السلام عليكم ..~

ليل السبت || 6\4\2022 ..~

||..~

بتمنى تسامحوني , عاد اخر مره كنت هان وعدتكم ووعدت حالي اني ارجع , بس الدنيا ما اعطتني الوكت ابدا , اللي صار انو صرت اشتغل شغل تاني لانو قررت اعمل اشي كبير وهالاشي الكبير بده مصاري , عاد اد زبط بخبركم واد لأ , بضلوا بقلبي ليقتلني .. او لاقتل حالي ..~

ف حياتي من اخر كانت , اطلع من البيت 3 الصبح , اروح ع شغلي الاول واضل فيه لل 11 ونص الظهر , ارجع عالبيت ومعي نص ساعه اجهز حالي للشغل التاني اللي مش طايقته من مره , واروح عالشغل التاني اللي لازم اكون فيه ع ال 1 الظهر , وابلش فيه واضل لل 10 بالليل , واوصل البيت 11 بالليل , وبنص ساعه اكل واخد شاور سريع واحط راسي وانام واصحى 2 ونص الصبح , ولفي فينا يا دنيا دوخينا يا دنيا , ضليت هيك اسبوعين .. لحد الاسبوع التالت اللي حكيت فيه اني مريضه وما روحت عالشغل التاني .. ~

ايام العطله كنت بكل صريح العباره اضل نايمه من كتر ما كان مكسور عليا نوم , ومن يومين ارجعت عالشغل التاني , بس حكتلهم انو بكدرش ابلش ع 1 بدي كم ساعه زياده مشان انام بالنهار قبل ما اروح عالشغل التاني , لهيك صار شغلي التاني ابلش فيه 3 العصر مش 1 , بالكم ساعه بنام وباكل وبريح حالي احسن ما يكونش عندي ولا دكيكه ارتاح فيها ..~

الاشي التاني اللي صار اتعرفت ع شب , وعجبني لهيك كملت معه , بس بالاخر تركني كالعاده , لما يعرفوا سرّي بيهربوا , ضلينا مع بعض لتلات اسابيع , كنت بايام العطل اطلع معاه , ونكعد ساعات مع بعض , وكمان بدل ما كنت انام بالليل الكم ساعه اللي معي , نضل ع البلفون نحكي , لوكت ما سألني عندك سر ؟ وبيني وبينكم بلّشت اشوفه يتعلّق فيا , وانا بالاصل كاسره قلب حبي , وازيدكم من الشعر بيت , بحب اوكعهم , ف لما شوفته بلش كتير يتعلق فيّا ويحكي حكي ويعمل كصص بدّل ع انو وكع , واجاني الخيار هو سؤاله اد عندي سر , لهيك حكيت اه احكيله هالسر بس مش عالبلفون , طبعا محدش من اهلي وافك , الكل عارض اني احكيله السر , بس انا بهتمش ومتل ما امي بتحكيلي " انتي بتحبيش حد " ..~

لهيك روحنا ع مكان بحبه وحكتله السر من اول ما كعدنا , جدا استغربت من رده فعله انو ما اثر عليه , بس استغرب انو ما حكتله من الاول , وكملنا نهارنا مع بعض للمغرب وما كان في اي اشي بدل ع انو راح يترك , ولما اوصلت البيت كنت تعبانه كتير , لاني شوفته بعد شغل الاول وما كان عليا شغلي التاني , ف لما اوصلت البيت , بتزكر اخدت شاور سريع ونمت وانا مش داري عن حالي , اصحيت ع المنبه ع ميعاد شغلي ع 2 الصبح , وشوفت انو كاين باعت مسجات , انو وينك ليش ما طمنتيني انك اوصلتي البيت وكل هالحكي الفاضي عندي , وانو لتكوني ازعلتي او زعلانه , مكنتش فاهم شو كاعد بخبص بالحكي , عاد ارجعت احكي معه عن شو بتحكي . حكى بس بسال وبعدها اختفى يوم كامل , وانا افهمتها انو قله الجواب جواب , بس بعرف حالي بهمونيش , وبعرف حالي اد بركض ورى حد فهو حبي ..~

