اشي جديد , دايما هدول التنتين بتكاتلوا وانا حبي بنكعد بنضحك عليهم , بس آخر فتره صايرين كتير يتكاتلوا وخاصه انا وحبي بنحكيش, وبشوفه مرات بفسد امه مشان يتحركش فيا لانو بعرف اد اتكاتلو هدول التنتين راح نحكي مع بعض وانا بديش احكي معه , هيك بفتره مش طايكته ومش منه , انا جايتني ساعتي , المهم امي تحكي عنها وتحكي انو هو اللي باعتها ومن هالحكي , واني السبب باللي بصير , وهو دايما الحمار بحط امي بالنص بكلشي بصير بيني وبينه , لهيك صرت ما اطيكه, وبعدها اوصلت ع شفت الليل , وانا بالشفت اتكاتلت مع خواتي مكاتله عن جد بدون مزح , وفيث رمت كتير حكي تا بالاخر حكتلها (تحكيش بكون احسن) واتسكرت الكصه وكل واحده راحت بجهه , بس كنت جد زعلانه منهم كتير , وانا بالعاده بزعلش بسرعه , بس هم زودوها بكصه مش لازم يقربوا عليها , وكتير حكتلهم (وكفوا تحكوش عن هالكصه) وهم ابدا تا بالاخر انا فكعت معي , وكنت يالله شو زعلانه , وكان الشفت صعب عليا , لدرجه وصلت لهاي الكصه , انو خلص اترك شغلي .. لاني اول ما عبرت شغلي قلبي انخنك , زكرني بكصص حلوه كانت تصير فيه وهلكيت بطلت , كيف بدي اكدر اتحمل كرف الشغل بدون هالشغلات الحلوه اللي كانت تخفف عليا , يعني من كل النواحي خربانه معي , الا صاحبي (الفصح) جاي يحكي معي عالواتس ,, حكيت بعقلي( يالله اجيت والله جابك يا صاحبي ) مين هدا الفصح ؟ هدا اول شخص اتعرفت عليه بالنت ؟! بتصدكوا ؟ لحد الان احنا بنحكي وهو يعتبر اكتر شخص عالنت ضحكني وبضحكني وبشيل الهم , المهم اجى يحكي معي وبلش يضحك فيا بدون اي اشي , كان طالع عالشغل وبلش يصور فيديو يومه بالشغل ويصور حاله واللي بيشتغل معه ولما كعدوا يرقصوا ويالله يالله شو ضحكني , يالله شو شال الهم عني الله يسعده هالشب , وبعدها ايش صار ؟ اشي غير متوقع ابدا ابدا , اشي خلاني انبسط وازعل بنفس الوكت , اجاني اتصال من صاحب , هالصاحب اللي بكون شخص عزيز ومميز عندي , هالشخص اللي كان يضل يضحكني , يغنيلي , يسهر معي , كان زي ظلي , واهلي كانو يعرفوا كديش كنت اعزه هالشب , ولما تركنا , خلى الكل ياكل وجهي ويسمعني حكي انو هالصاحب ما بيستاهل كل هالمعزا , لما شوفت اسمه عالبلفون ما صدكت , حاولت اركز اد هو او لأ , وبسرعه رديت , وكشعر بدني ينعن شكله لما اسمعت صوته ,وكنت متفاجئه وصار يحكي انه بده يطمن عليا وكيفني واشتاكلي وانو بنامش واني كنت اشي حلو بحياته وكل هالحكي الفاضي ابن الكلب وحتى غنى اغنيه كمان ومكدرتش اني اخبي ضحكتني , فطسن ضحك , وكنت اضحك معه وبنفس الوكت بدي اكتله , صار حكي شوي ورميتله كلمتين وهو زعل وحكتله (الكصه الكديمه انتهت لشو التجريح والحكي الفاضي) كعدنا حوالي عشر دكايك وراح , كل ما اتزكر ( يا مجنونه تعي) وهو يصرخ , بزعل وبنكهر اني مش راح اسمعها , ولما سكرت البلفون رميته من كتر ما عصبت , وكالعاده اتكمّل كسر شاشه البلفون , وما اظنش يعاود يرجع يحكي معي , حطمني هدا الشب , ومن بعده وعدت حالي انه مستحيل اعز حد بالهدنيا ..~
لهيك انا بوكت بحكيش مع حد , ومش طايك حد , الا اد بده يضحكني ويشيلني من الهم والكرف , وصايره حساسه بكدرش اتحمل كلام حد , ومعيش مصاري مفلسه , وعليا جلسه سنان هدا الاسبوع , وكصص , الله يهونها عليا يا ربي وع الكل ..~

