عرض مشاركة واحدة
قديم 03-05-2022, 08:36 AM   #474
روح هالِـ×ـه ~
 
الصورة الرمزية BeautifuL StrangeR
رقـم العضويــة: 268289
تاريخ التسجيل: Sep 2013
العـــــــــــمــر: 33
الجنس:
المشـــاركـات: 9,140
نقـــاط الخبـرة: 1579

Icons13 رد: مأساة روح {هالكه} في اوراق تائهه ~

السلام عليكم ..~


ليل الجمعه || 3\4\2022 ..~
||

الشغلات اللي صاروا هم ..~

اخوي واحد قرر يترك كاليفورنيا او احكي سانفراسيسكو ويروح يعيش في هوواي , عشان دار حماه اهل مرته عايششن غاد ومرته بدها تكمل قطع فيه مننا لهيك اخدته غاد , لحاله يبلش من جديد من الصفر عشان الحب , لهيك انا اتكاتلت معه , اللي اوله شرط اخره نور , معروف طوال العمر انو بده يضل في سانفراسيسكو وهاد كان شرط الزواج , انا مكدرتش ما يأثر عليا اللي عمله , مكدرتش استوعب انو فوك الغُربه اللي احنا فيها بده كمان يقطع حاله عالاخر ويروح ع غٌربه تانيه ؟؟!
بس طبعا اهلي كمان عشان ما يخسروا ابنهم وكفوا معه , وامي ضلت تحكيلي الله بطعمك في اولاد وبتعرفي معزتهم , بس مش راح اكزب ع حد اول ما اسمعت الخبر انجنيت , وفكّعت معي وكعدت اعمل طوش ومكاتل وصراخ وتهديد , وبالاخر كله ع الفاضي , بالاخر انا اللي بتنازل وانا اللي باكل هوا وبسكت لاني بكدرش ع زعلهم , بكدرش امرّضهم , لهيك طوال الاسبوع الماضي , نحكي اخر اسبوع من شهر 2 , بعد الهوا اللي اكلته والمصالحه اللي عملتها , صار اخوي واحد يجي كل ليله عنا , يا ينام عنا يا يسهر لميعاد شغلي .


لهيك زي ما حكتلكم كنت اضل سهرانه معه لل وحده تنتين نص ليل , وبعدها يا بنام ساعه وبجهز حالي اطلع عشغلي , يا بضل صاحيه وبتسهل ع شغلي بدون نوم , وهو كان يروح ينام والله اعلم كان ينام ولا شو لانو ريحه الدخان ما وكفت , طوال السهر نحكي ونحكي , لانو هو كان صديق عزيز قبل اخو , بس من حبه لمرته بحكيلها كلشي وانا بحبش بحياه الواقع حد يعرف عني اشي ,اه حتى لو بتشوفوني بحكي حياتي بالمدونه بس محدش بيعرفني هون , لهيك اتحطمت صحبتنا وغير انو لا انا بطيق مرته ولا هي بطيقني , ومعروف السبب البنات بكرهوني , عاد سألته عن حبي لانو صارلي زمان مش حاكي معاه واسمعت اشي من امه وبدي اتأكد لانو امه كزابه , لانهم اصحاب , واعرفت كصص تانيه ..~


واخر يومين وهو بسانفراسيسكو اللي كانوا سبت واحد الماضيين , لانهم كانوا قبل ايام سفره اللي كان الاثنين الصبح , ما نمناش ولا ضلينا بالدار , كنا انضل عند هوبز او نطلع مع بعض انا وياه لانو مكهوورين انو بده يسافر ,زكرني بايام سفري هون , لاني اجيت قبله ع امريكا , وكان اخر اسوع اللي معاه ومع حبي واحنا بالاردن من انكد الايام بحياتي , واجى الاثنين , واجى ميعاد شغلي كبل ميعاد سفره , لهيك ودعته وروحت عشغلي وانا اعيط وابكي ومكهوره وحالتي حاله ..~