واليوم اللي وراه كنت طالعه مع خواتي واولادهم ع الملاهي ومبسوطه ع الالعاب ولحد لان في لعبه في نفسي العبها بس مكانش معانا الوكت لالعبها , لهيك لازم ارجع ع الملاهي مشان العبها لانو اتوقع هي اللعبه اللي راح اخاف منها , العبت ع 7 العاب , وكل لعبه احكي اظن راح اخاف , وبالعكس انبسط اكتر واترك اديا , كان جد يوم حلو ونفسي ينعاد ..~

بالطريق عالبيت اجاني تلفون منه , وحكينا , الاهبل , والله كلهم مهابيل ! بفكروا اد بحكي معهم او بضحك اني بحبهم او معجبه فيهم , بفكروش اني بلعب وبتسلى ’, مشان ارضي حالي مشان ابسط حالي , بفكروش انو في حد جوى قلبي كاعد ومتربع , واحنا نحكي عالتلفون , كنت اخبطه كف بكل كلمه بحكيها , ما سكتله ابدا , لانو بهمنيش ولانو بحب اجرج الناس , خاصه اللي بكزبوا واللي مكانش عنده الجرأه يحكيلي ليش بده يترك , راح اخترع كزبه , كال كيف اعرفت انها كزبه , من كبرها ..~

نرجع نحكي عن شخص دايما بجيب سيرته بالمدونه ؟! اللي هو كمان اهبل هههه ,المعلّم رؤول , اشتكتله الحمار ! عاد هو مسافر والله اعلم اد هو راح يرجع ولا لأ , اد ما رجع راح اترك الشغل بكل صراحه لانو صار اشي بالشغل بحكي عنه كمان شوي , بس بالاول نحكي عن الحمار رؤول , اللي حتى بالشغل لما اعصب منه بحكيله بالعربي يا حمار ههه , الحمد لله اني بمسك حالي لانو من كتر ما بحكي بالعربي كلمه خلص , اتعلمها وسال اختي شو معناها , ف صار يضل يحكيها , كل ما نخلص الشغل , يحكي خلص , وكل ما اعصب يحكلي مريم خلص هههه ..~

كان يوم جمعه وحكالي اد بكدر اروح اجيبه من داره ع الشغل يوم الاثنين , سبت واحد بنكون معطلين , وحكالي اللي بوصله عالشغل بكدرش يوصله وهو مش مجدد رخصته وحسيته بدوش وجع راس وماخد عليا لهيك طلب مني اد اوصله , حكتله اه لانو بعرف انو ساكن كريب من الشغل , بس بعرفش وين , عاد بالعاده كنت اروح اجيب اختي من بيتها عالشغل , بس هالمره حكتلها انو بكدرش اجي اخدك لانو بدي اعمل كصه , اليوم اللي حكالي اد بكدر اروح اجيبه , حملت قلم بايدي واعطيته ايدي التاني مشان يكتب عليها عنوانه , بديش اجيب اي سيره ارقام بلفونات كدامه , هو اطلّع عليا وكان مستغرب , وحكالي شو رقم بلفونك , حكيت بعقلي اخلع بديش اعطيك رقم بلفوني , وكفت شوي وبعدين اعطيته , يوم الاحد بعتلي مسج انو اد لسا بكدر اروح اجيبه الانثنن عالشغل معاي , وافكت, روحت جيبته من بيته , بس حكيت لامي انو بدي اروح اجيب رؤول من بيته واخده معي عالشغل , امي من النوع اللي بتثق فيا والنوع المتفهم , ماشي اوصلت بيته وبعتله مسج اللي هي كلمه يلا , بعرف شو معنى كلمه يلا كمان من كتر ما بحكيها , جيبته وروحنا عالشغل , وكان حاطط الطقيه اللي كديش بحبها عليه , بعد بشوي اجت اختي , ابنها وصلها عالشغل , وحكتلها ليش ما سالتني عن الكصه اللي عملتها اللي خلتني مكدرش اجي اجيبك عالشغل , حكتلي شو هي , حكتلها هيك هيك ! ما حكت اي اشي واستغربت جدا , بالعاده هي عقلها صغير , بعد ما خلصنا شغلنا حكينا انا واختي نروح ع اختي هوبز نفطر عندها , عاد كاعدين وبنفطر وسألتني هوبز شو هي الكصه اللي كنتي بدك تعمليها ؟.! استغربت كيف عرفت انو في كصه بدي اعملها ؟! اطلعت باعت المسج ع الجروب تبع الخوات مش بس ع ايمان لحالها , عاد حكتلها هيك هيك , وهاااد اختي انجنت اوووه , وكامت تكاتل , كيف بتروحي تجيبي شب كافر من بيته ويكعد معك بالسياره بالليل ع ال 3 الصبح كيف ؟ ولك كيف بتخافيش , كيف آمنتي عليه وكيف وكيف واختي فيث اللي ما حكت اشي , كمان نطت تحكي , وحسسوني اني ابصر شو عامله , وحكتلهم امي كانت معي وبتعرف , بس مع هيك اكلت بهدله مرتبه اخت شلن ,. وحكيت بعقلي ليش كال بديش احكيلها كنت ..~