ويوم السبت , ارجعت عالبيت الصبح من الشفت ونمت وما اصحيت الا الظهر واخوي تلات شاري جاج باباي وافطرت عليه حتى واشرربت ريدبول لان مزاجي زفت , وضليت بالتخت اليوم .. خواتي اجو يحكو معي وامي كمان .. والكل بسال عن نفسيتي ..~

طلبيه اليوم .. الوصله لان مرات بشبك بلفوني ع سياره اختي فيث لما بدي اسمع اغاني ع ذوقي والوصله الاصليه تبعتي ضاعت , لهيك وصيت ع واحده وعفكره مرات بشتغل ع الشاحن ومرات لأ , لسا ما جربت السماعات .

مرطب شفايف لاني بنت بحبش الحمرا كتير وبحب دايما كلشي يكون طبيعي معي , لهيك المكياج رقم واحد المفضل عندي هو مرطب شفايف وبدي اجرب هدا النوع , خاصه انه لليل فا يا رب يكون منيح .

وهدول بعرفش شو اسمهم بالعربي , المهم انهم للحب بالوجه , جربت نوع تاني وما كتير عجبني , بس عجبتني الفكره , لما جربت الكديم كان يزبط ايام وايام لأ , لهيك اعطيته كمان فرصه ونشوف كيف .

وانا رايحه ع شفت الليل امبارح الجمعه , هدا من المنتزهات اللي بحبها , ولما كنت كاعده احكي مع امي بالبلفون ...~

معنديش الوكت لأجي اكتب، شفتات الليل متعباني، بس اليوم عطلتي، هيني خلصت فلم (ابراهيم الأبيض) وعجبني، لحد الان مواصله اني اشوف افلام عربي، مش زهكانهم، وكل ما اخلّص فلم بسأل اخوي واحد عن فلم لان ذوقه حلو .. اوضاعي النفسيه صعبه، وامبارح كان عليا موعد مع دكتور الاسنان وراسي لحد الان بده ينفجر من البنج، الادفل مش ماشي ولا الكهوه، متكاتله مع الكل ومحاربة الكل، وفي شغله اتعبتي بضل براسي ومش كادر اصحى منها، لازم اورجيكم ايش وصلني من ابسي، واحكي عن شويت كصص..

امبارح كانت في عليا مقابله مع المدير الجديد بخصوص البيت اللي احنا مستأجرين فيه , الحيوان ابن الكلب حسبي الله ونعم الوكيل فيك يا كاشف , عالفاضي مشاكل وراح ابلش بمحاكم وتعب نفسي وجسدي من جديد ..~

مش عارفه مالي اليوم مش كتير متشجعه اني اكتب , يمكن لان راسي بده ينفجر , بس بدي احاول اكتب واطلع كلشي جواي احسن اضعف واروح اتصل عصاحبي واحكي معه لانه ابن اللزين بخفف عليا , وبديش احكي معه , بدي احارب حالي عشان ما احكيش معه ..~

