السلام عليكم ...~

يوم التلاتاء بالنهار || 3\8\2022 ..~

احزرو شو ؟! ههه لا حول ولا قوه الا بالله , اخر مره عالمدونه مش حكتلكم في شغلات حلوه بتصير معي بالشغل وحلينا نجرب انو اد بحكي عنها راح توقف ؟! وكفت !! وصار اطكع كمان .. اخ بس ما لحكت الحزينه تفرح ..~

||


السبت كان يوم عطلتي لهيك ما طلعت من الدار وما عملت اشي لانو عارف انو عليا جبد شغل 6 ايام ورى بعض بس مكنتش متوقع هالجبد اللي انا فيه ..~

طبعا الاحد كان عليا شغل كاشير , يعني مش بالمحازن ومحدش من تبعون المخازن بيجي عالشغل , الحمد لله كان يوم خفيف حلو بالشغل لانو الاحد بكونوا كلهم ع بعض 7 او 8 عمال كلنا عبعض , وفش كتير زباين الا بالليل وانا بكون مخلص شغلي , وبالعاده الاحد بكون عطلتي بس بطلبوني في الكاشير , الاحد فش شاحنه الحمد لله ..~

||

نيجي للمصايب بالشغل , بس بالاول احكي انو الاثنين صورت مجرياته وبحكي عنه وكت ما احط الصور ,لاني مش بمزاج جيد . ورحنا شوفنا فلم باتمان بالسنما لانو كنا ع نار نستناه , مكدرناش نشوفه لا الجمعه ولا السبت ولا الاحد لانو كل هدول الايام بنات اختي بشتغلوا وبكدروش يتركوا الشغل , لهيك ما صدكنا تزبط معانا الاثنين , وكان فلم روعه رهيب جدا زكرني بالكرتون , وابدعوا كل الممثلين , بحكي كمان اكتر عنه مع الوكت بس رهيب وبنشاف ..~

اما الشغل , رؤول الحيوان ما اجى ؟؟! شو كصه يوم الاثنين معه ؟؟! هو كل ما يروح يسكر وبشرب بالعطله بكدرش بجي عالشغل .؟ لانو مره عملها واجى متاخر وكان طافي من الشرب , لو تشوفوا كديش انجنيت لانو غياب رؤول يعني حرث لابو الحرث الي لحالي , هو اسمعو كبل البهادل والمسبات , ما بحكم عالواحد انا كلهم كفار وحتى لو مش كفار نص اصحابي بشربوا مش كصه عندي وياما شوفتهم طافين , كصه انا ظهري بوجع من شغل التمريض لانو حساس اد اتعبت شوي عالحد بكدرش اشتغل وبديش ارجع لايام زمان مع وجع ظهري والمطارده ع الدكاتره وتوكيف حياتي , لهيك والله البضاعه تكيله عليا تكيييله , بدها زلام ولما يغيب انا اللي بتعب لهيك بديش اياه يغيب ..~