اخر يوم بالشغل قبل ما يسافر كنت وكتها تعبانه بحت لانو مكنتش نايمه وكنت مواصله من شغل لشغل , ومكنتش اانام ياليوم الا ساعه , وكان طول الاسبوع شغل , وكنت متنكده داخليا لانو عارفه انو رؤول مسافر , والشغل التاني كل يوم فيه نكد ومشاكل وكرف , فهو حكالي خلص روحي عالبيت مش ضروري تعملي فل شفت اليوم , ما رضيت لانو عارفه انو هو كمان عليه سفر بعد الشغل وبديش اترك كلشي عليه , بدي اساعده , ما رضيت وحكتله تخافش عليا بدبر حالي , بعدها بساعه خلصنا كل الشغل وضل شوي , واطلعنا ع بعض انو خلص ايش راينا نترك كلشي ونروّح , فينيسا مش جاي , وهو اخر يوم , بدناش نسأل او نهتم , وبالزبط هاد اللي صار , عاد حكتله بدك اوصلك عالبيت ؟ كنت متوقعه يرفض , حكى اه , غريبه , ووصلته عالبيت , لما اوصلنا ع البيت تبعه , حكيت بعقلي اخ بكره الوداع , وعندي احساس انو مش راح يرجع , ضلينا كاعدين كل واحد بمكانه بالكرسي بالسياره , وكان هيك في جو غريب , جو الوداع , رفع ايده واعطاني هاي فايف , بعرف انا مش بنت الحضن والبوس , اكتر شي هاي فايف بعمله , وحكى راح اروح , وحكتله ارجع بصحه منيح ويلا انزل روح , وكنت مخبيه كلشي بابتسامه بوجهي, ولما نزل لسا ضل واكف وعبّر راسه من شباك السياره وبلش يحكي انو ما تشغلي بالك بالشغل , حكتله ولك روح خلص واتسهل ولحد الان ما رجع ..~


نحكي عن الصدمه اللي صارت وهي , مايكل ترك , اووه لاااااا , مايكل سواك الشاحنه , اخ بس اخ , لسا امبارح ترك الجمعه ولسا ما اجى السواك الجديد اللي الله يستر شو يطلع الختيار اللي بكدرش يحمل الكراتين ولا الاولاد الصغار الضايعين وملخومين وبعرفوش يشتغلوا ولا الشب العامود اللي عليها يضل يبصبص علينا , يا ربي اشي بكهر استغفر الله العظيم بس ...~