عم اسمع باغنيه بعرفش اسمها عفكره ودايما بكعد سنه وانا ادور عليها لانها بالكوري , وليش هالاغنيه يعني ؟ لان بتحكي عن الانتحار ,( يما الدنيا بارده), وحتى صوره سطح المكتب , من فلم مفضل عندي وهو ياباني وبيحكي كمان عن الانتحار , واللكطه وهي عالارض والدم معبي الدنيا , بعد ما رمت حالها ( بدي اطير بالسما) ..~

الي من زمان مش شايف اختي هوبز واليوم اتلاكيت معاها هي وفيث جاين الصبح عندي يشربوا كهوه , كنت لسا مروحه من شفت الليل واتصلوا عليا وحكولي (فش حد فاتح الباب وين انتي؟) حكتلهم (هيني انزلت من الباص ومسافه الطريك وبكون عندكم) ما كعدوا كتير لان عليهم مقابلات مع الاساتده بالمدارس ..~

واغلب اليوم ارتب بالبيت لاني يومين مش مرتبه ومرت اخوي بترتبش اشي عشانها حيوانه , بس شاطره لما يطبخوا خواتي او يجيبولي اكل , تاكله كله وما تخليلي كمان الحيوانه , بس يا عمي ارمي ورى ظهري واتحسب عليها عشان خطيتي تكطعها كطع , يبي شو بحب لما اشوف ربنا بياخد حقي وشو بنبسط ومش شماته لأ والله , بس حقي ..~


كتبت فقرتين وبعدين مسحتهم !!

علبه الريدبول بتنادي عليا ؟ اشربها؟ بس يا عمي الحب معبي وجهي لان نفسيتي بالارض ,, يالله شو مكهوره ومهمومه وحزينه يالله يالله الفرج من عندك ..~

راح احكيلكم عن ابسي ,,هو نحكي زي تطبيق بدفع 10$ بالشهر وشحن مجاني , وبيجيني عينات من مكياج , مع اني مش هالبنت اللي بتحب المكياج بس مرات ببعتو شغلات عنايه , وبحكي لحالي بخسرش اشي من 10$ ..~



هدا الغلاف نحكي بكيت البلانين اللي بنحب نلعب فيهم ونطكعهم نحكي , ودايما لونه زهري ..~

||



بكون جواه شنته صغيره فيها عينات المكياج , وكل شهر شنته شكل , وعفكره ملان عندي شنتات صاير , مش بطّاله شنتت هاي الشهر , بس اللي قبله كانت رهيبه ..~

||




وهاي العينات لهدا الشهر , وعفكره عجبوني وخلنيي احكي بالتفصيل شوي عنهم ..~

من فوك ماشي ..~

ليبستك وطبعا ما بستخدمه , بس بحب دايما اختيارهم للالوان , جربته لونه حلو , بس بعبي الدنيا وين مكان وفيه لميع وبحبش اي شي فيه لميع ..يمكن للاعراس احطه مش للايام العاديه .

ماسكارا بينفت ويالله هاي المسكارا المفضله عندي لوكت ما جربت اللي بستخدمها هلكيت , واللي عندي كربت تخلص ف هاي اجت بوكتها .

نحكي فانديشن مع واقي شمس , الدكتوره حكتلي اني لازم احط واقي بس بحبش احط اشي ع وجهي , ومع هيك هدا 50 يعني توب , مرات بتكون الدنيا شوب ومتلا طالعين ع المنتزه او الملاهي مع الصغار وبديش وجهي يخرب فا الا ما احطه , وغير اني امي بتحب هيك كصص بخليه الها .

ونيجي للشغله الحلوه التانيه وهي مرطب للشفايف وانا بعشق هيك كصص , مع اني من فتره اشتريت واحد مش حكتلكم عنه ويالله شو رهيب , بس جربت هاد ومش براهبه هداك بس منيح , واظن بعتولي هاد لان بعتولي كبل هالمره مرطب وحطيت انه عجبني فا صاروا يبعتولي انواع تانيه بس .