والحمد لله وصل هاواي عالسلامه وراح يبلش حياه جديده لحاله ..~


||


الاشي التاني هو :~

فيث نزلت زياره عالضفه , ياي , كديش انبسطنا الها الحمد لله , لسا اليوم وصلت الجمعه عندهم , وهي طلعت من عنا االثلاثاء , اتغلبت غلبه هي وبناتها غلبه اخت شلن , يبي كديش روح وتعال وجيب واعمل , احنا عنا عشان ننزل ع الضفه , هي طلعت من سانفراسيسكو ع تركيا بالطياره 12 ساعه واشي , وهي بتموت خوف من الطياراات , وبعدها كعدت 3 ساعات في تركيا , وبعدها سافرت من تركيا عالاردن مده ساعتين واشي , وضلت نص الليل لهيك الجسر بين الاردن والضفه بكون مسكر , بس نيالها امي راحت تجيبها من الاردن , لهيك ضلت بالاردن لصبيحيه تاني يوم ونزلوا ع الجسر , وهون بلشت الغلبه والتعتسه , ما رضوا يمركوا بناتها , وطلبوا كصص وعاودت رجعت ع الاردن , ضلت كمان يوم تعمل الكصص وبعدها نزلت كمان مره الجسر ووضلت بالسلامه بعد عذاب .

خلال فتره تجهيزها للسفر جننتني , وامي طلبت مني انا اللي اعمل شناتيها لانو بتعرفش شو تحط وكيف تحط لانو بوضلش الاشي صاغ سليم , لهيك اتغلبت من كل النواحي بسفرها هون لانو كلشي هي وامي يركنوا عليا , لهيك لازم الواحد يكون مش تبع مسؤوليه ولا حرث عشان محدش يطلب منه اشي ..~


||


نرجع نحكي عن حياتي ..~

امفكره بعد رمضان ارجع احمّل التطبيق وارجع لوجع الراس لانو راحت السنه عليا وكبرت
بستغرب لانو معنديش الشوق لحبي ؟! بس كان عندي شوق لاخوي واحد كتير
ساده منيح ويا رب ربنا يحققي الحلم اللي براسي عن كريب
بدهم يدهنوا البيت من برى وراح يبلشو الاسبوع الجاي حسبي الله عليها المانجير

اتهني في جروحي , انت اللي مشيت وخلتني لحالي
بتمنى تعود العيون السود توفي العهود


||

في شغلات حلوه هيك بتعطيني فرحه خفيفه بيومي وبتخليني اتحمل حرث وتعب الشغل , بحكي لو حكيتها يمكن تبطل تصير ؟! بتعرفوا كيف لما الواحد يحكي عن السغلات الحلوه بعدها بتوقف وبديش اياها توقف ..~

نجرب نحكيها ونشوف مع الزمن راح توقف .؟


||

بخصوص شغلي , ما مصدك تيجي الايام اللي رؤول هو اللي يفتح المحل لحاله بدون فانبسا , بكون نفسي اشوطها من وجهي من كتر مهو وجودها وغيابها نفس الاشي هاليومين , يا عمي سلفيا وانجيلا بضلوا يبرموا ويحكوا حكي عالصبح , بوكفوش ثانيه حكي شو هاد ؟ كأنهم بالعين راديو ,وهي بتكعد تحكي معاهم ف يم صار وجع راسي دبل عالصبح , وبتصير بطيئه وهي تستغل لهيك بنتاخر بالشغل وكله بيطلع عراسي لانهم بيخلصوا الشفت تبعهم وانا اللي بضل اشتغل لحالي , الايام اللي كنت اشتغل انا ورؤول كنا نخلص اكتر من الايام اللي فانبسا موجوده حتى لما كانت الكراتين اكتر ..~


كان رؤول يجمّع كراتين الثرايات كل يوم من كل شاحته بدون ما يركبهم , وكل يوم احكيله رؤول , الثريات يا رؤول ركبّهم , يحكيلي خليهم في حد غيرنا بركبهم , اجى االيوم اللي حضرته وصى بالاسم انو خلّي مريم تتاخر بالشغل وترّكب الثريات , لما وصلني الخبر كنت بدي اقتله , لاني حكتله من فتره بكره تركيب الثريات , بطيئه فيهم , ضليت طوال الشفت وانا افتح واركب وارتب واحط , يالله يالله خلصتهم ..~