شو راح اشتاك لمايكل , وكيف كانت ردت فعلي لما اجى يحكيلي في خبر مش منيح , حكتله بدهم ينقلوك ع مكان تاني ؟ حكى اه , حكتله لاااا ولفيت وجهي عنه واعطيته ظهري وكعدت احكي لايمان انا هلكيت حزينه وزعلانه , وكنت طوال الشغل مكهوره فش مايكل ؟ كيف فش مايكل اللي اول ما يعبر المحزن من الباب عطول بيطّلع ع مكاني وببتسم انو بشوفني موجوده وبسلّم عليا , مايكل اللي بالايام اللي مش طايكه حد , بضل يحكي شغلات مشان يضّحكني ويخلني ابتسم , مايكل اللي بضل يمزح معي ويتخوث ويطبّل ع كتفي ويحكيلي كديش بتتعبي بالشغل , هلكيت فش عضلات اطلّع عليها بالشرط اللي بيلبسه , ولا عضلات الادين اللي لما يرفع الكراتين اللي بكدرش اشيل عيوني عنهم وفش الوجه البشوش اللي دايما مبتسم , اخ مش كادر اتخيل راح اروح الاثنين الشغل وفش مايكل وفش رؤول وفش فانيسا , وبكدرش ما اروحش لاني اللي بعمل الشاحنه لانو حضرت اكرام اللزكه جننتني اكتر من اختي , دايما الله ببعتلي لازكات يجننوني بالشغل وبضل يشكوا ويبكوا ونكد كرف اللي يكرفها , لما اجى يروح مايكل كان نفسي اعطيه حضن , من كتر ما انا عارفه مش راح اشوفه خلص راح , وبعرف انو الناس بتيجي لتروح بعرف , وبعرف اللي انا بعزهم وبحترمهم ومحلّين حياتي الله بياخدهم عني , اخد المغني اللي بسمعله عالسجن واخد رؤول واخد فانيسا انها مرضت وبطلت تيجي عالشغل وهي كانت تساعدني بالشاحنه اسبوع ونص , كنت كل يوم اروح اجيبها من بيتها لانو ساكنه حوالين بيتي , واحنا بالسياره اضل تحكيلي عن حياتها وعن الشغل , اعرفت كلشي عن الشغل واسراره منها ونروح عالشغل مع بعض , بس مرضت , لأ وفوك كل هاد اخد ساده ليوم , عني , اخ يا قلبي كل ما بتزكر شو صار مع ساده بغص قلبي ..~

وداع مايكل كان وجهي حزين , ضليت اطلّع عليه واديا فوك راسي زي الايام الصعبه اللي مرت عليا وكت ما اسمع اخبار مش منيحه , لوكت ما وصل الباب تبع المخزن , الباب اللي دايما بعبر منه بابتسامه وعيون فرحه , لما وصل وفتح الباب , لفيت وجهي عنه , بديش اودعه وهو طالع منه , بديش الزكرى تبعت وداعه , بدي يضل الباب يزكرني بدخوله علينا مش بطلوعه ..وبديش يشوف عيوني الحزينه عيون الوداع .. بحياتي اللي اشتغلت فيها مع شباب وعالم , هاد اول شب كان يحرث حرث مش طبيعي ويعمل شغل مش شغله ويساعد مساعده , واللي كان يفهمني بدون ما احكي , وكت زعلي وفرحتي وعصبيتي , ويعرف امتى بدي مساعده بدون ما احكي , اللي الكل يجي يحكي اظن مايكل معجب فيكي او انتي معجبه فيه , اللي يحكو ما بشيل عيونه عنك ولا انتي .. باي باي .. اخ مش كادر اتخيل باي ..~