وكريم للوجه اللي الدكتوره منعتني ابدا احط , بس بخليه لوكت ما وجهي يهدى يا رب

هدول هم شو اجاني لشهر 11 من ابسي ..

من زمان مش حاطه صورتي عالاسك لاني اتراهنت مع حد وخسرت الرهان , وع سيره الرهان كان في شخص واحد بحياتي ولا حد مر عليا متله بانه يلاكي رهان بسرعه ولا مره اكدر افوز عليه ولا مره , مع انه رهانته بسيطه بس شغلات يعرف اني بكدرش اعملها ..~

اختي فيث حكتلي انها حلمت فيا وبصاحبي , اخ يبي هالصاحب , لليوم لليوم بكون نفسي نرجع نحكي بس النصيب النصيب بياخد كلشي حلو مننا , حكتلي (كانوا في السوك وضلوا يدورو عليا , حكتلي (يالله يا مريم كديش اتعبنا واحنا ندور عليكي , وزعلانين انو ما لكيناكي) وصحيت .. حكتله هدا النصيب بانو مش موجود بينا , انتهى هالصاحب انتهى ..~

امي عزمت ام حبي ورجعوا احباب وهات ضحك , بس صحتها لامي مش عبعض , الله يشفيها , مكهوره وانا استنى بالورك وخايفه انو ما يطلع لان خوفني انو ممكن اتغلب وانا الحياه احب ما عليها تغلبني ..~

حتى اليوم كعدت انا واخوي واحد وكعدنا نحكي عن هالدنيا وعن حبي وعن صاحبي وعن شغله ومشاكله وحاله , كنا احنا الاتنين مكهورين مكهورين انو مش طالع بايدنا اشي , وتعبانين ..~

هي اجى اخوي تلات من الشغل , والي من زمان مش شايفته , من يوم السبت , بدي اكعد معه مشتاكله

اليوم كان من الأيام الهاديه.. الخميس

مكانش عليا شفت ليل لان كان عليا شفت نهار، بس اصحيت الصبح ع تلفون من شغلي بانو اليوم فش شغل، كتير انبسطت انو فش وارجعت انام، مع أنه لما رن البلفون واصحيت عليه كنت متوقع حد، ومطلعش الحد وازعلت، بس لما اعرفت فش شغل ارجعت انبسطت، ارجعت انام وغفيت وعاودت اصحيت ع صوت البلفون وكانت أمي وحكتلها ( فش شغل عليا خليني ارجع انام) وارجعت انام واغفيت .. وآخر اشي كمان رن البلفون وكانت فيث، وبعدها انا احردت عالنوم وبطلت بدي ارجع انام، بس كله كان رايق لانو فش عليا شغل، بسرعه رتبت البيت ووصيت ع فطور واغلب اليوم اكل واتسلى واشوف واتمدد واحكي تلفونات.. والدنيا مطر ومرتاحة وبحاول ابعد عن عكلي كل شي.. وبعدين اجى حد يتعرف عليا، ويالله يالله شو كان مغرور وممل وزنخ وتكيل دم.. يالله، كل شئ عنده حرام، كل شئ عنده شهاده وتعليم، من البيت للشغل ومن الشغل للبيت وباخدش ايام عطل.. مممل ممل بلاوي.. لا بضحك ولا بتمسخر وجدّي وشايف حاله وانو احسن من الناس، وانو عمل بحياته، حتى كمان بدخنش ويالله يالله يشرب كهوه، اطلع من راسي.. انا حياتي ممله وزفت وملانه مشاكل واللي ما بضحكنيش ما يجيش يحكي معي، اللي بدوش يغنيلي ويتمسخر معي ويحكيلي نكت تجيش.. اللي بده ينافق ويعمل حاله شريف مش علينا يا مندلينا، اللي بشوف حاله انو الشهاده هي شو بتقرر، انكلع انت وشهادتك.. هدا الناكص.. مممل


وهيني بالشغل شفت ليل.. الله يهونها