ومع هيك بحب اشتغل معاه وبحب اشتغل تحت ايده , احب من اشتغل مع البنات , مرات بشوف حالي بحرجه لانو جامد وانا بضل مجننته وملزكه فيه هههه , يمكن لانو بدي اياه ياخد عليا , يمكن لانو بحرث وبتعب الشغل كتير , بس مره زبطت وحكى معي , اول ما بلشنا الشفت كنا بس انا وهو بغرفه المخازن , لانو احنا الوحيدين اللي لما نبلش الشفت بنبلش نشتغل , الصبايا بكعدوا يتحججوا بالحكي بغرفه البريك عشان يتأخروا لو خمس دقايق , وكانوا في كراتين فييهم ادوات ودايما هالكراتين مدايكين علينا في الطريق , عاد لما عبرت المحزن شوفت انو الكراتين مختفين , لهيك سألته ؟! حكى انو حطهم ع الرف العالي وهو يأشر عليهم وكعد يضحك انو كان بده يوكع من السلم وهو حامل الكراتين ويحكي ويضحك عحاله , وهاي المره الاولى اللي بيحكي هيك اشي معي , وحتى حكالي فكرتك ارمنيه مش عربيه , الله الله . دايما كلامنا بس شغل , مريم اعملي ومريم رتبي ومريم حطي , وانا بكون من جواي مبسوطه انو هو اللي بيجي بيحكلي , لانو طريقته بالسؤال حلوه دايما , دايما بكون يحارب حاله عشان يجي يطلب الاشي مني , كأنوا في اشي تاني بس بحط حجج , كد ما بحاول اركز عليه وهو يحكي معي او اقرأ وجهه او عيونه لانو كل ما يحكي معي بشيل القناع مش كادره , عيونه النعسانين ووجه الكرفان من كلشي وخاصه من وكت ما صار المسؤول , هو بالاصل بنحكي المعلم احسن من المسؤول , اكون عاميه احسن , ف من وكت ما صار المعلم تبع المخازن شوفت وجهه صاير كرفان وحتى مشيته صارت بطئ , واليوم جد شوفته كرفان حاله يمكن لانو بده يضل فل شفت لحاله ؟ لهيك حكيت خليني اعطيه دفشه حلوه , واسلم عليه كبل ما اطلع من شغلي , عاد كان هو ببدايه الممر وانا في اخر الممر , عم انادي عليه بردش , اكيد مهو حاطط سماعه في ذانه ابصر شو بضل يسمع , عليت صوتي وبنادي , سمعني الحمد لله ولف ظهره , روحت ركاض عليه , اخ يا ربي , فتحت موضوع بضّحك هههه , حكتله شو رايك فيّ؟ , حكى شو بتقصدي ؟ حكتله يعني في مراجعات لشغلات غلط بعملها بالشغل ؟ (لانو اسمعو صارلي فتره بكّلده وبضل حاطط سماعه في داني وانا اشتغل , وبشوف حالي بنجز اكتر ف خوفت احطه بمشكل ) حكى لأ انتي بتشتغلي منيح , خكتله ماشي يسلمو وبتمنالك عطله حلوه ..~


ومره صارت كصه خفيفه حلوه مع مايك تبع الشاحنه , كنت يومها اشتغل مع رؤول , وبتزكر اتعبنا تعب اخو التعب , صرت اعرق من شعري وجبيني من كتر التعب بالشعل هاد , انا وياه جنب بعض ونفتح الكرانين ونفصل الكصص ,ونرفع الكراتين , ومايك نزّل كلشي من الشاحنه وسكرها واجى ميعاده انو يروّح , بالعاده بمر من جنب رؤول وبعدين جنبي , بنحكيله كلنا انو شكرا الك وبنشوفك بكرا , عاد شوفته واكف كدامي حتى بعد ما حكتله يسلمو , ورافع ايده ؟انا كالعاده عندي بطئ استعاب مش طبيعي , عم احكي بعقلي بده اعطيه هاي فايف امبين .؟ ف اعطيته هاي فايف ولفيت ظهري لاني عنجد انحرجت .. من امتى ؟.! هو بعمل هيك اشي ؟ اعرفت عشان سلفيا مش جنبي يمكن ؟ وابصر شو خطر بباله حتى بده اعطيه هاي فايف ..~
BeautifuL StrangeR غير متواجد حالياً   رد مع اقتباس