طبعا بغياب رؤول انا وفانيسا بنفتح الشاحنه وبنعمل عليها , بس مرضت فينسا , وفش حد بيعرف يعمل الشاحنه الا انا , وحضرتهم من كتر ما هم كسلا لحد الان لا اعطوني الكودد ولا المفتاح لايام الطوارئ اللي بتصير وبديش اياه عشان ما اتحمل مسؤوليه , المهم راحوا بعتوا اكرام , مانجر جديده وعربيه بالمحل تبعنا ,’ هي مش جديده بس هي مانجر جديده , ويالله ازنخ من اختي فيث , اولا ياليوم الي اعرفت انو اخر يوم لمايكل , عم احكي معه وهي ملزكه بكلامنا شو بدك اطلعي من راسي خرى عليكي خرى , وكل كلامها عياط ونكد عالصبح زي فيث بالزبط , عن تعب الشغل والمشاكل وانو وانو , وانا بكره للسما النكد عالصبح , كنت في فيث وكنت ابعد عنها لابعد حد اعبر جوى الشاحنه عشان ما اشوف وجهها وهي بتعيط من كتر الشغل وتشكي وتشكي , اجتني هاي اكرام اللي بتلحقني عالشاحنه جوى تحكي عن مشاكلها بالشغل , حتى مايكل لاحظ , حتى لما بلشت انرفز ووجهي اتغير , بتحكي مالك يا مريم شو في ليش زعلانه , حكتلها دشريني بحالي اكرام , وبتعرفش الشاحنه وماشي بعرف انو بدها تتعلم وبعلمها عادي , بس تتركني بحالي عالصبح بكلامها الفاضي وبالنكد تبعها وبالتدخل فيا انا هيك مزاجيه وملوش حد عندي اتروكوني بحالي يا بضحكوني يا اما اخرسوا ..~

اخ بس شو هامله هم الاثنين , بدي احاول ما اخده فل شفت لاني بقتل اكرام ..~

اما نحكي هم ساده , اللي صار هو انا بالعاده اول ما اصحى بفتخ باب البيت اللي عالشارع الرئيسي مشان ساده يطلع عالشارع , وبعرف انو بخاف وما بطوّل فيه مش متل الحوش , المهم طلعته وجهزت حالي , ولما اجيت اتسهل عالشغل عم انادي عليه وانادي بردش الحمار ومش امبين , كعدت تلت ساعه, بالاخر كتير اتاخرت عالشغل , خليت الباب مشقوق ع امل انو بعاود يرجع , واتسهلت عالشغل , وانسيت امره لاني كنت ملهيه بكصه وداع مايكل وبكصه زناخه اكرام , وحكيت اكيد اخوي عبّر ساده , بعد ما خلصت شغلي , اتصلت ع دكتور الاسنان وكان عليا موعد بس عليا شغل بالمكان التاني , سالتها اد في مجال اجي قبل الموعد واكفوا , روحت ع موعدي , وبعدها مكانش معي وكت لاني عليا اروح عالشغل التاني , لما اوصلت البيت شوفت انو اخوي كاين متصل عليا , ارجعتله وحكالي مريم ساده ما رجع , حكتله لأ مش معقول وسقط قلبي , حكتله انا هيني باب البيت هلكيت بشوف وبخبرك , انزلت عالدار وكعدت ادور عليه ما لكيته لا بالحوش ولا جوى الدار , طالع من ال 2 بالليل والساعه كانت 2 العصر , 12 ساعه غايب , وبحياته ما غاب من طريق الشارع , بالعاده بالحوش اه بضل , بس الشارع لأ , وحكيت امبين اندعس , وكعدت اعيط وفكعت عياط , حكيت حتى ساده راح , الروح اللي بتخليني امسك حالي اني ما اقتل حالي راحت , ساده اهبل ومستحيل يعرف يرجع , كعدت الف بالشوارع ودموعي مش موكفين وبحكي مع فيث انو ساده ضاع وفش دم بالشوارع وفش ساده , وحكتلي بيرجع بعاود يرجع , وضليت اعيط واحكي مع حالي , الكل راح من حياتي , الكل طلع من حياتي , اخوي بتصل وبمسك حالي اني ما عم ابكي وبحكيله مش امبين , حكى بيرجع , ليش كلهم كانوا واثقين انو بيرجع وانا لأ , انا حكيت بعرفش يرجع , ساده مش شاطر وخويف , وطلع من الشارع كيف راح يرجع , واتاخرت عالشغل التاني , ولازم اروح عليه , روحت وعيوني ووجهي احمر وحالتي حاله , ضليت اشتغل ومليش نفس اشتغل , وعيوني بضل يرغرغو اني كيف ساده راح , بحدود الساعه 8 ونص بتصل اخوي وبحكي انو رجع وما صدكت , ولما ارجعت بالليل عالدار شوفته وطعميته كتله وتصريخ وحاله عليا وحشرته بالبيت , واصحيت اليوم صوتي مبحوح من العياط ..~