عاد لما مشى الوكت بلشنا كلنا نسأل بعض ونسال فينيسا وينه ؟ حكت ولا معاها خبر , وبالعاده بنخلي باب الشاحنه اخر اشي نفتحه لانه ت يجي مايكل , لما اجت فينسا تعطيني انا اللي افتح لانو محدش بده يفتح , محدش بده يشتغل مع مايكل , بشوف المفاتيح وبحكيلها , بس هدول المفاتيح ولا واحد فيهم تبع الشاحنه ؟! انجنت ؟! وحكت اه هدول تبعات رؤول لانهم الاتنين بدلوا المفاتيح لانو مفاتيح رؤول ما بيشتغلو ..~ ايش ؟! يعني راح نتأخر بالشغل وبنكدرش نفتح الشاحنه .؟ فش مفاتيح ؟ وبلشت ترن وتتصل ع رؤول وما بيرد عليها ولا عنده ولا عند بال , بعدين اتصلت ع ماري وحكتلها لو تجيبلها المفاتيح , واجت ماري اعطتها المفاتيح وبلشت فتح الشاحنه , وانا الحمد لله كنت اعرف كيف افتح بوابه الشاحنه والقفول اللي عليها لانو مره طلبت من رؤول يخليني اجرب احتياط , وكمان وكت التدريب تبع رؤول كنا ايام افتحها , بس ولا مره سكرتها !! طيب بلشنا كصص البضاعه , يعني اشتغلنا انا وفبنيسا ومايكل , والصبايا عالشغلات الخفيفه وشغلهم ما غيره , وطبعا كلشي رؤول كان يعمله انا كنت اعمله , من فتح البواب لمراقبه الصبايا وشو يعملوا وشو ما يعملوا واشتغل عالاواعي واشتغل ع الشوز , ع كلشي , اد في اشي بالمحل من رفوف ناكصه او رفوف زياده في البضايع , وعد الصناديق , كل واحد بالشغل بدل ما يروح يسال فينسا شو يعمل يجي يسألني , لا حول ولا قوه الا بالله , بحبش اكعد احكيلهم يعملوا وشو ما يعملوا بديش مشاكل بيني وبين اللي بشتغل معهم اني اكعد احكيلهم يعملوا اشي بدهومش اياه , اتوترت غير شغل , وعصبت وكنت اضل اسب واحكي مع حالي بالعربي او بالانجيليزي انو الحيوان ليش ما حكو بدوش يجي ليش ؟َ! وليش فينيسا واثقه فيا وراميه كلشي عليا وبتحكي للكل روحوا احكو لمريم واسالوا مريم ..

لأ وفوك كل هاد كمان اجت شاحنه بنص الشفت تبعي لما الكل روّح وفيها كمان بضاعه ولازم اعدهم واحسب وكصص مع فينسا , الحمد لله كانت شويت بضاعه وبتكدر تنعد , بحكيلكم اتوترت بس الحمد لله بعد ما خلص شغلي شوفت فلم باتمان عدّلت النفسيه غير شكل وكنت ع امل انو بكرا اللي هو اليوم راح حضرته الحيوان يشرّف عالشغل , بس احزروا شو ؟! ما اجى كمان الثلاثاء ؟؟! ولا حتى رد ع تلفونات ولا حتى بعرفو شو سبب الغيبه لانو محكاش مع حد ..~

ف اليوم الثلاثاء كمان ما اجى وحكيت بعقلي افقدي الامل انو يجي او يرجع عالشغل , لانو بيني وبينكم يوم الجمعه الماضي ,رؤول كان مش ععبضوا من مره , كل ما بتزكر يوم الجمعه وشو رؤول اجى حكالي " مريم انا تعبان , تعبان كتير " وكان يتنهد وانا معرفتش شو ارد عليه ؟! لانو بديش اصاحبه , بديش اوكع , بديش اصاحب لا الواقع ولا عالنت , بس اعطيته ظهري تبا بس , ليش اعطيه ظهري ؟! . وكيف كل شوي اشوفه في وجهي يتحجج انو يطلب مني اشي , كان من اكتر الايام اللي رؤول كان يطلب مني فيها , والوداع اللي صار في الممر , وعيونه لما لفيت ظهري , كل هالكصص زكرتني بكل اصحابي اللي تركوا ومحدش فيهم استرجى يحكيلي بدي اترك , كلهم بعيونهم الحسره , كلهم بعيونهم اللي عارفين شو مقررين ومخليني زي الهبله , يمكن كلهم كانوا خايفين ع زعلي , الله يأخدهم كلهم عنده , ومع هيك حاولت اقيس نبض فينيسا وامبين انو عنجد راح يترك لانو اختفى واللي بختفي بكون بدوش يشتغل ,, باي باي رؤول !
كان فتره حلوه احكي عنك هون زي زي تبع الكهوه ()


يا ليالي عشتها يا جروحا شلتها .. انتهى كلشي ..~

طبعا بكرا فش رؤول وفش فينسا كمان , يا حبيبي يا حلاوه راح اكل هوا اخو شلن ينعن عوكش , ماري راح تيجي بس تفتح ولانو لسا مصابه من ظهرها بتكدرش تشتغل. يعني بكرا جد جد اخو الجبد والحرث لعيوني .. اوووه لاااا لا تفعلها ..~